అందరూ నవ్వుకునేలా పరిస్థితులు ఉన్నాయి..... బాలకృష్ణ

హిందూపురంలో జనసేన, టీడీపీ సమన్వయ కమిటీ సమావేశంలో ఎమ్మెల్యే నందమూరి బాలకృష్ణ పాల్గొన్నారు. రాష్ట్రంలో పాలన దారుణంగా ఉందన్నారు. రాబోయే రోజుల్లో టీడీపీ, జనసేన పార్టీలు కలిసికట్టుగా పనిచేయాలని పిలుపునిచ్చారు. ఈ క్రమంలో బాలయ్య తెలంగాణ ముఖ్యమంత్రి కేసీఆర్ చేసిన వ్యాఖ్యల్ని ప్రస్తావించారు. డబుల్ రోడ్డు వస్తే తెలంగాణ అని.. సింగిల్ రోడ్డు వస్తే ఆంధ్ర అంటూ కేసీఆర్ అన్నారని.. అలా ఉంది రాష్ట్ర పరిస్థితి అన్నారు. అందరూ నవ్వుకునేలా పరిస్థితులు ఉన్నాయన్నారు. ఆరోగ్యశ్రీ వర్తించక చాలామంది ఇబ్బందిపడుతున్నారన్నారు. ఒకప్పుడు ప్రపంచమంతా గొప్పగా చెప్పుకున్న రాష్ట్రాన్ని ఇలా చూస్తుంటే బాధగా ఉందన్నారు.

బాలయ్య ఈ సమావేశం అనంతరం హిందూపురం ప్రభుత్వాసుపత్రిని సందర్శించి, రోగులకు అందుతున్న వైద్యసేవలు అడిగి తెలుసుకున్నారు. ఆసుపత్రిలో సీటీస్కాన్‌ పనిచేయకపోవటం, గైనకాలజిస్టులు 9 మందికి ముగ్గురే ఉండటం, తాను అందించిన వెంటిలేటర్లు వినియోగించకపోవటం, ఆసుపత్రి అపరిశుభ్రంగా ఉండటంపై బాలకృష్ణ అసంతృప్తి వ్యక్తం చేశారు. టీడీపీ పాలనలో రూ.23 కోట్లతో నిర్మించిన బసవతారకరామ మాతాశిశు ఆసుపత్రి వద్ద సెల్ఫీ తీసుకొని ప్రభుత్వానికి ఛాలెంజ్‌ విసిరారు.

టీడీపీ అధికారంలో ఉన్నప్పు ఆసుపత్రి ఎంత అభివృద్ధి చేశాము.. ఇప్పుడు ఈప్రభుత్వం వచ్చాక ఏం అభివృద్ధి చేశారో చెప్పాలన్నారు. ప్రభుత్వ ఆసుపత్రిలో వసతులు సరిగా లేవని.. ఆసుపత్రిలో వెంటిలేటర్లు, సిటీ స్కాన్ , ఎక్స్ రే యూనిట్లు పనిచేయడంలేదన్నారు. టీడీపీ ప్రభుత్వం ఉన్నప్పుడు ఆసుపత్రిలో అన్ని సౌకర్యాలు ఆసుపత్రిలో పరిశుభ్రతా చాలా బాగా ఉండేవన్నారు. అప్పుడు ఓపికి పేషెంట్లు రోజు 1500 మంది వచ్చేవారన్నారు.

కేంద్ర ప్రభుత్వం ప్రతి రాష్ట్రానికి ప్రజా ఆరోగ్యానికి కొంత గ్రాంట్ రిలీజ్ చేస్తుందని.. ప్రజా ఆరోగ్యానికి కేంద్ర ప్రభుత్వం ఇచ్చిన నిధులు రూ.650 కోట్లు వేరేవాటికి మళ్లించి ఆరోగ్యాన్ని గాలికి వదిలేశారన్నారు. ఆరోగ్య శ్రీ పథకం బిల్లుల్ని భారీగా పెండింగ్‌లో ఉన్నాయన్నారు. కేంద్ర ప్రభుత్వం పంచాయితీలకు ఇచ్చిన నిధులు వేరే పథకాలకు మళ్లించి రోడ్డు వేయడం లేదన్నారు. ఆస్పత్రిలో ఉన్న సిటీ స్కాన్‌ను కూడా రిపేర్ చేయించమని చెప్పానన్నారు బాలయ్య.