ప్రపంచంలోనే అత్యంత ఖరీదైన పెన్ను.. ధర రూ.66.6 కోట్లు

ఒక పెన్ను ఖరీదు 8 మిలియన్ డాలర్లు అంటే మీరు నమ్ముతారా. దాని విలువ మన భారత కరెన్సీలో ఏకంగా రూ.66.6 కోట్లు. అదేంటి అది పెన్ను ధరనా లేక పెన్నుల కంపెనీ ధరనా అని ఆశ్చర్యపోతున్నారా. ఆగండి. అది ఒక పెన్ను ధరనే. అంత ఖరీదైన పెన్ను ఎక్కడిది.. దాంతో ఏం చేసుకుంటారు అని అనుకుంటున్నారా. అయితే అంత కాస్ట్ లీ పెన్ను కూడా ఉంటుందా అనే అనుమానం కూడా కలుగుతుంది కదూ. అందులో ఏమన్నా వజ్ర వైఢుర్యాలు ఉన్నాయా అని సందేహపడుతున్నారా. మీకు అలాంటి సందేహాలు ఏం అవసరం లేదు. ఎందుకంటే అది వజ్రాలు పొదిగిన పెన్ను. ఇంతకీ ఈ పెన్ను పేరేంటో తెలుసా. ఫుల్గోర్ నోక్టర్నస్.

ప్రపంచవ్యాప్తంగా అరుదైన, పురాతణ వస్తువులను అక్కడక్కడా వేలం వేస్తూ ఉంటారు. అలాంటి వస్తువులే వేలంలో ఎవరూ ఊహించని విధంగా కోట్లాది రూపాయలు పలికి అందర్నీ ఆశ్చర్యపరుస్తూ ఉంటాయి. అలాగే తాజాగా ఓ పెన్ను కూడా వేలంలో రికార్డు స్థాయి ధర పలికింది. ఒక అరుదైన పెన్ను వేలం వేయగా 8 మిలియన్‌ డాలర్లు అంటే భారత కరెన్సీలో రూ.66.6 కోట్లు పలికి.. వార్తల్లో నిలిచింది. దీంతో ప్రపంచంలోనే అత్యంత ఖరీదైన పెన్నుగా రికార్డుల్లోకి ఎక్కింది. టిబాల్డి అనే కంపెనీ తయారు చేసిన ఈ పెన్ను పేరు ఫుల్గోర్ నోక్టర్నస్. ఇది లాటిన్‌ పేరు కాగా.. దానికి నైట్‌ గ్లో అని అర్థం. నల్ల వజ్రాలు పొదిగిన ఈ ఫౌంటెన్ పెన్‌ ప్రస్తుతం ప్రపంచ వ్యాప్తంగా సంచలనంగా మారింది.

ఇక ఈ పెన్ను తయారీ చూస్తే నిజంగా దిమ్మ తిరిగిపోతుంది. ఎందుకంటే ఫుల్గోర్ నోక్టర్నస్ పెన్నుపై.. దాని క్యాప్‌పై నల్ల వజ్రాలు పొదిగి ఉంటాయి. వాటితోపాటు అద్భుతమైన బ్లడ్‌ రెడ్‌ కెంపులు పెన్ను క్యాప్‌ని అందంగా అలంకరించి ఉంటాయి. ఈ పెన్నులో మొత్తం 945 నల్ల వజ్రాలు, 123 కెంపులు పొదిగి ఉన్నాయి. ఇక ఈ పెన్ను నిబ్‌ను 18 క్యారెట్ల బంగారంతో తయారు చేశారు. ఇక ఈ ఫుల్గోర్ నోక్టర్నస్ పెన్ తయారీ, డిజైన్ ఫై రేషియోలో ఉంటుంది. దీన్నే దైవిక నిష్పత్తి అంటారు. ఈ పెన్ను అన్ని పెన్నుల కన్నా ప్రత్యేకంగా ఉండటానికి కారణమే ఈ దైవిక ఫై నిష్పత్తి. ఈ పెన్నును క్యాప్‌తొ మూసినపుడు అవి 1.618 ఫై నిష్పత్తిలో ఉంటాయి. ప్రపంచంలోనే ఇలాంటి పెన్ను మరొకటి లేదని దానితో సంబంధం ఉన్నవారు చెబుతున్నారు. 2020లో ఫుల్గోర్ నోక్టర్నస్‌ పెన్ను షాంఘైలో వేలం వేయగా అది 8 మిలియన్‌ డాలర్లు పలికింది. ఇంతవరకూ ఏ పెన్ను కూడా ఈ స్థాయిలో ధర పలకక పోవడంతో ఇప్పటివరకు ఇదే ప్రపంచంలోనే అత్యంత ఖరీదైన పెన్నుగా నిలిచింది.