బిడ్డ పెళ్లి కోసం పెట్టెలో రూ. 2 లక్షల దాచుకున్న వ్యక్తి,,,,,పెట్టె తెరిచి చూడగా చెదలు తినేసిన కరెన్సీ నోట్లు

మూడు నెలల కిందట కుమారుడు చనిపోయాడు. అతడు వాడిన ఓ పాత ఇనుప పెట్టెను తెరిచిన తల్లిదండ్రులు కన్నీళ్లు ఆపుకోలేకపోయారు. ఆ పెట్టెలో అతడు సుమారు రెండు లక్షల రూపాయల నగదు దాచుకున్నాడు. తన కుమార్తె పెళ్లి కోసమని తన కష్టార్జితంలో నుంచి రూపాయి, రూపాయి పోగు చేసి దాచిపెట్టాడు. ఆ విషయాన్ని ఇంట్లో వాళ్లెవరికీ చెప్పలేదు. ఇప్పుడు ఆ డబ్బునంతా చెదలు తినేశాయి. ఒక్కటంటే ఒక్క నోటు కూడా పనికిరాకుండా పోయింది. అది చూసి కుటుంబసభ్యులు గుండెలు బాదుకుంటున్నారు. ఈ హృదయ విదారకర ఘటన పార్వతీపురం మన్యం జిల్లా పుత్తూరు గ్రామంలో చోటు చేసుకుంది.

పార్వతీపురం మన్యం జిల్లా పుత్తూరు గ్రామానికి చెందిన ఆదిమూలం లక్ష్మణరావు, గంపమ్మ దంపతులకు ఇద్దరు కుమారులు. వ్యవసాయం, కూలీ పనులే కుటుంబానికి ఆధారం. పెద్ద కుమారుడు గోపాల్ రావు 3 నెలల కిందట అకాల మరణం చెందాడు. కుటుంబానికి అండగా ఉన్న పెద్ద కొడుకు దూరమవ్వడంతో తల్లిదండ్రులు తీవ్ర దు:ఖంలో ఉన్నారు. గోపాల్ రావు జ్ఞాపకాలను నెమరేసుకుంటున్న తల్లిదండ్రులు, తమ్ముడు రెండు రోజుల కిందట అతడి గదిని పరిశీలించారు. ఈ క్రమంలో గోపాల్ రావుకు సంబంధించిన ఓ పాత ఇనుప పెట్టె కంటపడింది. దాని తాళం పగులగొట్టి అందులో ఏముందని పరీక్షించి చూసిన వారు ఒక్కసారిగా షాకయ్యారు. చెదలు తినేయడంతో ముక్కలు ముక్కలైన కరెన్సీ నోట్లను చూసి వారికి దుఃఖం తన్నుకొచ్చింది.

సుమారు రెండు లక్షల రూపాయల కష్టార్జితం చెదల పాలైందని గోపాల్ రావు సోదరుడు చిన్నారావు తెలిపారు. కుమార్తె పెళ్లికి ఉపయోగపడతాయని తన అన్న గారు ఆ డబ్బును కూడబెట్టుకున్నాడని ఆయన తెలిపారు. ప్రభుత్వం తమను ఆదుకోవాలని విషణ్న వదనంతో కుటుంబసభ్యులు వేడుకుంటున్నారు.