విజయవాడ దుర్గమ్మకు భారీగా ఆదాయం,,,విదేశీ కరెన్సీ, బంగారం, వెండి వస్తువులు
Andhra Pradesh Telugu | Suryaa Desk | Published : Sat, Nov 04, 2023, 11:33 PM
విజయవాడ ఇంద్రకీలాద్రిపై దుర్గామల్లేశ్వరస్వామి దేవస్థానంలో హుండీ లెక్కింపు జరిగింది. దసరా నవరాత్రి ఉత్సవాలకు తరలివచ్చిన భక్తులు అమ్మవారిని దర్శించుకుని హుండీల ద్వారా సమర్పించిన కానుకలను లెక్కించగా రూ.8,73,53,943లు సమకూరినట్టు ఈవో కేఎస్‌ రామారావు తెలిపారు. బంగారం 994 గ్రాములు, వెండి 38 కేజీల 395 గ్రాములు భక్తులు అమ్మవారికి సమర్పించినట్లు పేర్కొన్నారు. హుండీలలోని కానుకలను ఈవో కేఎస్‌ రామారావు ఆధ్వర్యంలో మహామండపం ఆరో అంతస్తులో మూడు రోజులపాటు లెక్కించారు. తొలిరోజు రూ.2,58,64,740లు, బంగారం 367 గ్రాములు, వెండి 8 కేజీల 745 గ్రాములు వచ్చినట్టు చెప్పారు. రెండోరోజు రూ.3,36,60,500లు, బంగారం 362 గ్రాములు, వెండి 8 కేజీల 950 గ్రాములు వచ్చినట్టు చెప్పారు. మూడోరోజు రూ.2,78,28,703లు, బంగారం 265 గ్రాములు, వెండి 10 కేజీల 700 గ్రాములు వచ్చినట్టు ఈవో వెల్లడించారు. ఈ-హుండీల ద్వారా రూ.1,97,207లు సమకూరాయని చెప్పారు. యూఎస్ 351 డాలర్లు, కెనడా 80 డాలర్లు, ఆస్ట్రేలియా 50 డాలర్లు, ఫ్రాన్స్‌ 10 యూరోలు, సింగపూర్‌ 7 డాలర్లు, న్యూజిలాండ్‌ 20 డాలర్లు, చైనా 1యువన్‌, మలేషియా 5 రింగెట్లు, ఒమాన్‌ 300 బైసాలు, ఖతార్‌ 1 రియాల్‌, యూఏఐ 180 దిర్హమ్స్‌, కువైట్‌ 6 దినార్లు భక్తులు అమ్మవారికి సమర్పించినట్టు ఈవో తెలిపారు. దేవదాయ శాఖ ఎన్టీఆర్‌ జిల్లా అధికారిణి శాంతి, ఎస్‌పీఎఫ్‌, పోలీసుసిబ్బంది పర్యవేక్షించారు.
|
|