బిహార్ బాటలోనే ఒడిశా కూడా,,,,ఓబీసీ గణన రిపోర్ట్ వెలువరించనున్న నవీన్ పట్నాయక్

బిహార్ ప్రభుత్వం ఇటీవలె కులగణనను విజయవంతంగా పూర్తి చేసి రిపోర్ట్‌ను విడుదల చేసింది. ఈ బాటలోనే ఒడిశాలో అధికారంలో ఉన్న నవీన్ పట్నాయక్ కూడా కులగణనను నిర్వహించారు. అయితే ఒడిశాలో అన్ని కులాల వారీగా లెక్కలు తీయకుండా కేవలం వెనుకబడిన తరగతుల నుంచి మాత్రమే వివరాలు సేకరిస్తున్నారు. ఇప్పటికే కులగణన నివేదికను బిహార్ విడుదల చేసిన నేపథ్యంలో ఈ వెనుకబడిన తరగతుల గణనకు సంబంధించిన వివరాలను వెల్లడించేందుకు ఒడిశా సర్కార్ తీవ్ర ప్రయత్నాలు చేస్తోంది.

ఓబీసీ గణనపై ప్రభుత్వం ఎంతో క్రీయాశీలకంగా సర్వే కొనసాగుతోందని అధికార పార్టీ ఎమ్మెల్యే ప్రసాద్‌ మిశ్రా తాజాగా వెల్లడించారు. వెనుకబడిన తరగతుల సర్వే పూర్తయిన తర్వాత ఆ కమిటీ తన నివేదికను సీఎం నవీన్ పట్నాయక్‌కు అందిస్తుందని ప్రసాద్ మిశ్రా తెలిపారు. అయితే ఈ వెనుకబడిన తరగతులపై నిర్వహించిన సర్వే ఆధారంగా వచ్చిన ఫలితాలతో ఆరోగ్య సంరక్షణ, విద్య, ఆర్థిక, నైపుణ్యాభివృద్ధి, మహిళా సాధికారత వంటి అంశాల్లో రాష్ట్రాన్ని మరింత ముందుకు తీసుకెళ్లేందుకు ఉపయోగపడుతుందని ఒడిశా సీఎంఓ ఒక ప్రకటనలో వెల్లడించింది.

ఇక అస్సాంలోని హిమంత బిశ్వశర్మ సర్కార్ కూడా ఒక సర్వేను నిర్వహిస్తోంది. అస్సాంలో ఐదు స్థానిక ముస్లిం వర్గాలకు సంబంధించిన సామాజిక, ఆర్థిక సర్వేను ఆ రాష్ట్ర ప్రభుత్వం చేపడుతోంది. ఆ సర్వేలో వచ్చిన ఫలితాల తర్వాత ఆయా వర్గాల అభివృద్ధికి చర్యలు తీసుకోనున్నట్లు అస్సాం ప్రభుత్వం వెల్లడించింది. ఇటీవలె బిహార్ ప్రభుత్వం రాష్ట్రవ్యాప్తంగా కులగణన నిర్వహించి.. రిపోర్ట్‌ను విడుదల చేసింది. బిహార్‌లో మొత్తం 13.07 కోట్ల మంది ఉన్నట్లు సర్వే లెక్కలు తెలిపాయి. అందులో అత్యంత వెనుబడిన తరగతుల(ఎకనామికల్లీ బ్యాక్‌వర్డ్ క్యాస్టెస్) వారు 36 శాతంగా ఉన్నట్లు వివేక్ సింగ్ వెల్లడించారు. ఇక ఇతర వెనుకబడిన తరగతుల(బ్యాక్‌వర్డ్ క్యాస్టెస్) వారు మరో 27.13 శాతంగా తేలింది. ఇక కులాలవారీగా చూస్తే ఓబీసీ వర్గానికి చెందిన యాదవుల జనాభా అత్యధికంగా ఉందని ఈ కులగణన రిపోర్టులో వెల్లడైంది. మొత్తం బిహార్ రాష్ట్ర జనాభాలో యాదవుల వాటా 14.27 శాతం ఉన్నట్లు పేర్కొంది. షెడ్యూల్డ్‌ కులాల జనాభా 19.7 శాతం, షెడ్యూల్డ్‌ తెగల జనాభా 1.7 శాతం ఉన్నట్లు కులగణనలో తేలింది. మరోవైపు.. జనరల్‌ కేటగిరీకి చెందినవారి జనాభా 15.5 శాతంగా ఉన్నట్లు తెలిసింది.