ఏపీ అభివృద్ధి కేసీఆర్‌కు కనిపించలేదా,,, సజ్జల

పక్క రాష్ట్రంలో ఉన్న ముఖ్యమంత్రి కేసీఆర్ అక్కడ ఎన్నికల జరుగుతుంటే.. ఏపీలో రోడ్లు గురించి మాట్లాడం విచిత్రంగా ఉందన్నారు ప్రభుత్వ సలహాదారు సజ్జల రామకృష్ణారెడ్డి. తెలంగాణలో ఎన్నికలు ఉన్నందునే ఆ రాష్ట్ర సీఎం కేసీఆర్‌ ఏపీ గురించి మాట్లాడుతున్నారేమో అన్నారు. ఎన్నికల్లో గొప్పగా చెప్పుకోవడానికి కేసీఆర్‌ చిన్నచిన్న రోడ్ల గురించి మాట్లాడి ఉండొచ్చన్నారు. రాష్ట్రంలో వైఎస్‌ జగన్‌ ప్రభుత్వం గత నాలుగున్నరేళ్లలో సుపరిపాలన అందిస్తోందని.. ప్రజల ప్రశంసలు అందుకుంటోందన్నారు. రాష్ట్రంలో తెచ్చిన పథకాలను ఇతర రాష్ట్రాలు కూడా ఆదర్శంగా తీసుకుంటున్నాయన్నారు. రాష్ట్రంలో అమలు చేస్తున్న పింఛన్‌ పథకాన్ని కేసీఆరే మెచ్చుకొన్నారని.. వైఎస్‌ జగన్‌లాగా పెన్షన్‌ అందిస్తామని ఈ మధ్యనే చెప్పారన్నారు. పోలవరం విలీన మండలాల ప్రజలను మళ్లీ తెలంగాణలో కలుస్తారా.. అని అడిగితే వెళ్లబోమని అంటున్నారన్నారు. ఏపీలో అభివృద్ధి చూసి ఏపీలోకి వస్తున్నామని 7 గ్రామాల ప్రజలు చెబుతున్నారన్నారు. సీఎం వైఎస్‌ జగన్‌ అందిస్తున్న సంక్షేమ పథకాలు నచ్చాయని వారు చెబుతున్నారని..తాము పక్క వారి గురించి ఎప్పుడూ మాట్లాడబోమన్నారు.

హైదరాబాద్‌లో చంద్రబాబు ర్యాలీకి వచ్చిన వారంతా టీడీపీ కార్యకర్తలు మాత్రమే అన్నారు సజ్జల. వైఎస్సార్‌సీపీ సామాజిక సాధికార బస్సు యాత్రకు అంతకంటే ఎక్కువ మంది ప్రజలు వస్తున్నారన్నారు. లోకేష్ పాదయాత్రలో ఏనాడైనా జనం కనిపించారా అన్నారు. చంద్రబాబు రోగం వచ్చిందని కోర్టుకు చెప్పి జైలు నుంచి బయటకు వచ్చిన వ్యక్ అన్నారు. మర ఆయన 14 గంటలపాటు కారులో ఎలా కూర్చున్నారని మాత్రమే తాము అడిగామన్నారు. జబ్బులు ఉన్నాయని, ఆరోగ్యం బాగోలేదని కోర్టుకు అబద్ధాలు చెప్పారన్నారు. కోర్టు నిబంధనలను చంద్రబాబు పాటించలేదన్నారు. చంద్రబాబు కోసం అర్ధరాత్రి వరకు జనాలు రోడ్లు మీద ఉండి బ్రహ్మ రథం పట్టారని కొంతమంది వ్యాఖ్యలు చేయటం హాస్యాస్పదంగా ఉందన్నారు. హైదరాబాద్‌లో ఎక్కడ చూసినా ట్రాఫిక్ ఎక్కువగా ఉంటుందని.. ట్రాఫిక్ జామ్ ప్రాంతంలో చంద్రబాబు కాన్వాయ్ పెట్టి ప్రజలు భారీగా తరలివచ్చారని చెప్పటం సిగ్గుగా ఉందన్నారు. హైదరాబాద్‌లో చంద్రబాబు అని చూసేందుకు వచ్చింది గ్యాంగ్ మాత్రమే అన్నారు.