భారత్ కెనడా ఘర్షణలో అమెరికా వైఖరి ఏంటి,,,,అమెరికా మాజీ ఉన్నతాధికారి కీలక వ్యాఖ్యలు

భారత్, కెనడాల మధ్య ప్రస్తుతం నెలకొన్న సంబంధాలు తీవ్ర ఉద్రిక్తతలకు దారి తీస్తున్నాయి. ఈ నేపథ్యంలోనే ఈ సమస్య ఇప్పుడు వివిధ దేశాల వరకు వెళ్తోంది. అయితే అంతర్జాతీయంగా భారత్‌తో అన్ని దేశాలు చాలా మంచి సంబంధాలను కలిగి ఉన్నాయి. కానీ అమెరికాకు రెండు దేశాలు మిత్ర దేశాలు కావడంతో ఆ దేశం ఎటు వైపు మొగ్గు చూపుతుందోనని ప్రపంచ దేశాలు ఆసక్తిగా ఎదురు చూస్తున్నాయి. ఈ నేపథ్యంలోనే పెంటగాన్ మాజీ ఉన్నతాధికారి కీలక వ్యాఖ్యలు చేశారు. ప్రస్తుతం భారత్ కెనడాల మధ్య నెలకొన్న ఉద్రిక్తతల వేళ.. అమెరికా ఏ వైపు ఉండొచ్చు అన్నదానిపై స్పందించారు. మరోవైపు.. కెనడా ప్రధాని వరుసగా భారత్‌ను ఉద్దేశించి సంచలన వ్యాఖ్యలు చేస్తూనే ఉన్నారు.

తాజాగా భారత్, కెనడాల మధ్య తలెత్తిన వివాదంపై పెంటాగన్‌ మాజీ అధికారి మైఖెల్ రూబిన్‌ స్పందించారు. అమెరికాకు అటు కెనడా.. ఇటు భారత్ రెండు మిత్ర దేశాలు అని ఆయన వ్యాఖ్యానించారు. ఈ నేపథ్యంలోనే ఈ రెండు దేశాల విషయంలో అమెరికా ఒక దేశానికి మద్దతుగా ఉంటుందని తాను అనుకోవడం లేదని మైఖెల్ రూబిన్ స్పష్టం చేశారు. ఇక తప్పనిసరి పరిస్థితుల్లో ఏదో ఒక దేశానికి మద్దతు పలకాల్సి వస్తే అది భారత్‌ వైపే ఉండే అవకాశాలు ఎక్కువగా ఉన్నాయని తెలిపారు. ఎందుకంటే అమెరికాకు భారత్ చాలా ముఖ్యమైన దేశమని.. ఇరు దేశాల మధ్య బంధం చాలా బలమైందని పేర్కొన్నారు. మరోవైపు.. హర్దీప్ సింగ్ నిజ్జర్‌ అనే వ్యక్తి ఒక ఉగ్రవాది అని.. ఆయన కోసం కెనడాకు మద్దతు తెలిపి అమెరికా ఇరకాటంలో పడక పోవచ్చని మైఖెల్ రూబిన్ వెల్లడించారు.

ఈ సందర్భంగా కెనడా ప్రధాని జస్టిన్ ట్రూడోపై సంచలన ఆరోపణలు మైఖెల్ రూబిన్ చేశారు. ప్రధాని పదవిలో జస్టిన్ ట్రూడో ఎక్కువ కాలం కొనసాగకపోవచ్చని ఆయన అనుమానం వ్యక్తం చేశారు. ఒక వేళ అలా జరిగితే ఆయన పదవి నుంచి దిగిపోయిన తర్వాత కెనడాతో అమెరికా బంధాన్ని పునర్నిర్మించుకుంటుందని అమెరికా వ్యవహారశైలి గురించి వెల్లడించారు. ఇక భారత్, కెనడాల మధ్య జరుగుతున్న ఈ వివాదంలో అమెరికా బహిరంగంగా జోక్యం చేసుకుంటుందా అనే ప్రశ్నకు కూడా మైఖెల్ రూబిన్ సమాధానం ఇచ్చారు. నిజంగా చెప్పాలంటే.. ప్రస్తుతం జరుగుతున్న ఘర్షణతో భారత్‌ కంటే కెనడాకే ఎక్కువ ప్రమాదమని ఆయన అంచనా వేశారు. ఒక వేళ కెనడా భారత్‌తో ఘర్షణ కోరుకుంటే.. అది ఏనుగుతో చీమ పోరాడినట్లే ఉంటుందని వ్యాఖ్యానించారు. ప్రపంచంలోనే భారత్‌ అతిపెద్ద ప్రజాస్వామ్య దేశమని.. చైనాను ఎదుర్కొనే విషయంలో భారత్‌తో అమెరికాకు వ్యూహాత్మకంగా చాలా ముఖ్యమైన బంధమని మైఖెల్ రూబిన్ స్పష్టం చేశారు. కెనడాలో ఉన్న ఖలిస్థానీ ఉగ్రవాది హర్దీప్ సింగ్ నిజ్జర్ హత్య తర్వాత ఆ దేశ పార్లమెంటులో కెనడా ప్రధాని జస్టిన్ ట్రూడో భారత్‌పై సంచలన ఆరోపణలు చేశారు. ఆ తర్వాత కూడా ఆ వ్యాఖ్యలకు కొనసాగింపుగా జస్టిన్‌ ట్రూడో చేస్తున్న వ్యాఖ్యలతో రెండు దేశాల మధ్య సంబంధాలు మరింత దిగజారుతున్నాయి.