నందిగామలో షాపులో చెలరేగిన మంటలు.. భారీగా ఆస్తి నష్టం
Andhra Pradesh Telugu | Suryaa Desk | Published : Wed, Oct 18, 2023, 06:06 PM
ఎన్టీఆర్ జిల్లా నందిగామ పాత బస్టాండ్‌‌లో భారీ అగ్నిప్రమాదం సంభవించింది. శ్రీ బాలాజీ ప్లైవుడ్, డోర్స్ అండ్ వుడ్ వర్క్‌షాప్ షార్ట్ సర్క్యూట్‌తో మంటలు ఎగసిపడి దుకాణం మొత్తం దగ్ధమైంది. మంగళవారం రాత్రి సిబ్బంది పని ముగించుకుని షాపునకు తాళాలు వేసి వెళ్లిపోయారు. అయితే తెల్లవారుజామున అందులో నుంచి పొగలు రావడాన్ని గమనించిన స్థానికులు యజమానికి ఫోన్ చేయగా.. ఆయన అగ్నిమాపక సిబ్బందికి సమాచారం ఇచ్చాడు.
నందిగామ, కంచికచర్ల ఫైర్ స్టేషన్ల నుంచి వచ్చి రెండు ఫైరింజన్లు రెండు గంటల పాటు శ్రమించి మంటలను అదుపు చేశాయి. షాపులో ఉడ్, ప్లాస్టిక్ వస్తువులు ఉండటంతో మంటలు అదుపు చేయడానికి చాలా శ్రమించాల్సి వచ్చిందని ఫైర్ సిబ్బంది తెలిపారు. స్థానిక పోలీస్ స్టేషన్ ఎఎస్ఐ శ్రీనివాసరావు సిబ్బంది సంఘటన స్థలానికి చేరుకుని పరిస్థితిని సమీక్షించారు. షార్ట్ సర్క్యూట్ కారణంగా ప్రమాదం సంభవించిందని నిర్ధారించారు. ఈ అగ్నిప్రమాదంలో షాపులోని ఫర్నిచర్, మిషనరీ మొత్తం కాలిబూడిదైంది. సుమారు రూ.80లక్షల వరకు నష్టం సంభవించిందని షాపు యజమాని మెండే ప్రసాద్ తెలిపారు.
|
|