తల్లిదండ్రుల మధ్య కుదరని ఏకాభిప్రాయం.. చిన్నారికి పేరు పెట్టిన హైకోర్టు

పుట్టిన తమ పిల్లలకు అందమైన, అర్థవంతమైన, ప్రత్యేకమైన పేరు పెట్టాలని తల్లిదండ్రులు ఎంతో రిసెర్చ్‌ చేస్తుంటారు. ఏ పేరైతే బాగుంటుందో చాలా మంది సలహాలు తీసుకుంటారు. ఓ పేరును ఫైనల్ చేసి... నామకరణ మహోత్సవాన్ని నిర్వహించి ఘనంగా నిర్వహిస్తారు. ఇది ప్రతి తల్లిదండ్రుల కల. కానీ, జంటకు మాత్రం ఆ అదృష్టం దక్కలేదు. మూడేళ్లు వచ్చినా పాపకు పేరు పెట్టే విషయంలో ఏకాభిప్రాయం కుదరక.. చివరకు న్యాయస్థానం ఆ చిన్నారికి ఓ పేరును ఖరారుచేయాల్సి రావడం గమనార్హం. ఈ ఘటన కేరళలో చోటుచేసుకుంది.

కేరళకు చెందిన దంపతులకు మూడేళ్ల కిందట ఓ పాప పుట్టింది. అప్పటికే వారి మధ్య మనస్పర్థలు రావడంతో వేర్వేరుగా ఉంటున్నారు. దీంతో వారి పాపకు పేరు పెట్టే విషయంలోనూ వివాదం తలెత్తింది. ఇద్దరూ ఏకాభిప్రాయానికి రాకపోవడంతో చివరకు విషయం హైకోర్టుకు చేరింది. ఈ దంపతులకు 2020 ఫిబ్రవరిలో ఓ పాప పుట్టింది. అభిప్రాయబేధాలతో భార్యాభర్తలు వేర్వేరుగా ఉండగా.. ఆ పాప తల్లి వద్దే ఉంటోంది. చిన్నారికి జారీ చేసిన బర్త్ సర్టిఫికెట్‌లో పేరు లేకపోవడంతో.. ఓ పేరు నమోదు చేసేందుకు తల్లి ప్రయత్నించారు.

అయితే, పేరు నమోదుచేయాలంటే తల్లిదండ్రులిద్దరూ హాజరు కావాలని అధికారులు స్పష్టం చేశారు. దీంతో వివాదం మొదలైంది. భార్య ‘పుణ్య నాయర్’ అనే పేరు సూచిస్తే.. భర్త ‘పద్మ నాయర్’అనే పేరు పెట్టాలని పట్టుబట్టాడు. ఇరువురూ ఈ విషయంలో పట్టువీడకపోవడంతో పాప తల్లి కేరళ హైకోర్టును ఆశ్రయించారు. ఈ కేసు విచారణ చేపట్టిన జస్టిస్‌ బెచు కురియన్‌ థామస్‌ కోర్టు అధికార పరిధిని వినియోగించుకొని ఈ సమస్యను పరిష్కరించారు. తల్లి సూచించిన పేరుతోపాటు తండ్రి పేరునూ జత చేసి, పాపకు ఓ పేరు ఖరారు చేస్తూ తుది ఉత్తర్వులు జారీ చేశారు.

తల్లిదండ్రుల మధ్య వివాదాన్ని పరిష్కరించడానికి సమయం పడుతుందని, ఈలోగా పేరు లేకపోవడం పిల్లల ప్రయోజనాలకు అనుకూలంగా ఉండదని న్యాయమూర్తి వ్యాఖ్యానించారు. ‘కోర్టు అధికార పరిధిని అమలు చేయడంలో తల్లిదండ్రుల హక్కులు కాకుండా పిల్లల సంక్షేమమే ప్రధానమైంది.. పిల్లల కోసం పేరును ఎంపిక చేసే పనిని కోర్టు నిర్వహించాలి. పేరు విషయంలో పిల్లల సంక్షేమం, సాంస్కృతిక పరిగణనలు, తల్లిదండ్రుల ఆసక్తులు, సామాజిక నిబంధనలు వంటి అంశాలను కోర్టు పరిగణనలోకి తీసుకోవచ్చు.. పిల్లల శ్రేయస్సు అంతిమ లక్ష్యం. కోర్టు మొత్తం పరిస్థితులను పరిగణనలోకి తీసుకొని పేరును స్వీకరించాలి.. ఈ విషయంలో కోర్టు తన అధికార పరిధిని ఉపయోగించవలసి వచ్చింది’ అని వ్యాఖ్యలు చేశారు. పాపకు తల్లిదండ్రులు పేర్లు కలిసొచ్చేలా ‘పుణ్య బాలగంగాధరన్ నాయర్’ అనే పేరు పెట్టారు.