ఆరు నెలల చిన్నారిని కరిచిన ఎలుకలు.. ఒంటిపై 50 గాయాలతో చావు అంచుల్లోకి

ఇంట్లో చిన్న పిల్లలు ఉంటే.. ఆ కుటుంబ సభ్యులు ఎంతో అల్లారుముద్దుగా చూసుకుంటారు. వారు ఇలా ఏడిస్తే అలా ఏదో ఒకటి చేసి వారిని సముదాయించే పనిలో పడతారు. అయితే తాజాగా జరిగిన ఓ ఘటనలో కుటుంబ సభ్యులు పట్టించుకోకపోవడంతో ఆరు నెలల వయసు ఉన్న ఓ పసికందు చావు అంచుల వరకు వెళ్లొచ్చాడు. ఆ చిన్నారిని ఇంట్లో ఉన్న ఎలుకలు కరిచి తీవ్ర గాయాలు చేశాయి. ఒంటి నిండా రక్తం, 50 కి పైగా గాయాలు ఉండటంతో.. ఈ విషయం తెలుసుకుని ఆ ఇంటికి వెళ్లిన పోలీసులు షాక్ అయ్యారు. వెంటనే ఆస్పత్రికి తరలించి అత్యవసర చికిత్స అందించి చిన్నారిని కాపాడారు. దీంతో ఈ ఘటనకు కారణమైన చిన్నారి తల్లిదండ్రులు, కుటుంబ సభ్యులను అరెస్ట్ చేశారు. ఈ సంఘటన అమెరికాలో జరిగింది.

అమెరికాలోని ఇండియానాలో జరిగిన ఈ సంఘటన తీవ్ర చర్చనీయాంశంగా మారింది. ఊయలలో ఉన్న 6 నెలల చిన్నారిని ఎలుకలు తీవ్రంగా కరిచాయి. డేవిడ్, ఏంజెల్ స్కోనాబామ్ దంపతులకు పుట్టిన మగ శిశువును ఎలుకలు కొరకడంతో ప్రాణాలు కోల్పోవాల్సిన పరిస్థితి వచ్చింది. ఈ ఘటన సెప్టెంబర్ 13 వ తేదీన జరిగింది. డేవిడ్, ఏంజెల్ స్కోనాబామ్ దంపతులు.. వారి ముగ్గురు పిల్లలు.. వారి బంధువు ఆమె పిల్లలు కూడా నివసిస్తున్నారు. అయితే చిన్నారికి ఎలుకలు కరిచి తీవ్ర గాయాలు అయినట్లు ఆ బాలుడి తండ్రి పోలీసులకు ఫిర్యాదు చేయడంతో ఎవాన్స్‌విల్లే పోలీసులు రంగంలోకి దిగారు. రక్తపు గాయాలతో ఉన్న బాలుడిని చూసి వెంటనే హాస్పిటల్‌కు తరలించి చికిత్స అందించారు.

చిన్నారికి బాగా రక్తం పోవడంతో డాక్టర్లు రక్తం ఎక్కించి చికిత్స అందించారు. అనంతరం కోలుకోవడంతో అతడిని చిన్న పిల్లల సంరక్షణ కేంద్రానికి పంపించారు. ఈ ఘటనకు కారణమైన బాలుడి తల్లిదండ్రులు, అత్తలను అరెస్ట్ చేసి జైలుకు తరలించారు. చిన్నారి కుడి చేతి వేళ్లు మొత్తం తీవ్రంగా దెబ్బతిన్నాయని డాక్టర్లు తెలిపారు. ఐదు వేళ్లకు ఉన్న మాంసాన్ని ఎలుకలు తినేసాయని.. సగం వరకు వేళ్లకు మాంసం లేదని చెప్పారు.

బాలుడి ఊయలలో అంతా చిందరవందరగా ఉందని.. చెత్త, ఎలుకల మలంతో నిండి ఉందని పోలీసులు వెల్లడించారు. అయితే వారి ఇంట్లో ఉన్న మిగితా పిల్లలపైనా గతంలో కూడా ఎలుకలు దాడి చేశాయని వారు తెలిపారు. సెప్టెంబరు 1 వ తేదీన తాము నిద్రిస్తున్నపుడు కాళ్లను కొరికాయని.. ఆ ఇంట్లో ఉండే మరో ఇద్దరు పిల్లలు కూడా తమ స్కూల్ టీచర్‌తో చెప్పారు. దీంతో ఆ ఇంటిని ఇండియానా డిపార్ట్‌మెంట్ ఆఫ్ చైల్డ్ సర్వీసెస్ తనిఖీ చేసింది. అయితే తమ ఇంట్లో ఎలుకలు ఎక్కువగా లేవని తెలిపింది. అక్కడే ఉన్న మరో చిన్నారి ఒంటిపై గాయం ఉండగా.. అది ఎలుకల వల్ల జరిగింది కాదని ఏంజెల్ స్కోనాబామ్ బుకాయించే ప్రయత్నం చేసింది.

ఇండియానా డిపార్ట్‌మెంట్ ఆఫ్ చైల్డ్ సర్వీసెస్ ఇచ్చిన నివేదికతో కోర్టు కీలక ఉత్తర్వులు వెలువరించింది. ఆ ఇంట్లో ఉన్న చిన్నపిల్లలకు రక్షణ లేదని ఈ నేపథ్యంలోనే వారి సంరక్షణ బాధ్యతలను డేవిడ్, ఏంజెల్ స్కోనాబామ్‌ దంపతుల నుంచి తీసేసుకున్నారు. ఈ నేపథ్యంలోనే బాధిత బాలుడి తండ్రి డేవిడ్‌కు ఎలాంటి జరిమానా లేకుండా జైలు శిక్ష విధించింది. ఇక అతని భార్య, బాధితుడి తల్లి ఏంజెల్ స్కోనాబామ్‌కు రూ. 8.5 లక్షల ఫైన్‌తోపాటు జైలు శిక్ష వేసింది. బాధితుడి అత్తకు రూ.2 లక్షల జరిమానాతోపాటు జైలు శిక్ష వేసింది.