ఆఫీస్ బాయ్ సహా ఉద్యోగులకు కార్లు,,,ఉద్యోగులకు కంపెనీ దీపావళి బంపరాఫర్

హర్యానాలోని ఓ కంపెనీ ఉద్యోగులకు అదిరిపోయే ఆఫర్ ప్రకటించింది. దీపావళి సందర్భంగా ఉద్యోగులకు కార్లు గిఫ్ట్‌ వారిని ఆశ్చర్యంలో ముంచెత్తింది. ఈ మేరకు కంపెనీలో పని చేసే ఉద్యోగుల్లో 12 మందిని స్టార్ పర్మార్మర్లుగా బాస్ గుర్తించారు. దీంతో ఆ 12 మందికి దీపావళి పండగ సందర్భంగా కార్లను బహుమతులు ఇచ్చి సర్‌ప్రైజ్ చేశారు. కంపెనీ యజమాని ఇచ్చిన అదిరిపోయే గిఫ్ట్‌తో ఆ 12 ఉద్యోగులకు పండగ సంతోషం రెట్టింపు అయింది. అయితే ఈ 12 మందిలో కంపెనీలో పనిచేసే ఆఫీస్ బాయ్ కూడా ఉండటం విశేషం.

హర్యానాలోని పంచకులలోని మిట్స్ హెల్త్ కేర్ ఫార్మాస్యూటికల్ కంపెనీ తాజాగా సంచలన నిర్ణయం తీసుకుంది. ఆ కంపెనీ యజమాని ఎంకే భాటియా తన ఉద్యోగులను సెలబ్రిటీలుగా పేర్కొంటూ.. 12 మంది స్టార్ పెర్ఫార్మర్స్‌కి కార్లను బహూకరించాడు. అయితే దీపావళి గిఫ్ట్‌గా కారు అందుకున్న వారిలో కొందరికి డ్రైవింగ్ కూడా రాదని ఉద్యోగులు తెలిపారు. తమకు ఇలా కంపెనీ కారును గిఫ్ట్‌గా ఇస్తుందని తాము కలలో కూడా ఊహించలేదని ఉద్యోగులు తమ ఆనందాన్ని వ్యక్తం చేశారు.

మిట్స్ హెల్త్ కేర్ ఫార్మాస్యూటికల్ కంపెనీ త్వరలోనే ఆ కంపెనీలో పని చేస్తున్న మరో 38 మంది ఉద్యోగులకు కూడా కార్లను అందించాలని యోచిస్తున్నట్లు తెలుస్తోంది. అయితే ఈ దీపావళి బహుమతి కింద కారు అందుకున్న వారిలో ఒక ఆఫీస్ బాయ్ కూడా ఉండటం గమనార్హం. తన కంపెనీ విజయానికి ఉద్యోగుల కఠిన శ్రమ, అంకితభావం, విధేయత కారణమని.. అందుకే వారిని ఘనంగా సత్కరించాలని నిర్ణయించుకున్నట్లు ఎండీ ఎంకే భాటియా వెల్లడించారు. అయితే ఆ 12 మందిలో కొంతమంది కంపెనీ స్థాపించినప్పటి నుంచి తన వెంటే ఉన్నారని పేర్కొన్నారు. ఈ కార్లు కేవలం దీపావళి గిఫ్ట్‌లు మాత్రమే కాదని.. తన కంపెనీపై వారికి ఉన్న విశ్వాసం, నిబద్ధతకు రివార్డులు అంటూ చెప్పారు.

అయితే ఈ కార్లను నెల రోజుల క్రితమే ఎంకే భాటియా కొనుగోలు చేసి ఉద్యోగులకు అందజేశారు. అయితే ఆ వీడియోలను తాజాగా సోషల్ మీడియాలో విడుదల చేయడంతో ఈ విషయం వెలుగులోకి వచ్చింది. భవిష్యత్తులో కార్లు ఇచ్చే సంఖ్యను 12 నుంచి 50కి పెంచే ఆలోచన ఉందని తెలిపారు. ఇక ఆ ఉద్యోగులకు టాటా పంచ్ కారును ఎంకే భాటియా అందజేశారు. 2021లో విడుదలైన టాటా పంచ్‌ కారు.. ప్రారంభ ధర రూ.6 లక్షల నుంచి మొదలవుతుంది.