తన సైన్యంపైనే ఇజ్రాయెల్ ప్రధాని విమర్శలు.. వివాదం చెలరేగడంతో క్షమాపణలు

సొంత సైన్యంపై వివాదాస్పద వ్యాఖ్యలు చేసిన ఇజ్రాయెల్ ప్రధాని బెంజమిన్ నెతన్యాహు.. పెద్ద వివాదం చెలరేగడంతో క్షమాపణలు చెప్పారు. ఈ క్రమంలోనే ఇజ్రాయెల్ సైన్యంపై చేసిన వ్యాఖ్యలను ఉపసంహరించుకుంటున్నట్లు ప్రకటించారు. ఇజ్రాయెల్‌పై అక్టోబర్ 7 వ తేదీన హమాస్ ఉగ్రవాదులు రాకెట్ల వర్షం కురిపించారు. నిమిషాల వ్యవధిలోనే గాజా స్ట్రిప్ నుంచి 5 వేల రాకెట్లు వచ్చి ఇజ్రాయెల్ భూభాగంలో పడ్డాయి. అయితే హమాస్ చేసిన దాడిని పసిగట్టడంలో ఇజ్రాయెల్ భద్రతా బలగాలు, సైన్యం విఫలమైందని తాజాగా బెంజమిన్ నెతన్యాహు పేర్కొనడం తీవ్ర వివాదానికి దారి తీసింది.

ఇంతటి భారీ దాడులు జరిగినా వాటిని ముందస్తుగా గుర్తించడంలో ఇంటెలిజెన్స్ సిస్టమ్ ఫెయిల్ అయిందని.. దాడి గురించి నిఘా వర్గాలు ముందుగానే హెచ్చరికలు జారీ చేయలేదని తాజాగా ట్విటర్ వేదికగా ఇజ్రాయెల్ ప్రధాని బెంజమిన్ నెతన్యాహు ఒక పోస్టు పెట్టారు. అయితే ఈ ట్వీట్ ప్రస్తుతం ఇజ్రాయెల్ వ్యాప్తంగా తీవ్ర విమర్శలకు దారి తీసింది. బెంజమిన్ నెతన్యాహు చేసిన ట్వీట్‌పై ఆయన సొంత కేబినెట్ మంత్రులు, రాజకీయ నేతలు, ప్రత్యర్థులు, సామాన్య ప్రజలు తీవ్ర స్థాయిలో మండిపడ్డారు. ఈ క్రమంలోనే తీవ్ర విమర్శలు వెల్లువెత్తడంతో తన వ్యాఖ్యలను వెనక్కి తీసుకున్నారు. ఈ సందర్భంగా సైన్యం, ఇజ్రాయెల్ డిఫెన్స్ ఫోర్స్‌ను ఉద్దేశించి తాను చేసిన వ్యాఖ్యలకు క్షమాపణలు చెబుతున్నట్లు బెంజమిన్ నెతన్యాహు పేర్కొన్నారు. ఈ క్రమంలోనే ఇజ్రాయెల్ సైన్యానికి తన పూర్తి మద్దతు ఉంటుందని ప్రకటించారు.

ప్రస్తుతం యుద్ధం జరుగుతున్న పరిస్థితుల్లో భద్రతా బలగాలపై బెంజమిన్ నెతన్యాహు నింద మోపుతున్నారని ఇజ్రాయెల్ ప్రతిపక్ష నేత యైర్‌ లాపిడ్‌ తీవ్ర విమర్శలు గుప్పించారు. ఈ సమయంలో ప్రధాని బాధ్యతారాహిత్యంగా వ్యవహరిస్తున్నారని మండిపడ్డారు. హమాస్‌, హిజ్బుల్లాకు వ్యతిరేకంగా ఇజ్రాయెల్‌ సైన్యం పోరాడుతోందని.. అలాంటి సమయంలో వాళ్లకు మద్దతుగా ఉండాల్సింది పోయి.. సైనిక బలగాల ఆత్మస్థైర్యాన్ని దెబ్బతీసేలా బెంజమిన్ నెతన్యాహు వ్యాఖ్యలు చేయడం సమంజసం కాదని తీవ్ర స్థాయిలో విరుచుకుపడ్డారు.

మరోవైపు.. గాజా స్ట్రిప్‌లోని హమాస్‌ స్థావరాలపై ఇజ్రాయెల్‌ ప్రతిదాడులతో తీవ్ర స్థాయిలో విరుచుకుపడుతోంది. ఇప్పటికే హమాస్‌ కీలక కమాండర్లను ఇజ్రాయెల్‌ దళాలు మట్టుబెట్టాయి. మరోవైపు తాము రెండో దశ యుద్ధంలోకి అడుగుపెట్టినట్లు ఇజ్రాయెల్ ప్రధాని బెంజిమన్‌ నెతన్యాహు ఇప్పటికే వెల్లడించారు. ఇక గాజాలోని అతిపెద్ద ప్రభుత్వ ఆస్పత్రి అయిన ఆల్‌ షిపాకు దగ్గర్లోనే ఇజ్రాయెల్‌ వైమానిక దళం దాడులు చేసింది. హమాస్‌ ఉగ్ర కార్యకలాపాలకు ఆస్పత్రిని ప్రధాన కార్యాలయంగా వాడుకుంటోందని ఇజ్రాయెల్‌ ఆరోపించిన కొన్ని గంటల్లోనే ఈ దాడులు చేసింది. ఈ దాడుల్లో ఆస్పత్రికి వెళ్లే రోడ్లు పూర్తిగా ధ్వంసమైనట్లు తెలుస్తోంది. మరోవైపు.. ఇప్పటివరకు గాజా స్ట్రిప్‌పై ఇజ్రాయెల్ జరిపిన దాడుల్లో ప్రాణాలు కోల్పోయిన వారి సంఖ్య 8 వేలకు చేరిందని గాజా ఆరోగ్య వర్గాలు తెలిపాయి.