ఏపీలో కొనసాగుతున్న వర్షాలు,,,భారీ నుంచి మోస్తరుగా వానలు

ఏపీలో వర్షాలు కొనసాగుతున్నాయి. రుతుపవనాల ప్రభావంతో పాటుగా బంగాళాఖాతంలో ద్రోణుల కారణంగా వానలు కురుస్తున్నాయంటున్నారు. ఈ ప్రభావంతో నేడు అల్లూరి సీతారామరాజు జిల్లా, బాపట్ల జిల్లా, తూర్పుగోదావరి జిల్లా, గుంటూరు జిల్లా, కృష్ణా జిల్లా, ఎన్టీఆర్ జిల్లా, పల్నాడు జిల్లా, పార్వతీపురం మన్యం జిల్లా, పశ్చిమ గోదావరి జిల్లాల్లో భారీ వర్షాలు కురుస్తాయని అంచనా వేస్తున్నారు. పార్వతీపురం మన్యం, అనకాపల్లి, కాకినాడ, ఏలూరు, అన్నమయ్య, చిత్తూరు, తిరుపతి జిల్లాల్లో అక్కడక్కడ తేలికపాటి నుంచి మోస్తరు వర్షాలు కురిసే అవకాశం ఉంది. అలాగే శ్రీకాకుళం, విజయనగరం, విశాఖపట్నం, డాక్టర్ బీఆర్ అంబేద్కర్ కోనసీమ, గుంటూరు, బాపట్ల, ప్రకాశం, నెల్లూరు, కర్నూలు, నంద్యాల, అనంతపురం, సత్యసాయి, కడప జిల్లాల్లో అక్కడక్కడ తేలికపాటి వర్షం పడే అవకాశం ఉంది అంటున్నారు. ప్రజలు తగిన జాగ్రత్తలు తీసుకోవాలని ఏపీ విపత్తుల సంస్థ తెలిపింది.

సెప్టెంబరు 29 నాటికి ఉత్తర అండమాన్ సముద్రం, దాని పరిసరాల్లో ఆవర్తనం ఏర్పడే అవకాశం ఉందని అంచనా వేస్తున్నారు. ఈ ప్రభావంతో వచ్చే 24 గంటల్లో ఉత్తర అండమాన్, దానిని ఆనుకుని ఉన్న తూర్పు మధ్య బంగాళాఖాతంలో అల్పపీడనం ఏర్పడే అవకాశం ఉంది. ఆ తర్వాత, ఇది క్రమంగా బలపడి పశ్చిమ-వాయువ్య దిశగా కదిలే అవకాశం ఉంది అంటున్నారు. ఈ ప్రభావంతో శనివారం (30 సెప్టెంబర్ 2023) ఆంధ్రప్రదేశ్ కొన్ని ప్రాంతాల్లో భారీ వర్షాలు కురుస్తాయి అంటున్నారు. మరోవైపు కడప జిల్లా జమ్మలమడుగులో 62.4 మిల్లీ మీటర్లు, కడప జిల్లా కొండాపురంలో 57.2, చిత్తూరు జిల్లా పాలసముద్రంలో 45.4, విజయనగరంలో 40.8, కర్నూలు జిల్లా ఆలూరులో 39.4, విజయనగరం జిల్లా డెంకాడలో 38.8, నంద్యాల జిల్లా డోన్‌లో 32.8, అనంతపురం జిల్లా తాడిపత్రిలో 32.4, తిరుపతిలో గూడూరులో 31.4, కర్నూలు జిల్లా పత్తికొండలో 30.2, పార్వతీపురం మన్యం జిల్లా బాలాజీపేటలలో 31.2, కాకినాడ జిల్లా తునిలో 30.2, విజయనగరం జిల్లా గంట్యాడలో 30 మిల్లీ మీటర్ల వర్షపాతం నమోదైంది.

రాజమహేంద్రవరంలో మంగళవారం రాత్రి భారీ వర్షం పడింది. దాదాపు అరగంటపైగా వాన కురిసింది. నగరంలోని చాలా చోట్ల రోడ్లపై నీళ్లు చేరాయి. డ్రైనేజీలు పొంగి ముంపు, మురుగునీరు రోడ్లపైకి చేరింది.. లోతట్టు ప్రాంతాలు నీట మునిగాయి. అంతేకాదు మంగళవారం రాయలసీమ, కోస్తాలోని పలు జిల్లాల్లో భారీ వర్షాలు పడ్డాయి. మిగిలిన జిల్లాల్లో తేలికపాటి నుంచి మోస్తరు జల్లులు కురిశాయి. మరో రెండు రోజుల్లో బంగాళాఖాతంలో అల్పపీడనం ఏర్పడతుందనే అంచనాతో.. మళ్లీ వానలు ఊపందుకుంటాయని అంచనా వేస్తున్నారు.