గంజాయి తరలిస్తూ పట్టుబడిన పోలీస్,,,,వేరే రాష్ట్రం నుంచి తీసుకువచ్చి విక్రయం

గంజాయిని అక్రమంగా రవాణా చేసేందుకు ముఠాలు కొత్త కొత్త స్కెచ్‌లు వేస్తూ ఉంటాయి. అయితే వారి ఆట కట్టించేందుకు పోలీసులు ఎత్తులకు పై ఎత్తులు వేసి.. గంజాయి తరలింపును అడ్డుకుంటూ ఉంటారు. అలాంటి పోలీసే గంజాయి ముఠాతో చేతులు కలిపాడు. కలపడమే కాదు.. తానే స్వయంగా రంగంలోకి దిగాడు. ఒక రాష్ట్రం నుంచి గంజాయిని కొనుగోలు చేసి మరో రాష్ట్రంలో విక్రయిస్తున్నాడు. ఈ క్రమంలోనే పోలీసులు జరిపిన తనిఖీల్లో గంజాయితో సహా ఆ పోలీస్ రెడ్ హ్యాండెడ్‌గా పట్టుబడ్డాడు. ఆ తర్వాత కూడా తప్పించుకునేందుకు ప్రయత్నించినా.. ఫలించక పోలీసుల చేతికి చిక్కాడు.

కర్ణాటక రాజధాని బెంగళూరులోని జిగానీ పోలీస్ స్టేషన్‌లో ఆనంద్ కే అనే కానిస్టేబుల్ విధులు నిర్వర్తిస్తున్నాడు. అయితే ఈ ఆనంద్ వృత్తి కానిస్టేబుల్ ఉద్యోగం కాగా.. ప్రవృత్తి మాత్రం గంజాయి అక్రమ రవాణా. ఒక వైపు కానిస్టేబుల్‌ డ్యూటీ చేస్తూనే.. మరోవైపు.. గంజాయి స్మగ్లింగ్ చేస్తున్నాడు. ఈ క్రమంలోనే ఒడిశా పోలీసులకు అడ్డంగా బుక్ అయ్యాడు. ఆనంద్‌తోపాటు అతని ముగ్గురు అనుచరులను కూడా ఒడిశా పోలీసులు అదుపులోకి తీసుకున్నారు. వారి నుంచి 17.5 కిలోల గంజాయిని స్వాధీనం చేసుకున్నారు.

ఈనెల 1 వ తేదీన ఒడిశాలోని కంధమాల్ నుంచి బెర్హంపూర్‌ పట్టణానికి గంజాయి తరలించేందుకు ఆనంద్, అతని అనుచరులు ప్రయత్నించారు. ఈ క్రమంలోనే నలుగురు వ్యక్తులు కంధమాల్‌ పట్టణంలోని సారంగగడ బస్టాప్‌ వద్ద బ్యాగులతో అనుమానాస్పదంగా కనిపించారు. ఈ క్రమంలోనే అక్కడ విధుల్లో ఉన్న పోలీసులు.. ఆ నలుగురిని చూసి.. వారి ప్రవర్తనను చూసి అనుమాన పడ్డారు. వెంటనే వారి చేతుల్లో ఉన్న బ్యాగులను తనిఖీ చేయడంతో అసలు విషయం బయటికి వచ్చింది.

వారి బ్యాగుల్లో ఎండు గంజాయి పూలు ఉన్నట్లు గుర్తించారు. దాదాపు 17.5 కిలోల ఎండు గంజాయి పూలను స్వాధీనం చేసుకుని ఆనంద్‌తోపాటు మరో ముగ్గురు వ్యక్తులను అరెస్ట్ చేశారు. అయితే గంజాయితో అడ్డంగా దొరికిన తర్వాత ఒడిశా పోలీసులను మోసం చేసేందుకు ఆనంద్ ప్రయత్నించాడు. అది ఓ గంజాయి స్మగ్లర్ ఇంటిని తనిఖీలు చేయగా.. స్వాధీనం చేసుకున్న గంజాయి అని కట్టుకథ చెప్పాడు. అయితే అది నమ్మని ఒడిశా పోలీసులు విచారణ చేపట్టగా అందులో అసలు విషయం బయటికి వచ్చింది. కానిస్టేబుల్ ఆనంద్.. ఒడిశా నుంచి గంజాయిని బెంగుళూరుకు తరలించి కిలో రూ. 20 నుంచి 30 వేలకు విక్రయిస్తున్నట్లు వెల్లడైంది. దీంతో ఒడిశా పోలీసులు కేసు నమోదు చేశారు.