కర్ణాటక ముఖ్యమంత్రిగా డీకే శివకుమార్,,,,,రెండున్నరేళ్ల తర్వాత బాధ్యతలు తీసుకుంటారని వార్తలు

కర్ణాటకలో కాంగ్రెస్ పార్టీ విజయం సాధించి ప్రభుత్వాన్ని ఏర్పాటు చేసింది. సీఎంగా సిద్ధరామయ్య ప్రమాణ స్వీకారం కూడా చేసి పాలన కొనసాగిస్తున్నారు. అయితే ఎన్నికల ముందు నుంచే సీఎం ఎవరు అనే విషయంపై భిన్నాభిప్రాయాలు వ్యక్తం అయ్యాయి. ఈ క్రమంలోనే పార్టీ అధికారంలోకి వచ్చిన తర్వాత సీనియర్ నేతలు సిద్ధరామయ్య, డీకే శివకుమార్ ముఖ్యమంత్రి కుర్చీ కోసం పోరాటం చేయగా.. చివరికి కాంగ్రెస్ పార్టీ అధిష్ఠానం అనుభవజ్ఞుడు అయిన సిద్ధరామయ్యకే ఓటు వేసింది. అయితే మొదటి రెండున్నరేళ్లు సిద్ధరామయ్య.. ఆ తర్వాత డీకే శివకుమార్‌లు సీఎం కుర్చీని పంచుకుంటారనే వార్తలు పార్టీ వర్గాల్లో తీవ్ర చర్చకు దారి తీశాయి. అలాంటిదేమీ లేదని పార్టీ అధిష్ఠానం, అగ్రనేతలు చెప్పినా ఈ ఊహాగానాలకు మాత్రం తెరపడటం లేదు.

తాజాగా మరోసారి కర్ణాటక సీఎంగా డీకే శివకుమార్ రెండున్నరేళ్ల తర్వాత ముఖ్యమంత్రిగా ప్రమాణ స్వీకారం చేయనున్నారనే వార్తలు గుప్పుమంటున్నాయి. ఈ క్రమంలోనే ఆ ఊహాగానాలకు తెరదించేలా డీకే శివకుమార్ కీలక వ్యాఖ్యలు చేశారు. కర్ణాటకలో రెండున్నరేళ్ల తర్వాత ముఖ్యమంత్రిని మారుస్తారనే ఊహగానాలను డీకే శివకుమార్‌ తోసిపుచ్చారు. కాంగ్రెస్‌ పార్టీ నేతల్లో అసంతృప్తి లేదని స్పష్టం చేశారు. ఈ క్రమంలో బీజేపీపై డీకే శివకుమార్ తీవ్ర విమర్శలు చేశారు. కర్ణాటకలో బీజేపీకి సరైన దిశానిర్దేశం చేసే నేతలు కరవయ్యారని ఎద్దేవా చేశారు.

ఈ నేపథ్యంలోనే తమ పార్టీలోనే కాదు.. బీజేపీలోనే అసంతృప్తి ఉందని పేర్కొన్నారు. అందుకే ఇప్పటికీ అసెంబ్లీలో ఫ్లోర్‌ లీడర్‌ను కూడా బీజేపీ ఎన్నుకోలేదని విమర్శించారు. ఏ రాష్ట్రంలోనైనా ఇలాంటి పరిస్థితి ఉందా.. ఎన్నికలు జరిగి ప్రభుత్వం ఏర్పడిన తర్వాత కూడా.. ప్రతిపక్ష పార్టీ తమ ఫ్లోర్ లీడర్‌ను ఎన్నుకోలేదు అంటే.. ఆ పార్టీ నేతల్లో ఎంత అసంతృప్తి ఉందో అర్థమవుతుందని శివకుమార్ విమర్శలు చేశారు.

అయితే అంతకుముందు సీఎం మార్పుపై సిద్ధరామయ్య గురువారం మాట్లాడారు. ఎవరో చేసిన వ్యాఖ్యలకు ఎందుకు ప్రాధాన్యం ఇస్తున్నారని ఊహాగానాలను కొట్టిపారేశారు. ఐదేళ్ల పాటు కాంగ్రెస్‌ పార్టీ అధికారంలో ఉంటుందని.. తానే సీఎంగా ఉంటానని స్పష్టం చేశారు. ఇక కర్ణాటకలో మరో ముగ్గురు డిప్యూటీ సీఎంలను నియమిస్తారని వస్తున్న వార్తలపైనా సిద్ధరామయ్య స్పందించారు. ముగ్గురు డిప్యూటీ సీఎంలు అని ఎవరు చెప్పారని.. కాంగ్రెస్‌ అనేది జాతీయ పార్టీ అని.. ఏదైనా అలాంటి నిర్ణయం ఉంటే హైకమాండ్‌ చూసుకుంటుందని తెలిపారు. అది సీఎం గానీ, ఎమ్మెల్యేలు గానీ నిర్ణయించే అంశం కాదని ఊహాగానాలను కొట్టిపారేశారు.