ఎంఈవో, స్కూల్ హెడ్ మాస్టర్ మధ్య ఘర్షణ.. ఒకరిపై మరొకరు కేసులు

ప్రకాశం జిల్లాలో ఇద్దరు గురువుల మధ్య వార్ పోలీస్ కేసుల వరకు వెళ్లింది. విద్యార్థులకు విద్యాబుద్ధులతో పాటు క్రమ శిక్షణ నేర్పాల్సిందిపోయి కొట్లాటకు దిగారు. పోలీసు స్టేషన్‌లో ఒకరిపై మరొకరు ఫిర్యాదులు చేసుకున్నారు. పెద్ద దోర్నాల మండలం చిన్నదోర్నాల పాఠశాలకు ఆగస్టు 11న ఎంఈవో మస్తాన్‌నాయక్‌ తనిఖీ చేసేందుకు వెళ్లారు. అక్కడ ప్రధానోపాధ్యాయుడిగా పనిచేస్తున్న సుధాకర్‌రెడ్డి సమయానికి విధులకు హాజరు కాకపోవడంతో షోకాజ్‌ నోటీసు ఇచ్చారు. అయినా నిర్లక్ష్యధోరణిని అవలంబిస్తుండడంతో ఎంఈవో మస్తాన్‌ నాయక్‌ వేతనం నిలిపి వేశారు.

ఎంఈవో మస్తాన్ రామచంద్రకోట గ్రామం జిల్లా పరిషత్‌ ఉన్నత పాఠశాలలో నాడు-నేడు పనుల పరిశీలనకు బుధవారం వెళ్లారు. ప్రధానోపాధ్యాయుడు సుధాకర్‌రెడ్డి అక్కడికి చేరుకొని తన జీతం ఎందుకు నిలిపివేశారని ఎంఈవోతో వాదనకు దిగారు. దీంతో మాటామాటా పెరిగి ఇద్దరూ ఘర్షణకు దిగారు. అనంతరం సుధాకర్‌రెడ్డి మార్కాపురం ప్రభుత్వ వైద్యశాలలో చేరి చేతికి గాయమైందని చికిత్స పొందారు. అనంతరం మార్కాపురం పోలీసుస్టేషన్‌లో తనపై ఎంఈవో దాడి చేయడంతో కాలర్‌బోన్‌ విరిగిందని ఫిర్యాదు చేశారు.

పాఠశాలకు సక్రమంగా హాజరుకావాలని ప్రధానోపాధ్యాయుడికి షోకాజ్‌ నోటీసులిచ్చామన్నారు ఎంఈవో. అయినా మార్పు రాకపోవడంతో నెల జీతం నిలిపి వేశామని చెప్పారు. దీంతో రామచంద్రకోటలో పాఠశాల పరిశీలనకు వెళ్లిన తన వద్దకు సుధాకర్‌రెడ్డి వచ్చి కులం పేరుతో దూషించడంతోపాటు దాడికి దిగారని తెలిపారు. దీనిపై తాను దోర్నాల పోలీసు స్టేషనులో ఫిర్యాదు చేసినట్లు తెలిపారు. ఆదర్శంగా నిలవాల్సిన గురువులు కొట్లాటకు దిగడం చర్చనీయాంశమైంది.