ఏపీ హైకోర్టు ఆదేశాలు.. ఒక్క రోజే 1,230 జీవోలు అప్లోడ్ చేసిన ప్రభుత్వం
Andhra Pradesh Telugu | Suryaa Desk | Published : Sat, Nov 18, 2023, 08:34 PM
ఏపీ ప్రభుత్వం భారీగా జీవోలను అప్లోడ్ చేస్తోంది. జీవోలను ఆన్‌లైన్‌లో ఉంచే అంశంపై ఏపీ హైకోర్టు సీజే జస్టిస్‌ ధీరజ్‌ సింగ్‌ ఠాకూర్‌ వ్యాఖ్యలతో రాష్ట్ర ప్రభుత్వం చర్యలు ప్రారంభించింది. శుక్రవారం ఒక్క రోజులో 1,230కి పైగా జీవోలను అప్లోడ్ చేసింది. జీవోలన్నింటినీ ఏపీ ఈ-గెజిట్‌లో అప్లోడ్ చేయాలంటూ ప్రభుత్వ శాఖలకు సాధారణ పరిపాలన శాఖ ఆదేశాలు జారీ చేశారు. దీంతో గతంలో గోప్యంగా ఉంచిన జీవోలన్నింటినీ ప్రభుత్వ శాఖలు అప్లోడ్ చేస్తున్నాయి.
ప్రభుత్వ సలహాదారుల పదవీకాలం పొడిగింపు, మంత్రులు, ప్రజాప్రతినిధులు, అధికారుల విదేశీ పర్యటనలు, వాహన రుణాలు, వివిధ కార్పొరేషన్లు, విద్యుత్‌ సంస్థలకు సంబంధించిన రుణాలు, వడ్డీ చెల్లింపులు తదితర అంశాలపై ఇప్పటివరకు దాచి ఉంచిన పాత జీవోలన్నింటినీ ప్రభుత్వ శాఖలు అప్లోడ్ చేస్తున్నారు. ప్రభుత్వ ఈ-గెజిట్‌ సర్వర్‌పై కూడా భారం పడిందని చెబుతున్నారు. ఏపీ హైకోర్టులో విచారణ తర్వాత సాధారణ పరిపాలనశాఖ.. రెండు రోజుల క్రితం అత్యవసర నోట్‌ జారీ చేసింది.
నవంబర్‌ 17వ తేదీ మధ్యాహ్నంలోగా ప్రభుత్వ శాఖలు జారీ చేసిన జీవోలకు సంబంధించిన వివరాలు ఇవ్వడంతో పాటు అప్లోడ్ చేయాల్సిందిగా ఆదేశాలు ఇచ్చారు. దీంతో ప్రభుత్వశాఖలన్నీ ఒక్కసారిగా వెబ్‌సైట్‌లోకి జీవోలను అప్లోడ్ చేస్తున్నాయి. ప్రభుత్వం కొన్ని జీవోలను గోప్యంగా ఉంచిందని ఆరోపణలు వచ్చాయి. అలాగే ఏపీ హైకోర్టులో పిటిషన్‌లు దాఖలయ్యాయి.. విచారణ చేపట్టిన ధర్మాసనం కీలక వ్యాఖ్యలు చేసింది. ఆన్‌లైన్‌లో జీవోలను అప్లోడ్ చేయడానికి వచ్చిన ఇబ్బంది ఏంటని ప్రశ్నించింది. దీంతో జీవోలను అప్లోడ్ చేస్తున్నారు.
|
|