ఖతార్‌లో 8మంది నేవీ మాజీ అధికారులకు మరణ శిక్ష,,,,,వీరిలో విశాఖవాసి పాకాల సుగుణాకర్ కూడా ఉన్నారు

ఖతార్‌లో మరణ శిక్ష పడిన ఎనిమిదిమంది భారత మాజీ నేవీ సిబ్బందిలో విశాఖవాసి పాకాల సుగుణాకర్‌ కూడా ఉన్నారు. ఈ విషయం తెలియడంతో ఆయన కుటుంబం ఆందోళనలో ఉంది. సుగుణాకర్‌ విశాఖపట్నం టింపనీ స్కూల్‌లో, ఆ తర్వాత విజయనగరం జిల్లా కోరుకొండ సైనిక్‌ స్కూల్‌లో ఆయన చదువుకున్నారు. అనంతరం నేవల్‌ ఇంజనీరింగ్‌ కాలేజీలో విద్యనభ్యసించి నేవీలో చేరారు.. ఆపై నేవీకి ఎంపికయ్యారు. విధుల్లో భాగంగా విశాఖపట్నంలోని తూర్పు నౌకాదళంలో కొంతకాలం పనిచేశారు. ఆ తర్వాత పలు హోదాల్లో విధులు నిర్వహించారు.

పదవీ విరమణ అనంతరం ఓ కంపెనీ తరఫున పని చేయటానికి ఖతార్‌ వెళ్లారు. అక్కడ గూఢచర్యానికి పాల్పడ్డారనే ఆరోపణలు ఎదుర్కొన్నారు. గతేడాది ఆగస్టులో అరెస్టయిన ఆయనకు మరణ శిక్ష విధించడంపై కుటుంబ సభ్యులు తీవ్ర ఆందోళన వ్యక్తం చేస్తున్నారు. తమకు న్యాయం చేయాలని కోరుతూ పలువురు విశ్రాంత నేవీ ఉద్యోగులతో కలిసి వారు బీజేపీ ఎంపీ జీవీఎల్‌ నరసింహారావును కలిశారు. ఇటీవల సుగుణాకర్ భార్య వైజయంతి దోహాకు వెళ్లి... జైలులో ఉన్న తన భర్తను కలిసినట్లు సమాచారం.

ఖతార్‌లో భారత నౌకాదళానికి చెందిన 8 మంది మాజీ అధికారులకు గూఢచర్యం ఆరోపణలపై కోర్టు మరణశిక్ష విధించింది. వీరిలో విశాఖకు చెందినసుగుణాకర్‌, కెప్టెన్‌ నవ్‌తేజ్‌ సింగ్‌ గిల్‌, కెప్టెన్‌ సౌరభ్‌ వశిష్ట్‌, కమాండర్‌ పూర్ణేందు తివారీ, కెప్టెన్‌ బీరేంద్ర కుమార్‌ వర్మ, కమాండర్‌ సంజీవ్‌ గుప్తా, కమాండర్‌ అమిత్‌ నాగ్‌పాల్‌, రాగేశ్‌‌లు ఉన్నారు. వీరంతా ఖతార్‌కు చెందిన అల్‌ దహ్రా కంపెనీలో బాధ్యతలు నిర్వహిస్తున్నారు. అయితే వీరిని గతేడాది ఆగస్టులో రాజధాని దోహాలో అరెస్టు చేశారు. వీరిపై ఉన్న అభియోగాలను ఇప్పటివరకూ బయటపెట్టలేదు. కోర్టు విచారణ జరిపిన తర్వాత శిక్ష విధించింది.

కోర్టు తీర్పుపై భారత విదేశాంగశాఖ దిగ్భ్రాంతి వ్యక్తం చేసింది.ఈ కేసుకు అత్యధిక ప్రాధాన్యతనిస్తున్నామని.. తమ ముందు న్యాయపరంగా ఉన్న అన్ని మార్గాలను పరిశీలిస్తున్నామన్నారు. అయితే ఖతార్ కోర్టు పూర్తి తీర్పు కోసం వేచి ఉన్నారు.. అది రాగానే వారి కుటుంబ సభ్యులతో, న్యాయబృందంతో సంప్రదింపులు జరపాలని కేంద్రం భావిస్తోంది. ఖతర్‌ అధికారులతోనూ ఈ అంశంపై మాట్లాడేందుకు సిద్ధమయ్యారు. ఖతార్‌లో మరణశిక్షకు గురైన 8మందిలో కొందరు భారత నౌకాదళానికి చెందిన ముఖ్యమైన యుద్ధనౌకలకు సారథ్యం వహించారు.

ఈ ఎనిమిదిమందికి ఖతార్‌లోని అల్‌ దహ్రా గ్లోబల్‌ టెక్నాలజీస్‌ అండ్‌ కన్సల్టెన్సీ సర్వీసెస్‌ కంపెనీలో ఉద్యోగాలు చేస్తున్నారు. ఈ కంపెనీ ఖతర్‌ నౌకాదళానికి శిక్షణ, సహకారం అందిస్తోంది. ఒమన్‌ వాయుసేన మాజీ స్క్వాడ్రన్‌ లీడర్‌ ఖామిస్‌ అల్‌ అజ్మీ ఈ కంపెనీకి సీఈవోగా ఉన్నారు. ఓ ముఖ్యమైన ప్రాజెక్టు కోసం ఈ కంపెనీ.. 8మంది భారతీయ నౌకాదళ మాజీ అధికారులను ఉద్యోగులుగా నియమించుకుంది. గూఢచర్యం ఆరోపణలతో భారతీయ అధికారులు 8మందిని గతేడాది ఆగస్టు 30న ఖతర్‌ నిఘా విభాగం అరెస్టు చేసింది. కంపెనీ సీఈవోను అరెస్ట్ చేసినా గతేడాది నవంబరులోనే విడుదల చేశారు. బెయిల్‌ కోసంపిటిషన్లు‌ దాఖలు చేసినా కోర్టు తిరస్కరించింది. తాజాగా వారికి మరణశిక్ష విధిస్తూ తీర్పునిచ్చింది.