చంద్రయాన్‌ 3 ప్రయోగాన్ని కళ్లకు కట్టేలా గణేష్ మండపాలు

ప్రతీ ఏటా గణేష్ నవరాత్రోత్సవాలు జరిగినా అప్పటి ట్రెండ్‌కు తగ్గట్లు వినాయకుడిని తయారు చేయడం మన దేశంలో ఒక సాంప్రదాయంగా వస్తుంది. ఆ ఏడాది ఏదైతే ప్రజలను బాగా ఆకర్షిస్తుందో దానికి అనుగుణంగా గణనాథుడి విగ్రహాలను రూపొందిస్తారు. బాగా పాపులర్ అయిన సినిమా హీరోల వేషాలకు సంబంధించిన విగ్రహాలు, క్రికెటర్లు, ఇతర సెలబ్రిటీలను పోలినట్లు ఉండే విగ్రహాలను ఆయా సంవత్సరాల్లో ఉండే ట్రెండ్‌ను బట్టి విగ్రహాల తయారీ దారులు వాటిని రూపొందిస్తూ ఉంటారు. అయితే ఈసారి చంద్రయాన్ 3 ప్రయోగం దేశవ్యాప్తంగానే కాకుండా ప్రపంచ వ్యాప్తంగా బాగా పాపులర్ అయింది. అయితే విగ్రహాల తయారీ దారులు, వినాయక మండపాలు వేసే వారు దీన్నే ట్రెండ్‌గా భావించి వారి వారి పనులు చేశారు.

అయితే చంద్రయాన్ 3 ప్రయోగాన్ని పూర్తిగా కళ్లకు కట్టే విధంగా ఒక వినాయకుడి మండపంలో ఏర్పాటు చేసిన సెట్టింగ్ ప్రస్తుతం అందర్నీ బాగా ఆకర్షిస్తోంది. చంద్రయాన్ 3 ప్రయోగం భూమి మీది నుంచి అంతరిక్షంలోకి దూసుకెళ్లింది మొదలు అది చంద్రుడిని చేరుకుని దాని నుంచి విక్రమ్ ల్యాండర్ విడిపోవడం.. అది సేఫ్‌గా జాబిల్లిపై దిగడం.. అందులో నుంచి ప్రజ్ఞాన్ రోవర్ బయటికి రావడం వంటి ప్రతీ ఒక్క దృశ్యాన్ని ఆ గణేష్ మండపంలో ఏర్పాటు చేశారు. దీనికి సంబంధించిన వీడియోలు ప్రస్తుతం సోషల్ మీడియాలో తెగ వైరల్‌గా మారాయి.

అయితే ఇలాంటి వినాయక మండపాలను కోల్‌కతా, చెన్నై వంటి నగరాల్లో ఏర్పాటు చేశారు. చంద్రయాన్ 3 ప్రయోగం నమూనాతో రూపొందించిన ఈ గణేష్ మండపాలు.. చూపరులను ఎంతగానో ఆకట్టుకుంటున్నాయి. మండపంలో ఏర్పాటు చేసిన గణేష్ విగ్రహం వెనుక భాగంలో ఒక వైపు చంద్రయాన్‌ 3 కి సంబంధించిన రాకెట్‌ అంతరిక్షంలోకి దూసుకెళ్లగా.. మరోవైపు చంద్రయాన్‌ 3 నుంచి విడిపోయిన విక్రమ్‌ ల్యాండర్‌ చంద్రుడి దక్షిణ ధ్రువంపై సాఫ్ట్‌ ల్యాండింగ్ కావడం.. చివరగా అందులో నుంచి ప్రజ్ఞాన్‌ రోవర్‌ బయటికి వచ్చి చంద్రుడి ఉపరితలంపై దిగుతున్నట్లుగా ఉంది.

మరోవైపు.. చంద్రయాన్ 3 ప్రయోగంలో భాగంగా చంద్రుడిపైకి వెళ్లిన విక్రమ్ ల్యాండర్, ప్రజ్ఞాన్ రోవర్ ప్రస్తుతం స్లీప్ మోడ్‌లో ఉన్నాయి. చంద్రుడిపై రాత్రి కావడంతో సెప్టెంబర్ 2 వ తేదీన నిద్రావస్థలోకి ఇస్రో పంపించింది. అయితే ప్రస్తుతం మళ్లీ సూర్యోదయం కావడంతో వాటిని స్లీప్ మోడ్ నుంచి బయటికి తీసుకువచ్చి మళ్లీ యాక్టివేట్ చేయాలని ఇస్రో ప్రయత్నాలు చేస్తోంది. ఇప్పటివరకు అయితే ల్యాండర్ రోవర్ నుంచి ఎలాంటి సిగ్నల్స్ అందలేదని ఇస్రో ప్రకటించింది.