నాకూ ఓ కులం ఉంది జాగ్రత్త: ఖమ్మం ఘటనపై అంబటి రాంబాబు

ఓ ప్రయివేట్ కార్యక్రమంలో పాల్గొనేందుకు ఖమ్మం వెళ్లిన మంత్రి అంబటి రాంబాబుకు నిరసన సెగ తగిలిన సంగతి తెలిసిందే. ఖమ్మం నగరంలోని ఓ హోటల్‌లో అంబంటి రాంబాబు బస చేయగా.. స్థానికి టీడీపీ శ్రేణులు.. పెద్ద ఎత్తున ఆ హోటల్ ముందు ఆందోళన చేపట్టాయి. జగన్ డౌన్ డౌన్.. అంబటి రాంబాబు డౌన్ డౌన్ అంటూ నినాదాలు చేశారు. ఖమ్మం గడ్డ.. టీడీపీ అడ్డా.. ఇక్కడికి నువ్వెందుకొచ్చావ్ అంటూ మంత్రిని టీడీపీ కార్యకర్తలు నిలదీశారు.

అంబటి రాంబాబు కారు ఎక్కి వెళ్లేందుకు ప్రయత్నించగా.. వాహనాన్ని అడ్డగించిన టీడీపీ కార్యకర్తలు జై చంద్రబాబు అంటూ నినాదాలు చేశారు. దీంతో పోలీసులు రంగంలోకి దిగి పరిస్థితిని అదుపులోకి తెవాల్సి వచ్చింది. ఖమ్మం ఘటన పట్ల మంత్రి అంబటి రాంబాబు స్పందించారు. ఖమ్మం ఘటనతోపాటు అంతకు ముందు సత్తుపల్లి సమీపంలో తన కారు ప్రమాదానికి గురి కావడానికి, ఖమ్మంలో జరిగిన ఘటనకు సంబంధం ఉందేమోనని అనుమానం వ్యక్తం చేశారు. గన్‌మెన్లు లేకపోయి ఉంటే ఏం చేసేవారోనని రాంబాబు ఆందోళన వ్యక్తం చేశారు.

‘నిన్న జక్కంపూడి రామ్మోహన్ రావు కుమారుడు గణేష్ పెళ్లికి వెళ్లి.. ఖమ్మంలో నా బంధువు కుమార్తె వివాహ నిశ్చితార్థం కోసం వచ్చాను. నాతోపాటు చాలా మంది మహిళలు కూడా ఉన్నారు. ఇదే అదనుగా కొందరు నాపై దాడికి యత్నించారు. కొందరైతే.. అంబటి రాంబాబు.. నిన్ను ఏసేస్తాం అన్నారు. వాళ్ల దగ్గర కర్రలున్నాయి. అంతా కలిపి పది మంది లేరు. నిన్ను ఏసేస్తాం.. మేమందరం చందాలు వేసుకుంటున్నాం అన్నారు. హఠాత్తుగా జరిగిన ఈ సంఘటనతో ఆశ్చర్యానికి లోనయ్యాను’ అని అంబటి రాంబాబు తెలిపారు. దాడులు చేస్తే చేతులు కట్టుకోని కూర్చోబోమని ఆయన హెచ్చరించారు.

దాదాపు ఏడాది క్రితం కార్తీక వన భోజనాల సందర్భంగా అనుకుంటా.. ఖమ్మంలో ఓ సామాజికవర్గానికి చెందిన సమావేశంలో అంబటి రాంబాబుపై భౌతికంగా దాడి చేస్తే రూ.50 లక్షలు చందా ఇస్తానని ఓ పెద్ద మనిషి అన్నారు. ఇదంతా చూశాక నాకు అనుమానం వచ్చింది. నాపై దాడికి యత్నించిన వారిని పోలీసులు అరెస్ట్ చేశారు. విజయవాడ వచ్చాక వాళ్లు ఎవరూ అని పోలీసులను అడగ్గా.. ఆరుగుర్ని అదుపులోకి తీసుకున్నామని చెప్పారు. మరో ఇద్దరు దొరకలేదు. వీళ్లంతా టీడీపీ వాళ్లు అవునో కాదు నాకు తెలీదు కానీ.. ఒకే సామాజిక వర్గానికి చెందిన వ్యక్తులు. నన్ను అంతమొందిస్తే రూ.50 లక్షలు ఇస్తామని ప్రకటించారు కదా.. ఆ వర్గానికి చెందిన వాళ్లే. ఏమిటీ కులోన్మాదం?’ అని అంబటి రాంబాబు ప్రశ్నించారు. ఈ కులోన్మాదంతోనే వంగవీటి మోహన రంగాను హత్య చేశారని అంబటి రాంబాబు ఆరోపించారు.

కులోన్మాదంతోనే తనపై దాడికి ప్రయత్నించారన్న అంబటి.. మీకే కాదు.. నాకూ కులం ఉందన్నారు. కులోన్మాదంతో మీరు చేస్తున్న పనులు మీకే ప్రమాదం అని హెచ్చరించారు. తాను వంగవీటి రంగాకు సంబంధించిన వ్యక్తిని అనో.. ముద్రగడ పద్మనాభానికి సంబంధించిన వ్యక్తి అనో టార్గెట్ అవుతున్నానేమో అని ఆయన అనుమానం వ్యక్తం చేశారు. తానెప్పుడూ అసభ్యంగా మాట్లాడలేదన్న అంబటి.. తన మాట ఘాటుగా సూటిగా ఉంటుందని.. అది మీకు బాధగా ఉంటుందన్నారు. అందువల్ల చందాలు వేసుకొని వంగవీటి రంగాను లేపేసినట్టు లేపేస్తారా..? అని ప్రశ్నించారు. నన్ను టార్గెట్ చేస్తున్నారన్న అంబటి.. అయినా భయపడేది లేదన్నారు. చంద్రబాబుకు జైల్లో ప్రాణ హని ఉందని, ఆరోగ్యం బాగోలేదనే రెండు వాదనలు వినిపిస్తున్నాయి. ఈ రెండింట్లో నిజం ఏంటో తేల్చుకోవాలని అంబటి సూచించారు. చంద్రబాబు తనకు ఆరోగ్య సమస్యలు ఉన్నాయని ఏసీబీ కోర్టుకు చెప్పారని.. ఆరోగ్యం బాగోలేదని చెప్పలేదన్నారు.

‘కులోన్మాదంతో దాడి చేయాలనుకుంటే.. నాకూ ఒక కులం ఉంది, గుర్తుపెట్టుకోండి!’ అంటూ నారా లోకేశ్‌ను ట్యాగ్ చేసి ఆయన ఎక్స్ (ట్విట్టర్)లో పోస్టు చేశారు. ఖమ్మంలో తనపై దాడికి యత్నించి చంద్రబాబు సామాజికవర్గానికి చెందిన వారని.. కులం పట్ల విపరీతమైన అభిమానంతోనే వారు ఈ దాడికి ప్రయత్నించారని అర్థం వచ్చేలా అంబటి ఈ పోస్ట్ చేశారు.