కాంగ్రెస్ పార్టీలో చేరిన మాజీ మంత్రి ఎం మారెప్ప

కర్నూలు జిల్లాకు చెందిన వైఎస్సార్‌సీపీ నేత, మాజీ మంత్రి ఎం మారెప్ప కాంగ్రెస్‌లో చేరారు. ఈయన వై.ఎస్‌.రాజశేఖర్‌రెడ్డి హయాంలో రాష్ట్ర మంత్రిగా పని చేశారు. గతంలో కాంగ్రెస్‌ను వీడి వైఎస్సార్‌సీపీలో చేరారు. ఇప్పుడు మళ్లీ కాంగ్రెస్‌ పార్టీ కండువా కప్పుకున్నారు. విజయవాడలో ఏపీసీసీ అధ్యక్షుడు గిడుగు రుద్రరాజు, ఏఐసీసీ కార్యదర్శి క్రిస్టోఫర్‌ తిలక్‌లు ఆయనకు కండువా కప్పి పార్టీలోకి ఆహ్వానించారు. జమ్మలమడుగుకు చెందిన బ్రహ్మానందరెడ్డి, పెదకూరపాడుకు చెందిన పలువురు సైతం పార్టీలో చేరారు.

ప్రజోపయోగమైన మేనిఫెస్టోతో జనంలోకి వెళతామన్నారు పీసీసీ అధ్యక్షుడు గిడుగు రుద్రరాజు. బీసీ కుల గణనతోనే అన్ని వర్గాలకు సమాన అవకాశాలు లభిస్తాయన్నారు. ఏపీ కాంగ్రెస్‌ నూతన కమిటీ తొలి సమావేశం పీసీసీ కార్యాలయం ఆంధ్రరత్న భవన్‌లో జరిగింది. ఏఐసీసీ కార్యదర్శి, రాష్ట్ర కాంగ్రెస్‌ ఇంఛార్జ్ క్రిస్టోఫర్‌ తిలక్‌, సీడబ్ల్యుసీ సభ్యుడు ఎన్‌.రఘువీరారెడ్డి, రాజ్యసభ మాజీ సభ్యుడు కేవీపీ రామచంద్రరావు, తులసిరెడ్డి, చింతా మోహన్‌, జేడీ శీలం, కునుమూరి బాపిరాజు పాల్గొని పార్టీ భవిష్యత్తు కార్యక్రమంపై శ్రేణులకు దిశానిర్ధేశం చేశారు. కులాల వారీ జనగణనకు అనుకూలంగా సమావేశంలో తీర్మానం చేసినట్లు గిడుగు రుద్రరాజు చెప్పారు. వచ్చే ఎన్నికల్లో భావసారూప్యత కలిగిన పార్టీలతో కలిసి వెళతామన్నారు.. ఇప్పటికే సీపీఐ, సీపీఎం అగ్రనేతలతో భేటీ జరిగినట్లు తెలిపారు.

మూలింటి మారెప్ప కాంగ్రెస్ పార్టీలో చేరి రాజకీయాల్లోకి అడుగుపెట్టారు. 1999లో ఆలూరు నియోజకవర్గం నుండి కాంగ్రెస్ తరపున పోటీ చేసి తన సమీప ప్రత్యర్థి తెలుగుదేశం పార్టీ అభ్యర్థి మసాల ఈరన్న పై గెలిచి తొలిసారి ఎమ్మెల్యేగా అసెంబ్లీకి వెళ్లారు. 2009లో కాంగ్రెస్ తరపున పోటీ చేసి తన సమీప ప్రత్యర్థి తెలుగుదేశం పార్టీ అభ్యర్థి మసాల పద్మజ పై రెండోసారి ఎమ్మెల్యేగా గెలిచారు.. వైఎస్ రాజశేఖర్ రెడ్డి మంత్రివర్గంలో మార్కెటింగ్ శాఖ మంత్రిగా పని చేశారు.