చంద్రబాబుకు హైకోర్టులో మరోసారి నిరాశ.. స్కిల్ కేసులో బెయిల్ పిటిషన్‌పై విచారణ వాయిదా

మాజీ ముఖ్యమంత్రి చంద్రబాబు బెయిల్ పిటిషన్‌పై విచారణ వాయిదా పడింది. స్కిల్ డెవలెప్‌మెంట్ కేసులో బెయిల్ మంజూరు చేయాలంటూ లాయర్లు బుధవారం పిటిషన్ దాఖలు చేశారు. అయితే గురువారం విచారణ చేపట్టింది.. చంద్రబాబు పిటిషన్‌పై కౌంటర్‌ దాఖలు చేయాలని సీఐడీకి హైకోర్టు ఆదేశాలు ఇచ్చింది. వారు సమయం కోరవడంతో.. ఈ నెల 17కు పిటిషన్‌పై విచారణను వాయిదా వేసింది హైకోర్టు. అయితే శుక్రవారం సుప్రీం కోర్టులో చంద్రబాబు క్వాష్ పిటిషన్‌పైనా విచారణ జరగనున్న సంగతి తెలిసిందే. స్కిల్‌ కేసులో ఏసీబీ కోర్టు బెయిలు ఇచ్చేందుకు నిరాకరించడంతో చంద్రబాబు హైకోర్టును ఆశ్రయించారు.

బెయిలు మంజూరు చేయాలని కోరుతూ బుధవారం హైకోర్టులో పిటిషన్‌ వేశారు. ప్రధాన వ్యాజ్యంపై విచారణ తేలేంతవరకు మధ్యంతర బెయిలు ఇవ్వాలని కోరారు. రాజకీయ ప్రతీకారంతో తనను ఈ కేసులో ఇరికించారని చంద్రబాబు తన పిటిషన్లో ప్రస్తావించారు. కేసు నమోదు చేసిన 22 నెలల తర్వాత అకస్మాత్తుగా తన పేరును ఎఫ్‌ఐఆర్‌లో చేర్చి అక్రమంగా అరెస్టు చేశారన్నారు. ఇప్పటికే తనను పోలీసు కస్టడీలోకి తీసుకొని సీఐడీ రెండు రోజులపాటు ప్రశ్నించిన విషయాన్ని ప్రస్తావించారు.

మరో ఐదు రోజులు కస్టడీ కోరుతూ సీఐడీ వేసిన పిటిషన్‌ను ఏసీబీ కోర్టు కొట్టేసిందని గుర్తుచేశారు. కస్టోడియల్‌ ఇంటరాగేషన్‌ అవసరం లేదని.. ఇప్పటికే ఈ కేసులో సాక్ష్యాధారాలను దర్యాప్తు సంస్థ సేకరించిందన్నారు. తమ వాదనను పరిగణనలోకి తీసుకోకుండా ఏసీబీ కోర్టు బెయిలు పిటిషన్ను కొట్టేసిందన్నారు. ప్రజా జీవితంలో ఉన్నానని.. చట్టాన్ని గౌరవించే వ్యక్తినన్నారు. దర్యాప్తునకు సహకరిస్తానని.. కోర్టు విధించే షరతులకు కట్టుబడి ఉంటానని పేర్కొన్నారు. ఈ అంశాల్ని పరిగణనలోకి తీసుకొని బెయిలు మంజూరు చేయాలని కోరారు.