మిస్ యూనివర్స్ పోటీల్లో నేపాలీ బొద్దుగుమ్మ సంచలనం

అందాల పోటీలంటే నాజూగ్గా ఉండే అమ్మాయిలకే సొంతమని, బొద్దుగు ఉండేవారికి అవకాశం ఉండదని అనుకుంటారు. కానీ, అటువంటి అపోహలను పటాపంచలు చేస్తూ.. ఈ ఏడాది మిస్ యూనివర్స్ పోటీల్లో నేపాలీ బొద్దుగుమ్మ ప్రిలిమినరీ రౌండ్‌లో దూసుకెళ్లి హాట్ ఫేవరెట్‌గా మారిపోయింది. ఎల్ సాల్వడార్‌లో జరిగిన మిస్ యూనివర్స్ 2023 ప్రిలిమినరీ పోటీలో మిస్ నేపాల్ జేన్ దీపిక గారెట్‌కు ప్రేక్షకుల నుంచి భారీ మద్దతు లభించింది. అత్యంత ప్రతిష్టాత్మకమైన పోటీలో మొదటిసారి ఓ బొద్దుగుమ్మ మూస పద్ధతులను బద్దలు కొట్టి ఫేవరెట్‌గా మారడం విశేషం. దీంతో నేపాల్‌లో మాత్రమే కాదు.. అంతర్జాతీయంగానూ గారెట్ వార్తల్లో నిలిచారు. వృత్తిరీత్యా నర్సు, బిజినెస్ డెవలపర్ అయిన జేన్.. బాడీ పాజిటివిటీ, మహిళల హార్మోన్లు సమతౌల్యత, మానసిక ఆరోగ్యం కోసం కృషిచేస్తోంది. ‘కొన్ని బ్యూటీ స్టాండర్డ్స్‌ను పాటించని మహిళలందరి ప్రతినిధిగా నేను ఇక్కడ ఉన్నాను.. అందంగా ఉండటానికి ఒక మార్గం లేదని నేను అనుకుంటున్నాను, ప్రతి స్త్రీ కూడా అందంగా ఉంటుంది.’ అని గతంలో జేన్ అన్నారు.

గతంలో తాను కూడా అభద్రతాభావంతో ఉండేదాన్నని, దానిని అధిగమించి ఎలా శక్తిని పొందగలిగిందీ అందాల పోటీల వేదికపై ఆమె వెల్లడించింది. ‘ప్రతీ వ్యక్తిని బట్టి విజయం మారుతుందని నేను భావిస్తున్నాను. నాకు, ఈ వేదికపై ఉండటం, నిజం మాట్లాడటం చాలా ముఖ్యమైన విషయం కొన్ని సంవత్సరాల కిందట నేను చాలా అభద్రతాభావం, చాలా తక్కువ ఆత్మ విశ్వాసంతో ఉండేదాన్ని.. కానీ ఇప్పుడు, నేను నన్ను ప్రేమిస్తున్నాను.. అదే నాకు విజయం’ అని జేన్ తన గురించి చెప్పారు. కాగా, మిస్ యూనివర్స్ పోటీల్లో నేపాలీలు 2017 నుంచి పాల్గొంటున్నారు. ఆ ఏడాది మిస్ నేపాలీ మనితా దేవ్‌కొట టాప్-10లో నిలిచింది. ఆ తర్వాత మరెవరూ టాప్-10లోకి చేరలేకపోయారు. ఇదిలా ఉండగా, యూరోపియన్ 'ప్లేబాయ్' కవర్‌ను అలంకరించిన మొదటి ప్లస్-సైజ్ మోడల్‌గా హేలీ హాసెల్‌హాఫ్ చరిత్ర సృష్టించారు. మిస్ యూనివర్స్ సంస్థ గత కొన్నేళ్లుగా ఆటంకాలను అధిగమిస్తోంది. స్పెయిన్‌కు చెందిన ఏంజెలా పోన్స్ అనే మొదటి ట్రాన్స్ ఉమెన్, అలాగే మిస్ యూనివర్స్ మయన్మార్ 2019 జిన్ హెచ్‌టెట్ వంటి లెస్బియన్ పోటీల్లో పాల్గొన్నారు. అలాగే, ఫిలిప్పీన్స్‌కు చెందిన మిచెల్ డీ తాను బై సెక్సువల్‌గా ప్రకటించారు. ఇక, గతేడాది తల్లులు, వివాహితులు, విడాకులు తీసుకున్న ఔత్సాహిక అందాల భామలకు కూడా సంస్థ తలుపులు తెరిచింది. ఈ ఏడాది తుది పోటీలు నవంబరు 19న ఫిలిప్పీన్స్‌లో జరుగుతాయి. స్థానిక కాలమానం ప్రకారం ఆదివారం ఉదయం 9 గంటలకు మొదలవుతాయి.