లైవ్ టీవీ డిబేట్‌లో తన్నుకున్న పాకిస్థాన్ నేతలు.. వీడియోలు వైరల్

ప్రస్తుతం పాక్ పరిస్థితి రోజు రోజుకూ అధ్వాన్నంగా తయారవుతోంది. రాజకీయంగా, ఆర్థికంగా, దేశంలో అంతర్గత పరిస్థితులు, బాంబు పేలుళ్లతో దినదిన గండంగా కాలం గడుస్తోంది. ఈ క్రమంలో పరిస్థితిని చక్కదిద్దాల్సిన రాజకీయ నాయకులు తమ అధికారం కోసం పాకులాడుతూనే ఉన్నారు. ఈ క్రమంలోనే ఓ టీవీ ఛానల్ లైవ్‌లో ఇద్దరు పాక్ నేతలు తన్నుకున్న సంఘటన ప్రస్తుతం తీవ్ర చర్చనీయాంశంగా మారింది. ఒకరి జుట్టు మరొకరు పట్టుకొని కొట్టుకున్నారు. అంతటితో ఆగకుండా కిందపడి మరీ ఒకరిపై ఒకరు దాడి చేసుకున్నారు. దీనికి సంబంధించిన దృశ్యాలు సోషల్ మీడియాలో ప్రస్తుతం తెగ వైరల్‌ అవుతున్నాయి.

పాకిస్థాన్ మాజీ ప్రధాని ఇమ్రాన్‌ ఖాన్‌కు చెందిన పాకిస్థాన్‌ తెహ్రీక్‌-ఇ-ఇన్సాఫ్‌(పీటీఐ) పార్టీకి చెందిన నేత, లాయర్ షేర్‌ అజ్వాల్‌ మార్వాత్‌ ఒక ప్రైవేట్ టీవీ ఛానల్ డిబేట్‌కు హాజరయ్యారు. అదే డిబేట్‌లో పాక్ మాజీ ప్రధాని నవాజ్ షరీఫ్‌కు చెందిన పాకిస్థాన్‌ ముస్లిం లీగ్‌-నవాజ్‌ పార్టీ సెనేటర్‌ అఫ్ననుల్లా ఖాన్‌ కూడా పాల్గొన్నారు. అయితే ప్రస్తుతం పాకిస్థాన్‌లో జరుగుతున్న పరిణామాలు, ఇమ్రాన్‌ఖాన్ అరెస్ట్ సహా వివిధ అంశాలపై అధికార, విపక్షాలకు చెందిన నేతల మధ్య చర్చ జరిగింది. అయితే ఈ చర్చ సందర్భంగా ఇరువురు నేతలు ముందు తమ నోటికి పనిచెప్పారు.

ఆ తర్వాత పరిస్థితి మరింత తీవ్రం కావడంతో అది కాస్త తన్నుకునే వరకు వెళ్లింది. పీటీఐ పార్టీకి వ్యతిరేకంగా నవాజ్ పార్టీకి చెందిన సెనెటర్ తీవ్ర అభ్యంతరకర వ్యాఖ్యలు చేశారు. దీంతో కోపంతో ఊగిపోయిన లాయర్ షేర్‌ అజ్వాల్‌ మార్వాత్‌.. ఒక్కసారిగా తాను కూర్చున్న సీట్‌లో నుంచి లేచి అఫ్ననుల్లా ఖాన్‌ను కొట్టారు. వెంటనే స్పందించిన అఫ్ననుల్లా ఖాన్‌.. మార్వాత్‌పై దాడి చేశాడు. అక్కడి నుంచి మరింత ఘర్షణ నెలకొనగా.. ఒకరి కాలర్ మరొకరు పట్టుకుని.. ఒకరి జుట్టు మరొకరు పట్టుకుని ఇష్టం వచ్చినట్లు తన్నుకున్నారు. అంతటితో ఆగకుండా కిందపడి దొర్లుతూ మరీ తీవ్ర స్థాయిలో కొట్టుకున్నారు. చివరికి ఆ షో యాంకర్‌, ఛానల్‌లోని ఇతర సిబ్బంది వారిని విడిపించారు.

ఈ ఘటన మొత్తం లైవ్ టీవీలో ప్రత్యక్ష ప్రసారం అయింది. దీంతో ఆ ఘటనకు సంబంధించిన వీడియోలను సోషల్ మీడియాలో పోస్ట్ చేసి నెటిజన్లు ఆడేసుకుంటున్నారు. ఇప్పటికే పాకిస్థాన్ ఆర్థిక, రాజకీయ, సామాజికంగా తీవ్ర ఇబ్బందుల్లో ఉండగా.. వాటిని పరిష్కరించేందుకు అవసరమైన చర్చలు చేయాల్సింది పోయి రాజకీయ నేతలే తన్నుకుంటే ఇక ప్రజలు ఏం చేయాలని కామెంట్ల వర్షం కురిపిస్తున్నారు.