70 ఏళ్ల బామ్మతో 35 ఏళ్ల యువకుడి ప్రేమ,,,పెళ్లి చేసుకున్న జంట

పాకిస్థాన్‌కు చెందిన నయీమ్ షాజాద్ అనే 35 ఏళ్ల యువకుడికి.. కెనడాకు చెందిన 70 ఏళ్ల మేరీ వృద్ధురాలు.. 2012 లో ఫేస్‌బుక్‌లో పరిచయం అయ్యారు. అయితే మొదట మామూలు ఫ్రెండ్‌ షిప్‌గానే ఉన్నా.. ఆ పరిచయం కాస్త ప్రేమగా మారింది. 2015 లో నయీమ్ షాజాద్‌ను ప్రేమిస్తున్నట్లు తన మనసులోని మాటను మేరీ బయటపెట్టింది. దీంతో ఆ ప్రపోజల్‌ను నయీమ్ షాజాద్ అంగీకరించడంతో ఇద్దరూ ప్రేమ బంధంలోకి వెళ్లారు. ఆ తర్వాత కొన్ని రోజులకు 2017 లో మేరీ, నయీమ్ షాజాద్ పెళ్లి కూడా చేసుకున్నారు. అయితే అప్పటి నుంచి వారు అన్యోన్యంగా తమ సంసార జీవితాన్ని సాగిస్తూ ఉన్నారు. అయితే పెళ్లి తర్వాత వారికి వీసా సమస్యలు తలెత్తడంతో వారిద్దరూ కెనడాలో కలిసి జీవించలేకపోయారు. ఈ నేపథ్యంలోనే ఇటీవల పాకిస్తాన్‌కు వచ్చిన మేరీ.. నయీమ్ షాజాద్ వద్ద 6 నెలల పాటు ఉన్నట్లు తెలిపారు.

అయితే వీరిద్దరి పెళ్లిపై కొంతమంది స్థానికులతో పాటు నెటిజన్లు తీవ్ర విమర్శలు చేస్తున్నారు. డబ్బు, కెనడా పౌరసత్వం కోసమే 70 ఏళ్ల మేరీని 35 ఏళ్ల నయీమ్ షాజాద్ పెళ్లి చేసుకున్నాడని ఆరోపిస్తున్నారు. కేవలం తన అవసరాల కోసమే వివాహం చేసుకున్నాడని మండిపడుతున్నారు. అయితే ఇలా వస్తున్న ఆరోపణలను మేరీ-నయీమ్ జంట ఖండించింది. తాము ప్రేమించి పెళ్లి చేసుకున్నామని.. తమ మధ్య వయసు సమస్య ఎప్పుడూ రాలేదని చెబుతున్నారు. అయితే తన వద్ద ఉన్న డబ్బుతో ఆర్థికంగా నయీమ్‌ను మేరీ ఆదుకుందని.. క్లిష్టమైన పరిస్థితుల్లో మానసికంగా ధైర్యం కూడా చెప్పిందని.. అదే వారి మధ్య పెళ్లికి దారి తీసిందని పేర్కొన్నారు. అయితే మేరీ కూడా ధనవంతురాలేమీ కాదని.. ఆమెకు వచ్చే పెన్షన్‌తో బతుకుతోందని నయీమ్ వెల్లడించాడు. ఎవరో ఏవో విమర్శలు చేస్తే వాటిని తాను పట్టించుకోనని చెప్పాడు.