మహిళా జడ్జికి మరణశిక్ష విధించాలని పిటిషన్.. హైకోర్టు ఏం చేసిందంటే

తాను వేసిన పిటిషన్‌ను కొట్టివేసింనందుకు ఏకంగా ఓ మహిళా జడ్జికే మరణ శిక్ష విధించాలని ఓ వ్యక్తి ఢిల్లీ హైకోర్టును ఆశ్రయించాడు. ఈ పిటిషన్‌ను కొట్టివేసిన ఢిల్లీ హైకోర్టు.. ఆ వ్యక్తికి శిక్ష విధించింది. కోర్టును, జడ్జిని కించపరచడంతోపాటు కోర్టు ధిక్కారానికి పాల్పడినట్లు తేల్చింది. దీంతో ఆ వ్యక్తికి ఆరు నెలల జైలు శిక్ష వేసింది. దీంతోపాటు రూ. 2 వేల ఫైన్ విధించింది. జరిమానా చెల్లించకపోతే మరో 7 రోజుల పాటు జైలు శిక్ష కొనసాగించాలని ఆదేశించింది. పంజాబ్‌లోని పఠాన్‌కోట్‌కు చెందిన నరేష్ శర్మ.. ఢిల్లీ హైకోర్టులో ఈ పిటిషన్‌ దాఖలు చేశారు. తనతోపాటు భారత ప్రజలపై తీవ్ర నేరాలకు పాల్పడ్డారని ప్రభుత్వాలు సహా వివిధ విభాగాలపై కేసులు నమోదు చేయాలని పిటిషన్ వేశాడు. కేంద్ర ప్రభుత్వం, ఢిల్లీ, ముంబై, బెంగళూరు పోలీసులు.. సర్ దొరాబ్జీ టాటా ట్రస్ట్, సర్ రతన్ టాటా ట్రస్ట్, కేంద్ర ప్రభుత్వ మంత్రిత్వ శాఖలు, డిపార్ట్‌మెంట్‌లపై తక్షణమే క్రిమినల్ కేసు నమోదు చేసి విచారణ చేయాలని డిమాండ్‌ చేశాడు.

ఈ పిటిషన్‌ను ఢిల్లీ హైకోర్టు సింగిల్‌ జడ్జి కొట్టివేసింది. దీంతోపాటు నరేశ్ శర్మ జరిమానా విధించింది. ఈ తీర్పును పిటిషనర్ డివిజన్‌ బెంచ్‌కు అప్పీల్‌ చేశాడు. తనకు పరువు నష్టం కలిగించడంతోపాటు దేశద్రోహ నిర్ణయం తీసుకున్న ఢిల్లీ హైకోర్టు సింగిల్ జడ్జికి మరణశిక్ష విధించాలని ఢిల్లీ హైకోర్టు డివిజన్ బెంచ్‌కు దాఖలు చేసిన నరేశ్ శర్మ పిటిషన్‌లో కోరాడు. ఆ మహిళా జడ్జిపై పోలీస్‌ కేసు నమోదు చేసి విచారణ జరపాలని డిమాండ్‌ చేశాడు. మరోవైపు ఈ పిటిషన్‌ను పరిశీలించిన ఇద్దరు సభ్యుల ధర్మాసనం అప్పీల్‌ చేసిన వ్యక్తికి ఆగస్ట్‌లో షోకాజ్ నోటీస్‌ జారీ చేసింది. హైకోర్టు మహిళా జడ్జిపై నిరాధార ఆరోపణలు చేయడంతోపాటు ఆమెను దయ్యంతో పోల్చినందుకు అతడిపై కోర్టు ధిక్కార చర్యలు ఎందుకు తీసుకోకూడదని నోటీస్‌లో ప్రశ్నించింది. ముంబై, ఐఐటీ కాన్పూర్‌తోపాటు అమెరికాలోని టాప్ యూనివర్సిటీల్లో చదివిన పిటిషనర్ నరేష్ శర్మకు భారత రాజ్యాంగం, భారత చట్టాలపై గౌరవం లేకపోవడంపై జస్టిస్ సురేష్ కుమార్ కైట్ నేతృత్వంలోని ధర్మాసనం తీవ్ర ఆగ్రహం వ్యక్తం చేసింది. న్యాయ వ్యవస్థ గౌరవాన్ని దిగజార్చడం, అనాగరిక పద్ధతిలో పిటిషన్‌ దాఖలు చేయడంపై తీవ్ర స్థాయిలో మండిపడింది. వీటితోపాటు సిట్టింగ్ జడ్జిని కించపరిచే పదజాలం వాడినందుకు.. కోర్టు ధిక్కారానికి పాల్పడినందుకు ఢిల్లీ హైకోర్టు ధర్మాసనం నరేష్ శర్మకు ఆరు నెలలు జైలు శిక్ష, రూ. 2 వేల జరిమానా విధించింది. ఆ జరిమానా చెల్లించకపోతే మరో ఏడు రోజులు జైలులో ఉంచాలని అక్టోబర్‌ 31 వ తేదీన తీర్పు ఇచ్చింది. నరేష్ శర్మను అదే రోజు తీహార్‌ జైలుకు పంపాలని ఆదేశాలు జారీ చేస్తూ తుది తీర్పునిచ్చింది.