పాక్ మత్స్యకారుడిని రాత్రికి రాత్రే కోటీశ్వరుడిని చేసిన చేపలు

పాకిస్థాన్‌కు చెందిన ఓ మత్స్యకారుడు రాత్రికి రాత్రే కోటీశ్వరుడు అయ్యాడు. సముద్రంలోకి చేపలకు వెళ్లగా అరుదైన రకం చేపలు అతని వలలో పడటంతో దశ తిరిగిపోయింది. కోట్ల విలువ చేసే చేపలు ఆ మత్య్సకారుడి వలకు చిక్కడంతో అతని ఆనందానికి అవధుల్లేకుండా పోయాయి. అయితే ఎప్పుడూ సముద్రం లోపల ఉండే ఆ అరుదైన చేపలు.. ఒడ్డుకు వచ్చిన సమయంలో అవి మత్య్సకారుడి వలలో పడినట్లు స్థానికులు చెప్పారు. అయితే ఆ అరుదైన చేపలు వేలంలో రూ.7 కోట్ల ధర పలికాయి. దీంతో అప్పటివరకు పేదవాడిగా ఉన్న మత్య్సకారుడు రాత్రికి రాత్రే కోటీశ్వరుడు అయ్యాడు.

పాకిస్థాన్‌లోని కరాచీకి చెందిన హాజీ బలోచ్ అనే మత్య్సకారుడికి అరుదైన చేపలు దొరికాయి. అరేబియా మహా సముద్రంలో దొరికే సోవా లేదా గోల్డెన్ ఫిష్‍‌లు.. హాజీ బలోచ్ వలకు చిక్కాయి. ఇబ్రహీం హైదరీ గ్రామానికి చెందిన హాజీ బలోచ్ నిత్యం సముద్రంలో చేపలు పట్టుకుని జీవనం సాగించేవాడు. అయితే సంతానోత్పత్తి సమయంలో మాత్రమే ఒడ్డుకు చేరే అరుదైన ఈ సోవా అనే చేపలు సోమవారం హాజీ బలోచ్‌ విసిరిన వలకు పడ్డాయి. ఈ చేపలను కరాచీ హార్బర్‌లో శుక్రవారం వేలం నిర్వహించారు. అయితే ఈ వేలంలో ఆ అరుదైన సోవా చేప ఒక్కొక్కటీ రూ.70 లక్షలు పలికింది. దీంతో మొత్తం ఆ వలలో 10 చేపలు పడగా.. అవి రూ.7 కోట్లకు అమ్ముడయ్యాయి. దీంతో ఆ పేద మత్య్సకారుడు ఒక్కసారిగా కోటీశ్వరుడయ్యాడు. తాను పట్టిన ఒక్కో చేప రూ.70 లక్షలు పలికిందని హాజీ బలోచ్ ఆనందం వ్యక్తం చేశారు.

అయితే ఈ సోవా చేపలో ఎన్నో ఔషధ గుణాలు ఉంటాయని స్థానికులు తెలిపారు. ఈ సోవా చేప చాలా అమూల్యమైందని.. అరుదైనదని తెలిపారు. దాని పొట్ట నుంచి వచ్చే పదార్థాలు మెడిసిన్, ఔషధ గుణాలను కలిగి ఉంటాయని తెలిపారు. ఈ చేపల నుంచి తీసే దారం లాంటి పదార్థాన్ని ఆపరేషన్లలో ఉపయోగిస్తారని పేర్కొన్నారు. సాధారణంగా ఈ చేప 20 నుంచి 40 కిలోల బరువు ఉంటుందని.. 1.5 మీటర్ల వరకు పెరుగుతుందని పేర్కొన్నారు. ఈ సోవా చేపలు తూర్పు ఆసియా దేశాల్లో చాలా ఎక్కువగా దొరుకుతాయని స్థానికులు వెల్లడించారు. ఈ సోవా చేపను ఔషధాల్లోనే కాకుండా వంటగాల్లో కూడా ఎక్కువగా వాడుతారని తెలిపారు. ఆ మత్య్సకారులు తీసుకువచ్చిన చేపలు మొత్తం వేలంలో రూ.7 కోట్లు పలికాయని పాకిస్తాన్ ఫిషర్‌మెన్ ఫోక్ ఫోరమ్‌కు చెందిన ముబారక్ ఖాన్ వెల్లడించారు.

తనకు అరుదైన రకం సోవా చేపలు దొరకడం పట్ల హాజీ బలోచ్ సంతోషం వ్యక్తం చేశాడు. అయితే తనతోపాటు మొత్తం ఏడుగురు మత్య్సకారులు వేటకు వెళ్లామని.. అందులో ఈ చేపలు దొరికాయని తెలిపాడు. ఆ 10 చేపలు రూ.7 కోట్లకు వేలంలో అమ్ముడుపోవడంతో వచ్చిన ఆ డబ్బును ఏడుగురికీ పంచుతానని చెప్పాడు.