ఐదేళ్ల బాలుడికి కన్నతల్లి చిత్రహింసలు,,,,వీడియో రికార్డ్ చేసిన ఆమె ప్రియుడు

పల్నాడు జిల్లాలో దారుణం జరిగింది. కన్నతల్లే ఐదేళ్ల కొడుకుని చిత్రహింసలు పెట్టింది. చేతులు వెనక్కి విరిచి, తలను నీళ్ల బకెట్‌లో ముంచి, రంపంతో కోసి, వాతలు పెడుతూ నరకం చూపించింది. ఆ నొప్పిని భరించలేక పిల్లవాడు వదిలేయమని వేడుకున్నాడు.. తల్లి నుంచి తప్పించుకునే ప్రయత్నం చేసినా వదల్లేదు. బాలుడ్ని టార్చర్ పెడుతున్న వీడియోలు బయటకు రావడంతో తల్లి కర్కశత్వం బయటపడింది. పల్నాడు జిల్లా మాచర్లకు చెందిన వ్యక్తి నేవీలో ఉద్యోగం చేస్తున్నాడు. అతడికి పాతూరుకి చెందిన యువతితో 2015లో వివాహం జరిగింది. భర్త నేవీలో ఉద్యోగం చేస్తూ ముంబై, గుజరాత్, కాకినాడలలో పనిచేశారు. ప్రస్తుతం ఒడిశాలో పనిచేస్తున్నారు. విధి నిర్వహణలో భాగంగా అతడు సముద్రంలోకి వెళితే వారం, పది రోజులు వరకు తిరిగి వచ్చేవాడు కాదు. ఈ క్రమంలో ఆమె వరుసకి తమ్ముడయ్యే వ్యక్తితో వివాహేతర సంబంధం పెట్టుకుంది.

భర్తతో కలిసి ఆమె ఈ రాష్ట్రానికి వెళ్ళినా అక్కడికి ప్రియుడిని పిలిపించుకునేది. ఈ విషయం తెలియడంతో భార్యాభర్తల మధ్య గొడవలు జరిగాయి. దీంతో సుమారు ఏడాదిగా భర్తకు దూరంగా.. మాచర్లలోనే ప్రియుడితో కలిసి ఉంటోంది. ఆమె కొంతకాలంగా కుమారుడిని చిత్రహింసలు పెడుతోంది. ఆ దృశ్యాలను ప్రియుడు మొబైల్‌లో రికార్డు చేశాడు. ఇటీవల ప్రియుడితో కూడా విభేదాలు వచ్చాయి.. దీంతో ప్రియుడు ఆమె కొడుకుని చిత్రహింసలకు గురిచేస్తున్న తీసిన వీడియోలు భర్త కు పంపాడు. వెంటనే ఆమె భర్త కొడుకుని తనతో పాటు తీసుకెళ్లి భార్యతో విడాకుల కోసం కోర్టుకి ఎక్కడంతో ఈ విషయం బయటపడింది. ప్రియుడితో తన కార్యకలాపాలకు అడ్డొస్తున్నాడని పిల్లవాడిని టార్చర్ చేసిందా.. భర్తపై కోపంతో కొడుకుని చిత్రహింసలు పెట్టిందా అన్నది తెలియాల్సి ఉంది. ఈ ఘటనపై పోలీసులు కూడా ఆరా తీస్తున్నట్లు తెలుస్తోంది. ఈ ఘటనకు సంబంధించిన పూర్తి వివరాలు తెలియాల్సి ఉంది.