పొట్టి స్కర్టులు వేసుకోవడం.. రెచ్చగొట్టే విధంగా డ్యాన్స్ చేయడం అశ్లీలత కాదు

పొట్టి స్కర్టులు వేసుకోవడం, రెచ్చగొట్టే విధంగా డ్యాన్స్ చేయడం లేదా హావభావాలను ప్రదర్శించడం ప్రజలకు చికాకు కలిగించే అశ్లీల చర్యలుగా పరిగణించలేమని బాంబే హైకోర్టు స్పష్టం చేసింది. ఈ మేరకు ఓ రిసార్ట్‌ బాంకెట్ హాల్‌లో అర్ధనగ్నంగా అమ్మాయిలు డ్యాన్సులు చేస్తున్నారంటూ పెట్టిన పోలీసు కేసును బాంబే హైకోర్టు నాగ్‌పూర్ ధర్మాసనం కొట్టివేసింది. గత మే నెలలో నాగ్‌పూర్‌లో తిర్ఖురాలోని టైగర్ ప్యారడైజ్ రిసార్ట్ అండ్ వాటర్ పార్క్‌పై పోలీసు బృందం దాడి చేసింది. ఈ సమయంలో పొట్టి దుస్తులు వేసుకుని నృత్యం చేస్తున్న ఆరుగురు యువతులను అదుపులోకి తీసుకుని.. పోలీస్ కేసు పెట్టింది.

ఎఫ్ఐఆర్ ప్రకారం.. పోలీసు అధికారులు బాంక్వెట్ హాల్‌లోకి ప్రవేశించిన సమయానికి ఆరుగురు మహిళలు పొట్టి బట్టలు ధరించి అసభ్యకరంగా డ్యాన్స్ చేస్తున్నారు. అక్కడున్న ప్రేక్షకులు ఆ యువతులపై రూ.10 విలువైన నకిలీ నోట్ల వర్షం కురిపిస్తున్నారని, వారిలో కొందరు మద్యం సేవిస్తున్నట్లు ఎఫ్‌ఐఆర్‌లో పేర్కొన్నారు. ఈ ఘటనపై ఐపీసీ సెక్షన్ 294 సహా, మహారాష్ట్ర పోలీస్ చట్టం, నిషేధిత సెక్షన్ల కింద కేసు నమోదుచేశారు.

ఈ కేసుపై విచారణ చేపట్టిన బాంబే హైకోర్టు నాగ్‌పూర్ ధర్మాసనం.. సెక్షన్ 294 ప్రకారం ఒక చర్య నేరం కావాలంటే అది బహిరంగంగా చేయవలసి ఉంటుందని నొక్కి చెప్పింది. ‘సెక్షన్ 294 ప్రకారం అశ్లీల చర్య లేదా అశ్లీల పాట లేదా పదాలు చూసిన తర్వాత లేదా విన్న తర్వాత ఇతరులకు చికాకు కలిగించేలా ఉండాలని అర్థం.. ఈ చర్యలలో వేటిపై అయినా సమీపంలో ఉన్న వ్యక్తులు నిర్దిష్ట ఫిర్యాదు చేయాలి’ అని ఉద్ఘాటించింది. ఈ కార్యక్రమానికి హాజరైన వ్యక్తులు ఇది స్పష్టంగా దర్యాప్తు సంస్థ నైతిక పోలీసింగ్ కేసు అని వాదించారు. ‘పొట్టి స్కర్టులు ధరించడం, రెచ్చగొట్టే విధంగా డ్యాన్స్ చేయడం లేదా పోలీసు అధికారులు అశ్లీలంగా భావించే సైగలు చేయడం వంటివి అసభ్యకర చర్యలుగా పేర్కొనలేం’ అని కోర్టు పేర్కొంది.

‘ప్రస్తుత భారతీయ సమాజంలో ప్రబలంగా ఉన్న నైతికత సాధారణ నిబంధనలను గుర్తుంచుకోండి.. ప్రస్తుత కాలంలో మహిళలు అలాంటి దుస్తులు ధరించడం చాలా సాధారణం, ఆమోదయోగ్యమైనది.. మనం సినిమాల్లో ఈ తరహా దుస్తులను వేసుకోవడం తరచుగా చూస్తుంటాం.. సెన్సార్‌షిప్ లేదా అందాల పోటీల్లో ప్రేక్షకులకు చికాకు కలిగించనవి విస్తృతంగా ప్రజల దృష్టిలో ఉంచుతారు’ అని కోర్టు పేర్కొంది. ‘ఏ చర్యలు అశ్లీలతను కలిగి ఉంటాయనే సంకుచిత దృక్పథాన్ని నిర్ణయం తీసుకోవడం తిరోగమన చర్య అవుతుంది.. మేము ఈ విషయంలో విశాల దృక్పథాన్ని పరిగణనలోకి తీసుకోవాలనుకుంటున్నాం..అలాంటి నిర్ణయాన్ని పోలీసు అధికారులకు వదిలివేయడానికి అంగీకరించం.. ఏదైనా నిర్దిష్ట వ్యక్తి ఇబ్బంది పడినట్టు ఫిర్యాదులో ఎటువంటి వాస్తవం లేదు. తత్ఫలితంగా ఐపీసీ సెక్షన్ 294 ప్రకారం నేరానికి సంబంధించిన అంశాలు ఎఫ్ఐఆర్‌లో పొందుపరచలేదని మేము భావిస్తున్నాం’ అని ఇటీవల కోర్టు తన ఉత్తర్వుల్లో పేర్కొంది.