ఏపీ హైకోర్టులో టీడీపీ నేతలకు ఊరట,,,,41ఏ నిబంధనలు పాటించాలని ఆదేశం

టీడీపీ నేతలకు ఏపీ హైకోర్టులో ఊరట లభించింది. తిరుపతి జిల్లా శ్రీకాళహస్తి నియోజకవర్గ టీడీపీ ఇంఛార్జ్ బొజ్జల సుధీర్‌రెడ్డి, మరో 25 మంది టీడీపీ నేతలకు హైకోర్టులో రిలీఫ్ దక్కింది. నేతలపై నమోదు చేసిన కేసులో సీఆర్‌పీసీ సెక్షన్‌ 41ఏ నోటీసు నిబంధనలను పాటించాలని శ్రీకాళహస్తి టూ టౌన్ పోలీసులను కోర్టు ఆదేశించింది. హైకోర్టు న్యాయమూర్తి జస్టిస్‌ టి.మల్లికార్జునరావు గురువారం ఈ మేరకు తీర్పు ఇచ్చారు. బొజ్జల సుధీర్‌రెడ్డి, మరికొందరు తనను దూషించారంటూ శ్రీకాళహస్తి రూరల్ సీఐ అజయ్‌కుమార్‌ ఇచ్చిన ఫిర్యాదుతో టూ టౌన్ పోలీసులు కేసు నమోదు చేశారు. ఈ కేసులో ముందస్తు బెయిలు కోసం నిందితులు హైకోర్టులో పిటిషన్‌ దాఖలు చేశారు. పిటిషనర్లపై నమోదు చేసిన సెక్షన్లు ఏడేళ్లలోపు జైలుశిక్షకు వీలున్నవేనని పిటిషనర్‌ తరఫు న్యాయవాది జవ్వాజి శరత్‌చంద్ర వాదనలు వినిపించారు.

టీడీపీ నేతలపై ఎస్సీ, ఎస్టీ చట్టం కింద కేసు నమోదు చేసినా.. సుప్రీంకోర్టు మార్గదర్శకాల మేరకు 41ఏ నోటీసు నిబంధనను పాటించాలని చెప్పారు. ఆ వాదనలను పరిగణనలోకి తీసుకున్న న్యాయమూర్తి.. 41ఏ నోటీసు నిబంధనలను పాటించాలని పోలీసులను ఆదేశించారు. దీంతో టీడీపీ నేతలు ఊరట దక్కినట్లు అయ్యింది. శ్రీకాళహస్తి తెలుగుదేశం పార్టీ ఇంఛార్జ్ బొజ్జల సుధీర్ రెడ్డిపై ఎస్సీ, ఎస్టీ అట్రాసిటీ కేసు నమోదైన సంగతి తెలిసిందే. శ్రీకాళహస్తి టూ టౌన్ సిఐ అజయ్ కుమార్ ఫిర్యాదుతో సుధీర్ రెడ్డితో పాటు మరో 26 మందిపై అట్రాసిటీ కేసులు నమోదు చేశారు. జగనాసుర దహనం ఎక్కడో మారుమూర పల్లెలో చేస్తుంటే సిఐ అజయ్ కుమార్ అడ్డుకుని నిర్వహిస్తున్న వారిని బూతులు తిట్టారని టీడీపీ ఆరోపించింది.. ఇళ్ల వద్దకు వెళ్లి బూతులు తిట్టడం సరికాదని.. సీఐని బొజ్జల సుధీర్ రెడ్డి ఫోన్‌లో ప్రశ్నించారు.

సీఐ కూడా పోలీస్ స్టేషన్‌కు వస్తే తేల్చుకుందామన్నారు. దీంతో సుధీర్ రెడ్డి, టీడీపీ కార్యకర్తలతో వెళ్లి పోలీస్ స్టేషన్ ముందు ధర్నా చేశారు. సీఐపై బొజ్జల ఆగ్రహం వ్యక్తం చేశారు. ఈ విషయం తెలుసుకున్న తిరుపతి అర్బన్ ఎస్పీ పరమేశ్వర్ రెడ్డి స్టేషన్‌కు వచ్చి వారికి సర్ది చెప్పడంతో సీఐపై బొజ్జల సుధీర్ ఫిర్యాదు చేశారు. దీంతో సీఐపై చర్యలు తీసుకుంటామని హామీ ఇచ్చారు.. ఆ తర్వాత సీఐ ఫిర్యాదు చేయడంతో బొజ్జలతో పాటు 26 మందిపై పోలీసులు అట్రాసిటీ కేసు పెట్టారు. బొజ్జల సుధీర్‌తో పాటూ నేతలు హైకోర్టును ఆశ్రయించగా.. 41ఏ నిబంధనలు పాటించాలని న్యాయమూర్తి పోలీసుల్ని ఆదేశించారు.