మాల్దీవులు ఎన్నికల్లో చైనా అనుకూల పార్టీ విజయం,,,,ఇక నుంచి పరిస్థితులు చైనాకు అనుకూలంగా మారే అవకాశం

మనకు చేరువగా.. హిందూ మహాసముద్ర జలాల్లో ఉండే దీవుల సముదాయమైన మాల్దీవుల్లో ప్రభుత్వం మారుతోంది. మాల్దీవులు అధ్యక్ష ఎన్నికల్లో ప్రస్తుతం అధికారంలో ఉన్న ఇబ్రహీం మహ్మద్ సోలిహ్‌ ఓడిపోగా.. ఆయన ప్రత్యర్థి మహ్మద్ ముయిజ్జూ విజయం సాధించారు. దీంతో భారత్‌కు ‘మాల్దీవుల’ తలనొప్పి మొదలయ్యే అవకాశం ఉంది. ఓ చిన్న ద్వీప దేశంలో.. ప్రభుత్వం మారితే మనకేంటి..? అక్కడ ఎవరు అధికారంలో ఉంటే మనకేం సంబంధం అనుకుంటున్నారా..? మాల్దీవులు చాలా చిన్న ద్వీప దేశమే కావచ్చు.. ఆ దేశ జనాభా కేవలం 5.2 లక్షలే కావచ్చు. కానీ హిందూ మహాసముద్రంలో.. భారత్‌కు కేవలం 2 వేల కి.మీ. దూరంలో.. వ్యూహాత్మక ప్రాంతంలో ఆ దేశం ఉంది. మాల్దీవులు మొదటి నుంచి భారత్‌కు నమ్మకమైన నేస్తం. దశాబ్దాలుగా ఈ దేశంపై భారత్ ప్రభావం ఎక్కువ. రక్షణ రంగం, వాణిజ్యంలో సాయం చేస్తూ.. మాల్దీవులపై భారత్ తన ప్రభావాన్ని కొనసాగిస్తూ వస్తోంది. మాల్దీవులపై భారత్ ప్రభావం ఎంతలా ఉంటుందంటే.. ఇక్కడి ఎన్నికలు భారత్ అనుకూల పార్టీ వర్సెస్ ప్రతికూల పార్టీ అనేలా మారాయి. 2018తోపాటు.. ఈసారి కూడా ఇలాగే ఎన్నికలు జరిగాయి.

1965లో మాల్దీవులు బ్రిటన్ నుంచి స్వతంత్రం ప్రకటించుకుంది. తొలినాళ్లలో మాల్దీవులను దేశంగా గుర్తించిన కొద్ది దేశాల్లో భారత్ ఒకటి.1988లో రాజీవ్ గాంధీ ప్రధాని ఉన్న సమయంలో.. ఆ దేశ అధ్యక్షుడైన మవూన్ అబ్దుల్ గయూమ్‌ను పదవి నుంచి తప్పించే కుట్రలను ఇండియన్ ఆర్మీ రంగంలోకి దిగి రాత్రికి రాత్రే భగ్నం చేసింది. 2008లో ఆ దేశం ప్రజాస్వామ్య విధానంలోకి మారేందుకు కూడా ఇండియా సహకరించింది. దీంతో మాల్దీవులు మొదటి నుంచి ‘ఇండియా ఫస్ట్’ విధానాన్ని అనుసరిస్తోంది. ఇప్పుడు అధ్యక్ష పదవి నుంచి దిగిపోనున్న సోలిహ్ సైతం భారత్‌‌కు గట్టి మద్దతుదారు. నవంబర్ 17 వరకూ ఆయనే ఆపద్ధర్మ అధ్యక్షుడిగా కొనసాగుతారు.

చైనా అంటే ఇష్టం..

త్వరలో మాల్దీవులు అధ్యక్షుడిగా పగ్గాలు చేపట్టనున్న ముయిజ్జూ చైనా అనుకూలుడు. ఆయన ప్రాతినిధ్యం వహిస్తోన్న ప్రొగ్రసివ్ పార్టీ ఆఫ్ మాల్దీవుస్‌కి చైనా అంటే వల్లమాలిన ప్రేమ. దీని అర్థమేంటో ప్రత్యేకంగా చెప్పాల్సిన అవసరం లేదుగా. మాల్దీవుల్లో ప్రభుత్వం మారనుండటంతో.. విదేశాంగ విధానంపై, ముఖ్యంగా భారత్‌తో సంబంధాలపై తీవ్ర ప్రభావం పడే అవకాశం ఉంది. గతంలో శ్రీలంక, నేపాల్ లాంటి దేశాల్లో చైనా అనుకూల ప్రభుత్వాలు కొలువుదీరినప్పుడు.. భారత్‌ పట్ల ఆ దేశాల వైఖరి ఎలా మారిందో గమనించిన వారికి ఇప్పుడు మాల్దీవుల పరిణామాలు తేలిగ్గా అర్థమవుతాయి.

2013-18 మధ్య మాల్దీవులు అధ్యక్షుడిగా పని చేసిన అబ్దుల్లా యెమిన్.. ముయిజ్జూకు మెంటార్ (గురువు). ఆయన హయాంలోనే భారత్‌-మాల్దీవుల సంబంధాలు దెబ్బతినడం మొదలైంది. యెమిన్.. భారత్‌కు బదులు చైనాకు ప్రాధాన్యం ఇచ్చాడు. యెమిన్ అధ్యక్షుడిగా ఉన్న సమయంలోనే మాల్దీవులు చైనా దగ్గర చేసిన అప్పులు 20 శాతం పెరిగాయి. యెమిన్ అధికారంలో ఉన్నప్పుడే మాల్దీవులు సైతం బెల్ట్ అండ్ రోడ్ ఇనిషియేటివ్‌ (బీఆర్ఐ)లో భాగమైంది. గతంలో మంత్రిగా పని చేసిన మయిజ్జూ.. తమ దేశం బీఆర్ఐలో చేరడంలో, చైనా నుంచి నిధులు రాబట్టడంలో కీలక పాత్ర పోషించాడు.

‘ఇండియా ఔట్’ ప్రచారం..

‘మా పార్టీ అధికారంలోకి వస్తే.. చైనాతో సంబంధాల విషయంలో నూతన అధ్యాయం మొదలవుతుంది’ అని గత ఏడాది చైనీస్ కమ్యూనిస్ట్ పార్టీతో సమావేశం సందర్భంగా ముయిజ్జూ వ్యాఖ్యానించాడు. దీన్ని బట్టి అతడు చైనాకి ఎంత అనుకూలుడో అర్థం చేసుకోవచ్చు. 2020లోనే ‘ఇండియా ఔట్’ అనే ప్రచారాన్ని ప్రొగ్రసివ్ పార్టీ ఆఫ్ మాల్దీవుస్ పార్టీ మొదలుపెట్టింది.

India Chinaసంబంధాలపై ప్రభావం..?

2018లో సొలిహ్ అధికారంలోకి వచ్చాక మాల్దీవుల్లో భారత్ ప్రాబల్యం పెరిగిందని త్వరలో ముయిజ్జూ ఆరోపిస్తున్నారు. మాల్దీవుల్లో భారత సైన్యం ఉండటాన్ని ఆయన ఖండిస్తూ వచ్చారు. కేవలం డాక్ యార్డ్ నిర్మాణం కోసమే భారత సైన్యం మాల్దీవుల్లో ఉందని సోలిహ్ వివరణ ఇచ్చారు. దీని వల్ల తమ దేశ సార్వభౌమత్వానికి ఎలాంటి భంగం వాటిల్లబోదని సోలిహ్ గతంలో భరోసా ఇచ్చారు. అయితే, తాను అధికారంలోకి వస్తే మాల్దీవుల నుంచి భారత బలగాలను తొలగిస్తానని.. తమ దేశ వాణిజ్య సంబంధాలను ‘బ్యాలెన్స్’ చేస్తానని ముయిజ్జూ హామీ ఇచ్చాడు. ఇప్పటి వరకూ వాణిజ్యం విషయంలో ఆ దేశ ప్రధాన భాగస్వామి భారత్. ముయిజ్జూ మాటలకు అర్థం.. సైనికపరంగా, వాణిజ్యం పరంగా భారత్‌ అనుకూల ధోరణితో ఉండబోమనే.

మరో శ్రీలంకలా మారుతుందా..?

చైనా అనుకూల పార్టీమాల్దీవుల్లో అధికారంలోకి రానుండటంతో.. ఇప్పుడు ఆ దేశం సైతం మరో శ్రీలంక మాదిరిగా మారే అవకాశం ఉందని భారత్ ఆందోళన చెందుతోంది. ఇక వ్యాపారం పరంగానూ భారత్‌కు పోటీగా చైనా సంస్థలను మాల్దీవుల కొత్త ప్రభుత్వం ప్రోత్సహించే అవకాశం ఉంది. హిందూ మహాసముద్రంలో ప్రాబల్యం పెంచుకుంటోన్న చైనాకు మాల్దీవుల నూతన ప్రభుత్వం ద్వారాలు తెరిస్తే.. అది మనకు ముప్పుగా పరిణమించే అవకాశం ఉంది. మన పెరట్లోకి శత్రువు చొచ్చుకొస్తున్నాడన్నమాట. ఈ పరిస్థితిని భారత్ ఎలా టాకిల్ చేస్తుందో చూడాలి.