హైకోర్టు సీజే ప్రమాణస్వీకారంపై పిల్.. లాయర్‌కు రూ.5 లక్షల ఫైన్ వేసిన సుప్రీంకోర్టు

ప్రజా ప్రయోజన వ్యాజ్యం వేసిన ఓ న్యాయవాదికి సుప్రీం కోర్టు బిగ్ షాక్ ఇచ్చింది. కోర్టు సమయాన్ని వృథా చేసేందుకు అనవసరంగా దాఖలు చేసిన ప్రజా ప్రయోజన వ్యాజ్యంగా గుర్తించిన సుప్రీం కోర్టు.. అతనికి భారీ జరిమానా విధించింది. నెల రోజుల్లోగా సుప్రీంకోర్టు రిజిస్ట్రీలో రూ. 5 లక్షలు జమ చేయాలని హెచ్చరించింది. అయితే బాంబే హైకోర్టు ప్రధాన న్యాయమూర్తి చేసిన ప్రమాణ స్వీకారం గురించి చేసిన ప్రజా ప్రయోజన వ్యాజ్యంపై విచారణ జరిపిన సుప్రీంకోర్టు ఈ మేరకు ఆదేశాలు జారీ చేసింది. బాంబే హైకోర్టు ప్రధాన న్యాయమూర్తి చేసిన ప్రమాణ స్వీకారం సరిగా లేదని ఉత్తర్‌ప్రదేశ్ లక్నోకు చెందిన అశోక్ పాండే అనే లాయర్ సుప్రీం కోర్టులో ప్రజా ప్రయోజన వ్యాజ్యం దాఖలు చేశారు. ఆ ప్రమాణ స్వీకారంలో భాగంగా తన పేరుకు ముందు నేను అనే పదం వాడలేదని.. పేర్కొన్నారు. అలా చేయడం భారత రాజ్యాంగంలోని మూడో షెడ్యూల్‌కు విరుద్ధమని వాదించారు. దీంతోపాటు ఈ ప్రమాణ స్వీకరా మహోత్సవానికి కేంద్ర పాలిత ప్రాంతాలైన డామన్ డయ్యూ, దాద్రా నగర్హవేలీలకు చెందిన ప్రభుత్వ ప్రతినిధులను ఆహ్వానించలేదని తెలిపారు. దీంతో అసలు బాంబే హైకోర్టు సీజే ప్రమాణ స్వీకారం సరిగా జరగలేదని ఆరోపిస్తూ అశోక్ పాండే పిల్ దాఖలు చేశారు.

అయితే ఈ పిల్‌పై విచారణ సందర్భంగా సుప్రీంకోర్టు ప్రధాన న్యాయమూర్తి జస్టిస్ డీవై చంద్రచూడ్ తీవ్ర వ్యాఖ్యలు చేశారు. అసలు పిటిషనర్ దాఖలు చేసిన పిల్‌ను సీజేఐ తప్పుపట్టారు. కేవలం ప్రచారం కోసం.. కోర్టు సమయాన్ని వృథా చేసేందుకే ఇలాంటి పిల్ వేసినట్లు పేర్కొన్నారు. బాంబే హైకోర్టు సీజే ప్రమాణ స్వీకారాన్ని మహారాష్ట్ర గవర్నర్‌ చేయిస్తారని.. ప్రమాణం చేశాక బాధ్యతలు స్వీకరిస్తున్నందున అటువంటి అభ్యంతరాలకు ఎలాంటి ఆస్కారం లేదని జస్టిస్ డీవై చంద్రచూడ్ స్పష్టం చేశారు. ఈ క్రమంలోనే అశోక్ పాండే దాఖలు చేసిన పిల్‌ను కొట్టివేసిన సుప్రీంకోర్టు.. పిటిషనర్‌కు భారీ ఫైన్ విధించింది. 4 వారాల్లోపు సుప్రీంకోర్టు రిజిస్ట్రీలో రూ.5 లక్షలు జమ చేయాలని ప్రధాన న్యాయమూర్తి జస్టిస్‌ డీవై చంద్రచూడ్‌ ఆదేశాలు జారీ చేశారు. పనికిమాలిన అంశాలపై వ్యాజ్యాలు దాఖలు చేస్తూ కోర్టు సమయాన్ని వృథా చేయడంపై తీవ్ర ఆగ్రహం వ్యక్తం చేశారు. ఇక ఈ రూ.5 లక్షల ఫైన్‌ను జమ చేయకుంటే.. లక్నో కలెక్టర్ ద్వారా అతని వద్ద నుంచి భూ ఆదాయ బకాయిలుగా వసూలు చేయాలని సుప్రీంకోర్టు స్పష్టం చేసింది.