9 పిల్లలకు జన్మనిచ్చిన పెంపుడు శునకం.. 400 మందికి విందు

తమ ఇంటిలో పెంచుకుంటున్న శునకం.. 9 పిల్లలకు జన్మనివ్వడంతో ఓ మహిళ ఆనందంలో మునిగి తేలిపోయింది. ఆ సంతోషంలో ఏకంగా 400 మందికి విందు ఇచ్చింది. విచిత్రమైన ఈ ఘటన ఉత్తర్‌ ప్రదేశ్‌లోని హామిర్‌పుర్‌ జిల్లా మేరాపుర్‌‌లో చోటుచేసుకుంది. గ్రామానికి రాజ్‌కాళి అనే మహిళ ‘చట్నీ’ అనే కుక్కను కొంతకాలంగా పెంచుకుంటోంది. గర్బం దాల్చిన చట్నీ ఇటీవలే 9 పిల్లలకు జన్మనిచ్చింది. ఈ క్రమంలో గ్రామస్థులు, బంధువులకు రాజ్‌కాళి బుధవారం విందును ఏర్పాటు చేసింది. ఈ సందర్భంగా కుక్క పిల్లలను అందంగా అలకరించింది. వాటిని ఉయ్యాలలో వేసి.. మహిళలు లాలి పాటలు కూడా పాడారు.

శునకం యజమానురాలు రాజ్ కాళి మాట్లాడుతూ.. ఈ కుక్కను ఇంట్లో ఉంచుకున్నప్పటి నుంచి తన కష్టాలు చాలా వరకు దూరమయ్యాయని చెప్పారు. చట్నీ ఏకకాలంలో తొమ్మిది కుక్కపిల్లలకు జన్మనివ్వడం తనకు ఎంతో సంతోషం కలిగించిందని అన్నారు. ఇప్పటి వరకూ మూడుసార్లు పిల్లలను పెట్టిందని తెలిపారు. సాధారణంగా ఒక కుక్క నాలుగు నుంచి ఆరు పిల్లలకు మాత్రమే జన్మనిస్తుంది. అటువంటింది తన కుక్క ఏకంగా 9 పిల్లలను కనిందని రాజ్ కాళి ఉబ్బితబ్బుబ్బి అయ్యారు.

అందుకే బంధువులు,గ్రామస్థులకు విందు ఏర్పాటు చేసినట్టు తెలిపారు. ఈ విందులో నాలుగు వందల మందికి పైగా పాల్గొన్నారు. అతిథుల కోసం స్వీట్లు, పూరీలు, కూరగాయలతో ఆహారం సిద్దం చేశారు. బుధవారం సాయంత్రం నుంచే అతిథుల రాక మొదలై.. అర్థరాత్రి వరకు వేడుకగా సాగింది. దీంతో చుట్టుపక్కల చాలా సందడి నెలకొంది. విందులో పాల్గొన్న మహిళలు కూడా పాటలు పాడుతూ నృత్యాలు చేశారు. వచ్చిన అతిథులు, బంధువులు పెంపుడు శునకం చట్నీ, దాని పిల్లలతో సెల్ఫీలు దిగారు.