పరవాడ ఆర్మీ జవాన్‌పై దౌర్జన్యం,,,,నలుగురు కానిస్టేబుళ్లు సస్పెండ్

రాష్ట్ర వ్యాప్తంగా సంచలనం సృష్టించిన అనకాపల్లి పరవాడ పోలీసుల వ్యవహారంపై పోలీసు శాఖ కఠినచర్యలు తీసుకుంది. సంతబయలులో జవానుపై దాడి చేసిన నలుగురు సిబ్బందిని సస్పెండ్ చేస్తూ జిల్లా ఎస్పీ మురళీకృష్ణ ఉత్తర్వులు జారీచేశారు. కానిస్టేబుళ్లు ముత్యాలనాయుడు, శోభా తో పాటు మరో ఇద్దరు కానిస్టేబుళ్లును తక్షణమే సస్పెండ్ చేయాల్సిందిగా రేంజ్ డీఐ‌జీ, జిల్లా ఎస్పీలకు డీజీపీ రాజేంద్రనాథ్ రెడ్డి ఆదేశాలు జారీ చేశారు. పోలీసులు ప్రజలకు రక్షణగా నిలవాలి కాని వారిపైన దాడి చేయడం క్షమించరాని నేరం. ఇలాంటి ఘటనలకు పాల్పడే పోలీసులపై కఠిన చర్యలు తీసుకోవడం జరుగుతుందని తెలిపారు. పోలీసులు ప్రజలతో స్నేహంగా మెలగాలని.. ఈ తరహా ఘటనల్ని ఉపేక్షించేది లేదని స్పష్టం చేశారు జిల్లా ఎస్పీ. సత్ప్రవర్తన లేని పోలీసులపై కఠినచర్యలు తప్పవని హెచ్చరించారు. ఎస్పీ కార్యాలయంలో జరిగిన విలేకరుల సమావేశంలో డీఐజీ పి.హరికృష్ణతో కలిసి ఆయన కేసు వివరాలను వెల్లడించారు.

అనకాపల్లి జిల్లా పరవాడ సంతబయలు వద్ద ఆర్మీజవాన్‌ సయ్యద్ అలీముల్లాతో దిశ యాప్ డౌన్‌లోడ్ చేయించిన పోలీసులు తదనంతరం తలెత్తిన గొడవలో అతడిపై చేయిచేసుకున్నారు. తాను ఆర్మీ జవానునని చెప్పినా వినిపించుకోకుండా మాకే ఎదురు చెబుతావా అంటూ అతడి చేతులు కట్టేసి ఆటోలో పోలీస్‌స్టేషన్‌కు తరలించేందుకు ప్రయత్నించారు. ఈ దృశ్యాలను అక్కడివారు సెల్‌ఫోన్లో చిత్రీకరించి సోషల్‌మీడియాలో పోస్ట్ చేయగా క్షణాల్లోనే వైరల్‌గా మారింది. పోలీసుల తీరుపై నెటిజన్లు, ప్రజా సంఘాలు మండిపడ్డారు.

ఈ వ్యవహారంపై స్పందించిన రాష్ట్ర ప్రభుత్వం సమగ్ర విచారణ జరిపి నివేదిక ఇవ్వాలని పోలీసు శాఖని ఆదేశించింది. దీంతో మంగళవారం రాత్రి నలుగురు సిబ్బందిని ఉన్నతాధికారులు వీఆర్‌కు పంపి విచారణ జరిపారు. జవాన్‌పై అకారణంగా దాడికి పాల్పడ్డారని తేలడంతో పరవాడ పోలీస్‌స్టేషన్‌ హెడ్ కానిస్టేబుళ్లు దేవల్లు, రమేష్, కానిస్టేబుల్ ముత్యాలనాయుడు, లేడీ కానిస్టేబుల్ శోభని సస్పెండ్ చేస్తూ జిల్లా ఎస్పీ మురళీకృష్ణ ఉత్తర్వులు జారీచేశారు. ఇలాంటి ఘటన జరగడం దురదృష్టకరమన్న డీఐజీ హరికృష్ణ.. ఇలా ఎవరు చేసినా ఉపేక్షించేది లేదని హెచ్చరించారు.