ఏసీబీ కోర్టులో వర్చువల్‌గా హాజరైన చంద్రబాబు,,,,జ్యుడిషియల్ రిమాండ్ నవంబర్ 1 వరకు పొడిగింపు

మాజీ ముఖ్యమంత్రి చంద్రబాబుకు రెండు బ్యాడ్‌న్యూస్‌లు వచ్చాయి. స్కిల్ డెవలెప్‌మెంట్ కేసులో.. విజయవాడ ఏసీబీ కోర్టు జ్యుడీషియల్‌ రిమాండ్‌ను నవంబర్‌ 1 వరకు పొడిగించింది. అయితే చంద్రబాబు తన సెక్యూరిటీ, ఆరోగ్యపరమైన అంశాలను జడ్జి దగ్గర ప్రత్యేకంగా ప్రస్తావించారు. అలాగే భద్రతాపరమైన అంశాలపై అనుమానాలు ఉన్నాయన్నారు. దీంతో కోర్టు ఏమైనా అనుమానాలు ఉంటే రాతపూర్వకంగా ఇవ్వాలని న్యాయమూర్తి చంద్రబాబుకు సూచించారు.

మరోవైపు స్కిల్ డెవలెప్‌మెంట్ కేసులో చంద్రబాబు బెయిల్ పిటిషన్‌పై ఏపీ హైకోర్టులో విచారణ జరిగింది. చంద్రబాబు తరఫున సుప్రీం కోర్టు సీనియర్ లాయర్ సిద్ధార్థ్ లూథ్రా, సీఐడీ తరఫున ఏఏజీ పొన్నవోలు సుధాకర్ రెడ్డి వాదనలు వినిపించారు. చంద్రబాబుకు సుప్రీంకోర్టు మధ్యంతర బెయిలు ఇవ్వడానికి సుప్రీంకోర్టు నిరాకరించిందని పొన్నవోలు కోర్టుకు చెప్పారు. సుప్రీంకోర్టులో బెయిల్ పిటిషన్‌పై కూడా తీర్పు రిజర్వులో ఉందని.. సుప్రీంకోర్టులో బెయిల్ పిటిషన్‌పై నిర్ణయం పెండింగ్‌లో ఉన్నప్పుడు హైకోర్టులో విచారణ చేయవద్దని కోరారు. చంద్రబాబు ఆరోగ్యం బాగాలేదని.. ఆయనకు బెయిల్ ఇవ్వమని హరిష్‌సాల్వే సుప్రీంకోర్టులో వాదించినట్లు పొన్నవోలు తెలిపారు. దీనిపై మధ్యంతర బెయిల్‌ ఇవ్వలేమని సుప్రీంకోర్టు స్పష్టం చేసిందన్నారు.

సుప్రీంకోర్టు మధ్యంతర బెయిల్ ఇవ్వడానికి నిరాకరించింది నిజమేనా అని లూథ్రాని హైకోర్టు ప్రశ్నించింది. సుప్రీంకోర్టులో చంద్రబాబు ఆరోగ్యానికి సంబంధించి ఎలాంటి రిపోర్టులు అందజేయలేదన్నారు లూథ్రా. మధ్యంతర బెయిల్ ఇవ్వమని సుప్రీంకోర్టులో తాము మౌఖికంగా మాత్రమే అడిగామని.. చంద్రబాబు ఆరోగ్యం సరిగా లేదు కాబట్టి బెయిల్ పిటిషన్‌ వెంటనే విచారణ జరపాలని కోరారు. ఈ కేసులో చాలామందికి ఇప్పటికే బెయిల్ వచ్చింది కాబట్టి చంద్రబాబుకు కూడా బెయిల్ ఇవ్వమని కోరారు.

సుప్రీంకోర్టులో మధ్యంతర బెయిల్ పిటిషన్ పెండింగ్‌లో ఉన్నందున దీనిపై విచారణ చేయలేమని కోర్టు స్పష్టం చేసింది. చంద్రబాబు వ్యక్తిగత డాక్టర్‌తో ఆయనకు పరీక్షలు చేయించేందుకు మీకేమైన అభ్యంతరం ఉందా అని పొన్నవోలును న్యాయమూర్తి అడిగారు. చంద్రబాబుకు వ్యక్తిగత డాక్టర్‌తో వైద్యపరీక్షలకు సంబంధించి విచారణ చేసేందుకు మధ్యాహ్నానికి వాయిదా వేశారు. అయితే శుక్రవారం సుప్రీం కోర్టులో స్కిల్ డెవలెప్‌మెంట్ కేసు క్వాష్ పిటిషన్‌పై నిర్ణయం వెలువడే అవకాశం ఉంది.. కోర్టు తీర్పుపై అందరిలో ఉత్కంఠరేపుతోంది. అయితే కోర్టు శుక్రవారం తీర్పును వెల్లడిస్తుందా.. దసరా సెలవుల తర్వాత నిర్ణయాన్ని వెల్లడిస్తుందా అన్నది కూడా చూడాలి. అయితే అందరి కళ్లు ఇప్పుడు సుప్రీం కోర్టు నిర్ణయంవైపు ఉన్నాయి. టీడీపీ శ్రేణులు కూడా ఆసక్తిగా ఎదురు చూస్తున్నాయి.