బెట్టింగ్ యాప్ డ్రీమ్11లో కోటిన్నర గెలిచిన ఎస్ఐ,,,,,శాఖాపరమైన చర్యలు చేపట్టిన ఉన్నతాధికారులు

ఆన్‌లైన్‌ బెట్టింగ్‌ యాప్‌ డ్రీమ్‌ 11లో రూ.కోటిన్నర గెలుచుకొని వార్తల్లో నిలిచిన మహారాష్ట్ర పోలీస్ అధికారికి ఊహించని షాక్ తగిలింది. ఉన్నతాధికారులు ఆయనపై క్రమశిక్షణ చర్యలు తీసుకున్నారు. నిబంధనలను ఉల్లంఘించి బెట్టింగ్ యాప్‌లో పాల్గొన్న ఎస్ఐ సోమనాథ్ ఝేండే.. పోలీస్‌శాఖ ప్రతిష్ఠకు భంగం కలిగించారంటూ విధుల నుంచి తప్పించారు. ఈ మేరకు ఏసీపీ సతీశ్‌ మానే ఉత్తర్వులు వెలువరించారు. పింప్రీ - ఛించ్వాడ్‌ పోలీస్‌ కమిషనరేటులో పనిచేసే సోమనాథ్‌ అక్టోబరు 10న విధుల్లో ఉండి.. ఇంగ్లాండ్‌ - బంగ్లాదేశ్‌ మ్యాచ్‌ సందర్భంగా బెట్టింగులో పాల్గొన్నారని తెలిపారు.

ఆయనపై తదుపరి విచారణ బాధ్యతలను డీసీపీకి అప్పగించారు. ఇకపోతే, గత రెండు మూడు నెలలుగా సోమనాథ్‌ డ్రీమ్‌ 11లో తన అదృష్టాన్ని పరీక్షించుకొంటున్నారు. వన్డే ప్రపంచకప్‌లో భాగంగా ఇంగ్లాండ్‌ - బంగ్లాదేశ్‌ జట్ల మధ్య జరిగిన మ్యాచ్‌లో ఉత్తమ ఆటగాళ్లతో జట్టును ఎంపిక చేసుకున్న ఆయన.. ఫాంటసీ గేమ్‌లో అగ్రస్థానంలో నిలిచి రూ.1.5 కోట్లు గెలుచుకున్నారు. దీంతో ఆయన కుటుంబసభ్యులు ఆనందంతో స్వీట్లు పంచి సంబరాలు చేసుకున్నారు. ఈ వార్త వైరల్ కావడంతో ఉన్నతాధికారులు స్పందించారు.

ఈ అంశంపై విచారణకు ఆదేశించారు. ఎటువంటి అనుమతి తీసుకోకుండా ఆన్‌లైన్‌లో బెట్టింగ్‌కు పాల్పడినట్టు దర్యాప్తులో వెల్లడయ్యింది. నివేదిక ఆధారంగా సోమనాథ్‌ను సస్పెండ్ చేస్తున్నట్టు బుధవారం ప్రకటించారు. ఉన్నతాధికారుల చర్యతో కోటిన్నర గెలిచిన ఆనందం అంతలో ఆవిరైంది. దీనిపై అధికారులు మాట్లాడుతూ.. ‘ఇది ఇతర పోలీసు సిబ్బందికి హెచ్చరికగా ఉపయోగపడుతుంది.. ఇదే పద్ధతిలో ఆన్‌లైన్ గేమ్‌లు ఆడితే వారు కూడా క్రమశిక్షణా చర్యలను ఎదుర్కొనే అవకాశం ఉంది’ అని ఏసీపీ అన్నారు.