తిరుమల ఎక్స్‌ప్రెస్‌లో పేలుడు కలకలం,,,,బాణసంచా పేలడంతో భయం, భయం
Andhra Pradesh Telugu | Suryaa Desk | Published : Tue, Nov 07, 2023, 09:34 PM
తిరుమల ఎక్స్‌ప్రెస్‌లో బాణసంచా పేలుడు కలకలంరేపింది. విశాఖపట్నం నుంచి తిరుపతి వెళ్లే తిరుమల ఎక్స్ప్రెస్ రైల్లో ఓ సంచీలో ఉన్న బాణసంచా పేలాయి. భారీగా పొగలు రావడం కలకలం రేగింది. సోమవారం విశాఖ నుంచి తిరుమల ఎక్స్ప్రెస్ బయల్దేరింది.. సాయంత్రం 4 గంటల సమయంలో తుని స్టేషన్‌లో ఆగింది. తిరిగి రైలు బయలుదేరుతున్న సమయంలో ఎస్‌ 3 బోగీలోని మరుగుదొడ్డి దగ్గర ఉన్న సంచిలో నుంచి పొగలు వచ్చాయి. ప్రయాణికులు గమనించి భయంతో పరుగులు తీశారు.
కొంతమంది చైన్ లాగి రైలును ఆపారు. వెంటనే బాణసంచా పేలకుండా ప్రయాణికులు కాళ్లతో తొక్కి ఆ సంచీని బయట పడేశారు. అప్పటికీ బోగీలో పొగ వస్తుండటంతో కాళ్లతో తొక్కి అదుపు చేశారు. ఈ సమాచారం అందుకున్న ఆర్పీఎఫ్‌, రైల్వే సిబ్బంది బోగీని పరిశీలించారు. అక్కడి నుంచి రైలు బయల్దేరి వెళ్లిపోయింది. ట్రాక్‌ పక్కన పడి ఉన్న బాణసంచాను జీఆర్పీ సిబ్బంది తొలగించారు. గుర్తుతెలియని ప్రయాణికుడు ఓ సంచిలో బాణసంచా, మందులు తీసుకువెళ్తుండగా స్వల్ప పేలుడు జరిగినట్లు చెబుతున్నారు. వెంటనే గుర్తించడంతో పెద్ద ప్రమాదమే తప్పింది.
|
|