అంగళ్లు కేసులో జోక్యానికి నో ,,,,ఏపీ ప్రభుత్వానికి సుప్రీం కోర్టులో చుక్కెదురు

ఆంధ్రప్రదేశ్ ప్రభుత్వానికి సుప్రీం కోర్టులో చుక్కెదురైంది. అంగళ్లు కేసులో టీడీపీ నేతలకు హైకోర్టు ఇచ్చిన బెయిల్‌ ఉత్తర్వులపై జోక్యం చేసుకునేందుకు దేశ అత్యున్నత న్యాయస్థానం నిరాకరించింది. రాష్ట్ర ప్రభుత్వం దాఖలు చేసిన ఆరు వేర్వేరు పిటిషన్లను సుప్రీంకోర్టు కొట్టివేసింది. ఈ కేసులో టీడీపీ నేతలకు హైకోర్టు ఇచ్చిన బెయిల్‌ను సమర్థించింది. పోలీసు అధికారులు గాయపడ్డారని, ఓ కానిస్టేబుల్ ఫిర్యాదుదారుగా ఉన్నారని ఏపీ ప్రభుత్వం తరఫు న్యాయవాది కోర్టుకు విన్నవించారు. హైకోర్టు ఇప్పటికే బెయిల్ ఇచ్చినందున జోక్యం చేసుకోమని సుప్రీం ధర్మాసనం చెప్పింది.

అలాగే ఈ పిటిషన్‌పై జస్టిస్‌ అనిరుద్ద బోస్‌, జస్టిస్‌ బేలా ఎం త్రివేది ధర్మాసనం పలు అనుమానాలు వ్యక్తం చేసింది. ఘటన జరిగిన నాలుగు రోజుల తర్వాత ఎఫ్‌ఐఆర్‌ నమోదు చేయడంపై అభ్యంతరం తెలిపింది. భద్రత కల్పించే పోలీసులే.. సాక్షులుగా ఎఫ్‌ఐఆర్‌ ఏంటని ధర్మాసనం ప్రశ్నించింది. పోలీసులే ఎఫ్‌ఐఆర్‌ నమోదు చేసి పోలీసులే సాక్షులుగా ఉంటారా అని ధర్మాసనం ప్రశ్నించింది. టీడీపీ అధినేత చంద్రబాబు ప్రాజెక్టుల పరిశీలన కార్యక్రమంలో భాగంగా అన్నమయ్య జిల్లా అంగళ్లు వెళ్లారు. ఆ సమయంలో జరిగిన ఘటనల తర్వాత టీడీపీ నేతలపై పోలీసులు కేసు నమోదు చేశారు. ఈ కేసులో టీడీపీ అధినేత చంద్రబాబును ఏ1గా చేర్చారు.. అయితే టీడీపీ నేతలు దేవినేని ఉమా మహేశ్వరరావు, చల్లా రామచంద్రారెడ్డి , నల్లారి కిషోర్‌ కుమర్‌ రెడ్డి, పులివర్తి నానిలకు ముందస్తు బెయిల్ కోసం ఏపీ హైకోర్టును ఆశ్రయించారు.

విచారణ తర్వాత హైకోర్టు టీడీపీ నేతలు ముందస్తు బెయిల్‌ మంజూరు చేసింది. అయితే హైకోర్టు ఉత్తర్వులను సవాలు చేస్తూ ఏపీ ప్రభుత్వం సుప్రీంకోర్టులో 6 వేర్వేరు పిటిషన్లు దాఖలు చేసింది. టీడీపీ నేతలు మంజూరు చేసిన బెయిల్‌ రద్దు చేయాలని రాష్ట్ర ప్రభుత్వం కోరింది. చల్లా బాబుకు వ్యతిరేకంగా నాలుగు పిటషన్లు రాష్ట్ర ప్రభుత్వం దాఖలు చేసింది. అయితే సుప్రీం కోర్టు కొట్టివేసింది.