ఒకేరోజు 1.70 లక్షల కేసులు క్లియర్,,,ట్రాఫిక్ చలాన్ల కోసం ఆదివారం లోక్ అదాలత్

రోడ్డెక్కితే చాలు ఎక్కడ ట్రాఫిక్ పోలీస్ కంటపడతామో ఏమో అని వాహనదారులు భయపడుతూ ఉంటారు. హెల్మెట్ లేదనో.. నెంబర్ ప్లేటు సరిగా లేదనో.. వెహికల్ సర్టిఫికేట్స్ లేవని ఎక్కడ చలాన్లు వేస్తారో అని తప్పించుకుని పోతూ ఉంటారు. అయితే కొంత మంది మాత్రం తమ వాహనంపై ఎన్ని చలాన్లు ఉన్నా వేలకు వేలు పేరుకుపోయినా వాటిని కట్టకుండా దర్జాగా రోడ్డు మీద ప్రయాణిస్తూ ఉంటారు. అయితే ట్రాఫిక్ పోలీసులకు పట్టుబడినప్పుడు మాత్రం అవన్నీ కట్టాల్సి ఉంటుంది. కానీ ఇప్పుడు పెండింగ్ చలాన్లను క్లియర్ చేసేందుకు ఏకంగా లోక్‌ అదాలత్‌నే నిర్వహిస్తున్నారు. అయితే ఇది మాత్రం మన దగ్గర కాదు. దేశ రాజధాని ఢిల్లీలో.

ట్రాఫిక్ నిబంధనలు ఉల్లంఘించి వాహనాలపై చలాన్లు వేసుకున్న కేసులను పరిష్కరించేందుకు ఢిల్లీ ట్రాఫిక్ పోలీసులు అక్టోబర్ 8 వ తేదీన (ఆదివారం) జాతీయ లోక్ అదాలత్‌ను నిర్వహిస్తున్నట్లు ప్రకటించారు. ఢిల్లీ పరిధిలో ఉన్నపుడు ఆ వాహనాలపై పడిన చలాన్లను ఈ లోక్ అదాలత్‌లో క్లియర్ చేసుకోవచ్చని తెలిపారు. ఇందులో కమర్షియల్, ప్రైవేట్ వాహనాలకు సంబంధించిన చలాన్లను చెల్లించవచ్చని ఢిల్లీ పోలీసులు తెలిపారు. ఈ లోక్ అదాలత్‌లో వాహనాలపై ఉన్న చలాన్ల రకాన్ని పరిశీలించి వాటిని రద్దు చేయడమో లేదా తగ్గించే అవకాశం ఉంటుంది.

అయితే ఢిల్లీలోని వివిధ కోర్టుల పరిధిలో ఈ లోక్ అదాలత్ నిర్వహించనున్నట్లు తెలిపారు. ద్వారకా, కర్కర్‌దూమా, పాటియాలా హౌస్, రోహిణి, రౌస్ అవెన్యూ, సాకేత్, తీస్ హజారీ వంటి కోర్టుల్లో అక్టోబర్ 8 వ తేదీ ఉదయం 10 గంటల నుంచి సాయంత్రం 4 గంటల వరకు ఈ లోక్ అదాలత్‌ జరగనున్నట్లు తెలిపారు. ఇందులో మొత్తం 170 లోక్ అదాలత్ బెంచ్‌లను ఏర్పాటు చేయనున్నారు. ఒక్కో లోక్ అదాలత్ బెంచ్ వెయ్యి వాహనాలపై ఉన్న చలాన్ల కేసులను పరిష్కారించేలా చర్యలు తీసుకుంటున్నారు. దీంతో ఆదివారం రోజు 1.7 లక్షల చలాన్లను పరిష్కరించాలని నిర్ణయించారు.

అయితే వీటికి కొన్ని షరతులు, నిబంధనలు ఉన్నట్లు ఢిల్లీ పోలీసులు తెలిపారు. 2023 జూన్ 30 వ తేదీ లోపు పెండింగ్‌‌లో నమోదైన చలాన్లను మాత్రమే ఈ లోక్ అదాలత్‌లో పరిష్కరించనున్నట్లు పేర్కొన్నారు. దీనికి సంబంధించి ట్విటర్‌లో ఢిల్లీ పోలీస్ ట్రాఫిక్ విభాగం తెలిపింది. అయితే పెండింగ్ చలాన్ ఉన్నవారు ఢిల్లీ ట్రాఫిక్ పోలీస్ వెబ్‌సైట్ నుంచి సంబంధిత పత్రాలను డౌన్‌లోడ్ చేసుకోవచ్చని సూచించారు. చలాన్ సెటిల్‌మెంట్ కోసం లోక్‌ అదాలత్‌కు వెళ్లేటపుడు స్లిప్‌ను తీసుకెళ్లాలని తెలిపారు.