పాకిస్థాన్‌లో భారీ బాంబు పేలుడు,,,50 మందికిపైగా మృతి, 130 మందికిపైగా గాయాలు

బాంబు పేలుడుతో పాకిస్థాన్ మరోసారి దద్దలిల్లిపోయింది. మిలాద్ ఉన్ నబీ వేళ భారీ బాంబు పేలుడు జరిగింది. ఆ ఘోర దుర్ఘటనలో 50 మందికిపైగా దుర్మరణం చెందగా.. మరో 130 మందికి పైగా గాయాల పాలయ్యారు. వారిలో పలువురి పరిస్థితి విషమంగా ఉన్నట్లు తెలుస్తోంది. పండగ వేళ మసీదు వద్ద జరిగిన ఈ భారీ బాంబు పేలుడుతో భారీగా ప్రాణ నష్టం చెలరేగినట్లు పాకిస్థాన్ మీడియా వెల్లడించింది. చనిపోయిన వారిలో ఓ పోలీస్ ఉన్నతాధికారి కూడా ఉన్నట్లు తెలుస్తోంది.

మిలాద్ ఉన్ నబీ పండుగ, శుక్రవారం సందర్భంగా బలూచిస్థాన్‌ ప్రావిన్స్‌లోని మస్తుంగ్ జిల్లాలో ఉన్న ఓ మసీదు వద్ద మధ్యాహ్నం భారీ ర్యాలీ నిర్వహించారు. ఈ ర్యాలీకి పెద్ద ఎత్తున జనం రావడంతో ఆ సమయంలోనే శక్తివంతమైన బాంబు పేలినట్లు ప్రత్యక్ష సాక్ష్యులు వెల్లడించారు. అయితే ఇది ఆత్మాహుతి దాడి అని పోలీసులు, అధికారులు అనుమానం వ్యక్తం చేస్తున్నారు. పోలీసులు, వైద్య సిబ్బంది, ఇతర అధికారులు, స్థానికులు సహాయక చర్యల్లో పాల్గొన్నారు. మృతదేహాలను గుర్తించడం, గాయపడిన వారిని దగ్గర్లోని ఆస్పత్రికి తరలించడం చేపట్టారు. మిలాద్ ఉన్ నబీ ర్యాలీకి భారీగా జనం రావడంతో మృతుల సంఖ్య మరింత పెరిగే అవకాశం ఉందని అధికార వర్గాలు తీవ్ర ఆందోళన వ్యక్తం చేస్తున్నాయి.

అయితే ఈ మిలాద్ ఉన్ నబీ ర్యాలీ సందర్భంగా అక్కడ డ్యూటీలో ఉన్న డీఎస్పీ నవాజ్ గాష్కోరీ కూడా బాంబు పేలుడులో దుర్మరణం పాలైనట్లు తెలిపారు. డీఎస్పీ ఉన్న కారు వద్దే ఆ బాంబు పేలుడు జరిగినట్లు చెబుతున్నారు. సంఘటనా స్థలాన్ని పరిశీలించిన అధికారులు ప్రాథమికంగా అది ఆత్మాహుతి దాడి అని నిర్ధారించారు. ఓ సూసైడ్‌ బాంబర్‌ డీఎస్పీ కారు పక్కనే నిలబడి తనను తాను పేల్చేసుకున్నట్లు పోలీసులు అనుమానిస్తున్నారు. అయితే ఈ ఘటన ఎలా జరిగింది అనేది మాత్రం ఇంకా వెల్లడి కాలేదు. అటు.. ఈ దాడికి తామే కారణం అని ఏ ఉగ్రవాద సంస్థ కూడా ఇప్పటివరకు ప్రకటన విడుదల చేయలేదు.