రైలును హైజాక్‌ చేసి.. అరగంటలో రూ.500 కోట్ల దోపిడీ చేశారు!

ఆరు దశాబ్దాల కిందట రైలును హైజాక్ చేసిన 15 మంది దొంగల ముఠా.. అరగంటలో 2.6 మిలియన్ పౌండ్లు ( ప్రస్తుత విలువ రూ.500 కోట్లు) దోచేసింది. బ్రిటన్‌లో 1963 ఆగస్టు 8న ఈ దోపిడీ జరగ్గా.. ఆ ముఠాలోని చివరి వ్యక్తి బాబీ వెల్చ్‌ తాజాగా మృతి చెందాడు. దాంతో ‘గ్రేట్‌ ట్రైన్‌ రాబరీ’ కథనం మరోసారి వైరల్‌గా మారింది. బ్రిటన్‌లో సంచలనం సృష్టించిన నాటి ఘటనపై అంతర్జాతీయ మీడియా తాజాగా కథనాలు ప్రచురించింది. తెల్లవారుజామున 3 గంటలకు ట్రైన్‌ హైజాక్ చేసిన ముఠా.. కేవలం 30 నిమిషాల్లోనే దోపిడీని పూర్తిచేయడం గమనార్హం.

ఎన్‌సైక్లోపీడియా బ్రిటానికా ప్రకారం.. 1963 ఆగస్టు 8న ఉత్తర లండన్‌లోని బ్రిడెగో వంతెన సమీపంలో దోపిడీ చోటుచేసుకుంది. పెద్ద మొత్తంలో నగదుతో వెళ్తోన్న గ్లాస్గో-లండన్‌ రాయల్‌ మెయిల్‌‌ను ముఠా హైజాక్‌ చేసింది. నగదు గురించి ముందస్తు సమాచారం తెలుసుకున్న 15 మంది ఒక ముఠాగా ఏర్పడి.. భారీ దోపిడీకి ప్లాన్ చేశారు. ఇందులో భాగంగా తొలుత రైలు సిగ్నల్ వ్యవస్థ గురించి క్షుణ్ణంగా తెలుసుకున్నారు. లైన్‌ సైడ్ సిగ్నల్‌ను ట్యాంపర్‌ చేసి, రైలు నిలిచిపోయేలా చేశారు. హెల్మెట్లు, మాస్క్‌లు, గ్లౌజులు ధరించి మొత్తం 150 గోనె సంచులతో రైలులోకి ప్రవేశించారు.

అనంతరం లోకో పైలట్‌, కో పైలట్‌పై దాడికి పాల్పడ్డారు. అనంతరం రైల్లోని 130 బాక్సుల్లోని 2.6 మిలియన్‌ పౌండ్ల సొత్తును దోచుకెళ్లారు. ఇదంతా కేవలం 30 నిమిషాల్లోనే పూర్తిచేసి పరారయ్యారు. ఈ మొత్తాన్ని ల్యాండ్‌ రోవర్‌ కార్లలో ఒక ఫాంహౌస్‌కు తరలించి, అక్కడే వాటాలు పంచుకున్నారు. దోపిడీ గురించి ఎటువంటి ఆధారాలు దొరక్కుండా ఉండాలనే ఆలోచనతో ఆ ఫాంహౌస్‌ను తగులబెట్టాలని నిర్ణయించుకున్నారు. అందుకోసం ఆరుగురు కిరాయి వ్యక్తులను నియమించారు. సరిగ్గా అక్కడే వారి ప్లాన్ తారుమారయ్యింది.

ఫౌంహౌస్‌‌ను వారు అసంపూర్తిగా తగలబెట్టడంతో పోలీసులకు కొన్ని వేలిముద్రలు లభ్యమయ్యాయి. అప్పటికే మరి కొన్ని ఆధారాలు సేకరించిన పోలీసులు.. ఈ వేలి ముద్రల సహాయంతో 12 మందిని అరెస్టు చేశారు. కానీ, ఆ ముఠాలోని కీలక సభ్యుడైన రోన్నీ బిగ్స్ కొద్దిరోజులకే జైలు నుంచి తప్పించుకున్నాడు. అనంతరం ప్లాస్టిక్‌ సర్జరీ చేయించుకొని ఫ్రాన్స్‌, ఆస్ట్రేలియా, బ్రెజిల్‌‌ల్లో కొన్నాళ్లు గడిపి చివరకు 2001లో యూకే చేరుకున్నాడు. కానీ, అతడ్ని పోలీసులు గుర్తించి అరెస్ట్ చేయగా.. డిసెంబరు 2013లో లండన్‌లోని ఒక కేర్‌ హోంలో మృతి చెందాడు.

అలాగే, దోపిడీకి నాయకత్వం వహించిన బ్రూస్‌ రేనాల్డ్స్‌.. శిక్ష పూర్తయిన తర్వాత జైలు నుంచి విడుదలయ్యాడు. 1995లో ‘ఆటో బయోగ్రఫీ ఆఫ్ థీఫ్‌’ అనే పుస్తకాన్ని రాసిన అతడు కూడా 2013లోనే చనిపోయాడు. ఈ ముఠాలోని మరో వ్యక్తి రొనాల్డ్‌ ఎడ్వర్డ్స్‌ జైలు నుంచి విడుదలైన తర్వాత ఫ్లవర్ బొకేలను అమ్ముకుంటూ జీవనం సాగించాడు. కానీ, 1994లో ఉరి వేసుకొని ఆత్మహత్యకు పాల్పడ్డాడు. దోపిడీ ముఠాలో చివరి వ్యక్తి అయిన బాబీ వెల్చ్‌ ఇటీవల వయోభారం వల్ల అనారోగ్యంతో కన్నుమూశాడు.

వెల్చ్‌కు 30 ఏళ్ల జైలు శిక్ష పడినప్పటికీ.. ముందుగానే 1976లో జైలు నుంచి విడుదలయ్యాడు. తర్వాత కాలుకు జరిగిన శస్త్రచికిత్స విఫలం కావడంతో వీల్‌ ఛైర్‌కే పరిమితమయ్యాడు. ఈ ముఠాకు చెందిన మరో ముగ్గురు వ్యక్తులు తప్పించుకోగా.. వారిలో ఒకరి గురించి ఎలాంటి సమాచారం తెలియలేదు. కాగా, దోపిడీకి పాల్పడిన వ్యక్తులు పట్టుబడినా.. వారి వద్ద సొత్తులో చాలా వరకు తిరిగి స్వాధీనం చేసుకోలేదట!