సిరియాలోని ఇరాన్ స్థావరంపై అమెరికా వైమానిక దాడి.. 9 మంది మృతి

అమెరికా సిబ్బందిపై దాడులకు ప్రతిస్పందనగా తూర్పు సిరియాలోని ఇరాన్‌తో సంబంధం ఉన్న ఆయుధ నిల్వ కేంద్రంపై అమెరికా యుద్ధ విమానాలు బుధవారం దాడి చేశాయని యూఎస్ రక్షణ శాఖ మంత్రి లాయిడ్ ఆస్టిన్ వెల్లడించారు. మధ్య ఆసియాలోని తన దళాలపై దాడులు పెరగడం వెనుక ఇరాన్‌‌తో సంబంధం ఉన్న సాయుధ గ్రూప్‌లు ఉన్నాయనే ఆరోపణలతో సిరియాలో ఒక ప్రదేశాన్ని అమెరికా లక్ష్యంగా చేసుకోవడం దాదాపు రెండు వారాల్లో ఇది రెండోసారి.

ఇజ్రాయేల్-హమాస్ పోరాటాన్ని ప్రాంతీయ యుద్ధంగా మార్చకుండా ఇరాన్, దాని మద్దతుదారులను అరికట్టడానికి అమెరికా ప్రయత్నిస్తోంది. అయితే, పదేపదే దాడులతో అగ్రరాజ్యం, ఇరాన్ మధ్య వివాదం ఏర్పడే ప్రమాదం ఉంది. ‘ఇరాన్ ఇస్లామిక్ రివల్యూషనరీ గార్డ్ కార్ప్స్ , అనుబంధ గ్రూపులు ఉపయోగించే తూర్పు సిరియాలోని ఒక స్థావరంపై యూఎస్ సైనిక దళాలు ఆత్మరక్షణ దాడిని చేపట్టాయి.. ఆయుధ నిల్వ కేంద్రంపై రెండు F-15 యుద్ధ విమానాలు దాడిచేశాయి’ అని లాయిడ్ ఆస్టిన్ ఒక ప్రకటనలో తెలిపారు.

‘ఈ ఖచ్చితమైన స్వీయ-రక్షణ దాడి IRGC-Quds ఫోర్స్ అనుబంధ సంస్థలు ఇరాక్, సిరియాలోని తమ సిబ్బందిపై పలు దాడులకు ప్రతిస్పందన.. మా ప్రజలు, సౌకర్యాల రక్షణ కోసం మరిన్ని అవసరమైన చర్యలు అమెరికా తీసుకోవడానికి పూర్తిగా సిద్ధంగా ఉంది’ అని ఆయన ఉద్ఘాటించారు. ‘బహుళ విభాగాల ద్వారా చాలా స్పష్టమైన సందేశంతో దాడులను మిళితం చేయడం జరిగింది. ఇరాన్ సీనియర్ నాయకులకు మా సందేశం ఏమిటంటే.. మీ మద్దతుదారులు, మిలీషియా సమూహాలు మాపై దాడి చేయడం మానేయాలని మేము కోరుకుంటున్నాం’ అని అమెరికా రక్షణ శాఖ సీనియర్ అధికారి ఒకరు తెలిపారు.

బుధవారం జరిగిన దాడిలో ఇరాన్-మద్దతు గ్రూపులతో అనుబంధంగా ఉన్న తొమ్మిది మంది మరణించినట్టు సిరియన్ అబ్జర్వేటరీ ఫర్ హ్యూమన్ రైట్స్ వార్ మానిటర్ తెలిపింది. డీర్ ఎజోర్ ప్రావిన్స్‌లోని స్థావరం నిఘాలో ఉందని, అందువల్ల అమెరికా తక్కువ ప్రాణనష్టంతో దాడి చేయడానికి సమయాన్ని ఎంచుకోవచ్చని సీనియర్ అమెరికన్ మిలిటరీ అధికారి ఒకరు చెప్పారు. ‘మేము కేవలం అక్కడ ఉండేవారిని గరిష్టంగా ట్రాక్ చేస్తున్నాం.. దాడికి ముందు మాకు ఎటువంటి నిర్ధారణ లేదు’ అని ఆ అధికారి తెలిపారు.

అక్టోబరు 26న అమెరికా మిలిటరీ కూడా సిరియాలోని IRGC, అనుబంధ సమూహాలు ఉపయోగించే రెండు స్థావరాలపై దాడిచేసింది. అయితే ఆ దాడుల వల్ల ప్రాణనష్టం జరగలేదని అంచనా వేసింది. ఇటీవలి దాడి మాదిరిగానే అక్టోబరు 17 నుంచి 40 కంటే ఎక్కువ సార్లు రాకెట్లు, డ్రోన్‌లతో లక్ష్యంగా చేసుకుని అమెరికా సిబ్బందిపై చేసిన దాడులకు ప్రతిస్పందనగా ఈ చర్యలు చేపట్టినట్టు వాషింగ్టన్ తెలిపింది.