బాధితురాలికి నా చొక్కా ఇచ్చా.. నేను నిందితుడ్ని కాదు: ఉజ్జయిని అత్యాచార కేసులో అరెస్టయిన ఆటోడ్రైవర్‌

మధ్యప్రదేశ్‌లోని ఉజ్జయినిలో జరిగిన బాలిక అత్యాచార ఘటన యావత్తు దేశాన్ని తీవ్ర దిగ్భ్రాంతికి గురిచేసింది. అత్యాచారం జరిగిన తర్వాత బాధితురాలు వీధుల్లో నగ్నంగా తిరుగుతూ సాయం కోసం అర్ధించినా ఏ ఒక్కరూ ముందుకు రాలేదు. మానవత్వం మంటగలిసిన ఈ ఘటనలో రాకేశ్ మాలవీయ అనే ఓ ఆటో డ్రైవర్‌ను పోలీసులు అదుపులోకి తీసుకున్న విషయం తెలిసిందే. అతడి ఆటోలో రక్తపు మరకలు కనిపించడంతో నిందితుడిగా భావించి అరెస్ట్ చేశారు. కానీ, ఆ ఆటో డ్రైవర్‌ నిందితుడి కాదని పోలీసుల విచారణ వెల్లడయ్యింది.

విచారణలో పలు విషయాలను పోలీసులకు తెలిపిన ఆటోడ్రైవర్.. నగ్నంగా ఉన్న బాధితురాలికి తన ఒంటిపై దుస్తులు ఇచ్చినట్టు చెప్పాడు. కానీ, ఆమెను ఆస్పత్రికి తీసుకెళ్లకుండా నడిరోడ్డుపై వదిలిపెట్టి తాను తప్పుచేశానని పశ్చాత్తాపం వ్యక్తం చేసినట్టు తెలిసింది. ‘నా ఖాకీ చొక్కా ఇచ్చాను.. బాలిక ఇంటికి వెళ్లేందుకు సాయం చేయమంది.. కానీ, నేను అలా చేయలేదు.. అందుకు నేను చాలా చింతిస్తున్నాను. నేను కూడా అయోమయంలో పడ్డాను. నేను మొదటిసారి ఇటువంటి పరిస్థితిలో ఎదుర్కొన్నాను.. ఎవరికి చెప్పాలో అర్థం కాలేదు’ అని ఆవేదన వ్యక్తం చేశాడు.

బాధితురాలి నగ్నంగా వీధుల్లో తిరుగుతూ పలువురిని సాయం కోరినా.. ఆమె దీన స్థితిని అర్థం చేసుకుని ఆదుకునేందుకు ఎవరూ ముందుకు రాలేదు. అయితే చిన్నారుల లైంగిక వేధింపుల నిరోధక చట్టాల ప్రకారం సాయానికి నిరాకరించడం కూడా నేరమేనని పోలీసులు చెబుతున్నారు. ఆటోడ్రైవర్ మాలవీయను అనుమానితుడిగా భావించి తొలుత పోలీసులు కస్టడీలోకి తీసుకున్నారు. నేరం జరిగిన వెంటనే ఘటన గురించి తెలియజేయడం, ఆస్పత్రికి తీసుకెళ్లడం చేయాల్సి ఉందని పోలీసులు తాజాగా పేర్కొన్నారు.

ఇక బాధిత బాలిక సాయం కోరినా ఉజ్జయినిలోని నివాసితులు ఆమెను ఛీత్కరించుకోవడంపై విమర్శలు వెల్లువెత్తుతున్నాయి. దాదాపు రెండు గంటలపాటు 500 ఇళ్లు, దాబాలు, టోల్ బూత్‌ల మీదుగా వెళ్లినా ఎవరూ సాయం చేయలేదు. ఇంటి బయట నిలబడిన ఓ వ్యక్తి.. ఆమె పట్ల పరుషంగా మాట్లాడిన వీడియో సీసీటీవీలో రికార్డయ్యింది. అయితే, చివరికి ఓ ఆలయ పూజారి ముందుకొచ్చి.. బాలికకు టవల్ కప్పి.. పోలీసులకు సమాచారం ఇచ్చాడు. అనంతరం ఆస్పత్రికి తరలించాడు.

అత్యాచారానికి పాల్పడిన ప్రధాన నిందితుడు సోనీని పోలీసులు అరెస్ట్ చేశారు. బాధితురాలు ప్రస్తుతం ఆస్పత్రిలో కోలుకుంటోంది. ఘటన జరిగిన వెంటనే మధ్యప్రదేశ్‌ పోలీసులు స్పందించి. వందల మందిని విచారించారు. దాదాపు 700 కెమెరాల్లో నిక్షిప్తమైన ఫుటేజీని విశ్లేషించారు. అనంతరం ప్రధాన నిందితుడి వివరాలను కనుగొన్నారు.