చంద్రబాబుపై దొంగ కేసులు ,,,భావోద్వేగంతో నారా లోకేష్ కన్నీళ్లు

టీడీపీ రాష్ట్ర విస్తృతస్థాయి సమావేశంలో జాతీయ ప్రధాన కార్యదర్శి లోకేష్ భావోద్వేగానికి గురయ్యారు. తండ్రి చంద్రబాబు అరెస్ట్, ఆ తర్వాత పరిణామాలను తలచుకుని కన్నీళ్లు పెట్టుకున్నారు. ఈ లోకేష్ భావోద్వేగంతో మాట్లాడారు.. ఏ తప్పు చేయకున్నా అరెస్ట్ చేయడం బాధ కలిగించింది అన్నారు. ప్రజల కోసం పోరాడిన చంద్రబాబు అంటూ లోకేష్ కంటతడి పెడ్డారు. ఏ తప్పు చేయకున్నా చంద్రబాబును జైల్లో పెట్టారని.. తమ ఆస్తులన్నీ బహిర్గతం చేశామని.. డబ్బే సంపాదించాలని చంద్రబాబే భావిస్తే రాజకీయాలు అవసరం లేదని చెప్పుకొచ్చారు.

చంద్రబాబు తన రాజకీయ జీవితంలో, ముఖ్యమంత్రిగా ఎంతో మందికి ఉపాధి, ఉద్యోగావకాశాలు కల్పించారని.. అలాంటి చంద్రబాబుపై దొంగ కేసులు పెట్టారని ఆగ్రహం వ్యక్తం చేశారు. ప్రజల కోసం చంద్రబాబు పని చేశారని.. ప్రజలంతా ఆలోచించాలన్నారు. ఇవాళ చంద్రబాబు కుటుంబానికి ఇబ్బంది వచ్చిందని.. రేపు ప్రతి ఒక్కరి కుటుంబానికి ఇదే పరిస్థితి రావొచ్చన్నారు. జగన్ ఆలోచనలు ఇదే విధంగా ఉంటాయని.. టీడీపీ-జనసేన పోరాడకుంటే రాష్ట్రం ముక్కలు చేసి అమ్మేసేవారన్నారు. ప్రజల కోసం పోరాడినందుకే చంద్రబాబును జైల్లో పెట్టారని మండిపడ్డారు. టీడీపీ-జనసేన కలిస్తే 160 స్థానాలు ఖాయమని లోకేష్ ధీమా వ్యక్తం చేశారు.

'ఏనాడైనా మా అమ్మ బయటకొచ్చారా?.. చివరకు మా తల్లిపైనా కేసులు పెడతామని బెదిరిస్తున్నారు' అంటూ లోకేష్ మండిపడ్డారు. ఏనాడు ప్రభుత్వ కార్యక్రమాలకు తన తల్లి రాలేదని.. అసెంబ్లీ సాక్షిగా జగన్‌, ఆయన సైన్యం ఆమెను అవమానించారన్నారు. సేవా కార్యక్రమాలు తప్ప రాజకీయాలు తన తల్లికి తెలియవన్నారు. గవర్నర్‌ను కలిసేందుకు కూడా వెళ్లలేదని.. చంద్రబాబుకు పంపించే భోజనంలో విషం కలుపుతారని ఆరోపణలు చేస్తున్నారన్నారు. 'భోజనాల్లో విషం కలపడం, కోడికత్తి డ్రామాలు మా డీఎన్‌ఏలోనే లేవు' అన్నారు. చంద్రబాబు ఇచ్చిన పోరాట స్ఫూర్తితో ముందుకు సాగుదామని పిలుపునిచ్చారు.

2019లో ఒక్క ఛాన్స్‌ అంటే జగన్‌ను గెలిపించారని.. ఆయన మాత్రం నియంత మాదిరిగా రాష్ట్రాన్ని నాశనం చేశారన్నారు. రాష్ట్రాన్ని అప్పుల్లోకి తోసేశారని.. జగన్‌ మొదటి నిర్ణయం.. ప్రజల కోసం కట్టిన ప్రజావేదిక కూల్చడమన్నారు. దళితులు, బీసీలు, మైనారిటీలు, అనేకమంది టీడీపీ నేతలపై కేసులు పెట్టించారన్నారు. రాష్ట్రానికి చంద్రబాబు అనేక పరిశ్రమలు తీసుకొచ్చారని.. వేలమంది నిరుద్యోగ యువతీయువకులకు ఉపాధి కల్పించారన్నారు. పరిశ్రమలు తీసుకొచ్చి, ఉద్యోగాలు కల్పించినందుకు చంద్రబాబును జైలుకు పంపించారా? అని ప్రశ్నించారు. అభివృద్ధి, సంక్షేమ కార్యక్రమాలను అమలు చేసినందుకు చంద్రబాబును బంధించారా? అన్నారు. జాబ్‌ క్యాలెండర్‌ వెంటనే విడుదల చేయడం ఆయన చేసిన నేరమా? అన్నారు. సాగునీటి ప్రాజెక్టులను గాలికొదిలేశారని ప్రశ్నించడం చంద్రబాబు తప్పా? అంటూ ప్రశ్నించారు లోకేష్.

ఇతర రాష్ట్రాల రాజధానులకు దీటుగా ఆంధ్రప్రదేశ్ రాజధాని ఉండాలని అహర్నిశలు కష్టపడినందుకు చంద్రబాబును బంధించారన్నారు. రైతులకు గిట్టుబాటు ధర ఇవ్వాలని కోరడం తప్పా?.. ఇసుక దోపిడీ, కల్తీ మద్యంపై మాట్లాడడం.. కరెంటు, ఆర్టీసీ ఛార్జీలు, పన్నులు తగ్గించాలని అడగడమే ఆయన చేసిన నేరమా? అన్నారు. కుటుంబం గురించి ఒక్క క్షణం కూడా పట్టించుకోకుండా అహర్నిశలు ప్రజల గురించే చంద్రబాబు ఆలోచించారన్నారు. పేదవాళ్లు శాశ్వతంగా పేదరికం నుంచి బయటకు రావాలని కష్టపడ్డారన్నారు. అలాంటి గొప్ప వ్యక్తిని తప్పుడు కేసులతో జైల్లో పెట్టడం బాధాకరమన్నారు.