ఓటర్ల జాబితాలో వింత వింత పేర్లు,,,,ఏపీ ఓటర్ల జాబితాపై పలు ఫిర్యాదులు

ఆంధ్రప్రదేశ్‌లో ఓటర్ల జాబితాలో తప్పుల తడకలు ఆశ్చర్యం కలిగిస్తున్నాయి. కర్నూలు అసెంబ్లీ నియోజకవర్గానికి సంబంధించిన ఓటర్ల జాబితాలో ‘సరిగమపదనిస’లు కనిపిస్తున్నాయి. ఓటర్ల జాబితాలో ఓ ముస్లిం మహిళ (41 ఏళ్లు) పేరు ‘గగగగగగ’గా నమోదైంది. ఆమె భర్త పేరు ‘పపపపపప’గా ముద్రితమైంది. జొహరాపురంలోని 257 బూత్‌లో 34/205-ఏ ఇంటి చిరునామాతో ఈ ఓటరు పేరు నమోదైంది. అదే చిరునామాతో ఓ పురుషుడి (38 ఏళ్లు) పేరు ‘దదదదదద’గా నమోదైంది. అతడి తండ్రి పేరు కూడా ‘దదదదదద’గా ముద్రితమైంది.

అదే బూత్‌లోని 69/706-16 ఇంటి చిరునామాతో మరో మహిళ పేరు ‘పప’గా, ఆమె తండ్రి పేరు ‘ప’గా నమోదైంది. ఇంకో మహిళ పేరైతే, అర్థంకాని భాషలో ప్రింట్ అయ్యింది. కిందటి నెల చివరి వారంలో విడుదల చేసిన ముసాయిదా ఓటర్ల జాబితాలో ఈ చోద్యాలు కనిపిస్తున్నాయి. ఇలా ఓటర్ల జాబితాలో పేర్లు తప్పుగా నమోదవ్వడంపై విమర్శలు వెల్లువెత్తుతున్నాయి.

అంతకుముందు మచిలీపట్నంలో పట్టణ ఓటర్లను రూరల్‌కి, గ్రామీణ ఓటర్లను మచిలీపట్నంలోని వివిధ వార్డులకు మార్చేశారని ఫిర్యాదులు వచ్చాయి. దీని మీద కోర్టులో పిటిషన్ కూడా దాఖలైంది. విజయవాడ సెంట్రల్ నియోజకవర్గంలో డోర్ నెంబర్ కూడా లేకుండా 650 ఓట్లు ఉన్నాయని స్థానికులు అనుమానం వ్యక్తం చేశారు. విశాఖపట్నం తూర్పు నియోజకవర్గంలో ఓటర్ల జాబితాలో అవకతవకలు జరిగాయని స్థానికులు ఫిర్యాదు చేశారు.

రాష్ట్రంలోని పలు నియోజకర్గాల నుంచి ఓటర్ల జాబితా మీద అభ్యంతరాలు వస్తున్నాయి. అనేక లోపాలు బయటపడుతున్నాయి. ఆంధ్రప్రదేశ్ ఎన్నికల సంఘం ముందు పెద్ద సంఖ్యలో ఫిర్యాదులు వెల్లువెత్తుతున్నాయి. కేంద్ర ఎన్నికల సంఘానికి సైతం ఫిర్యాదులు వెళ్లాయి. రాష్ట్రంలో ఎన్నికల సన్నాహాలు మొదలవ్వబోతున్న తరుణంలో ఓటర్ల జాబితాలో లోపాలపై విపక్షాల నుంచి తీవ్ర విమర్శలు వస్తున్నాయి.

మార్పులు చేసి తుది జాబితా..

ఓటర్ల జాబితాలో కొన్ని తప్పిదాలు ఉన్నట్లు గుర్తించామని, వాటిని సవరిస్తామని రాష్ట్ర ఎన్నికల సంఘం అధికారులు చెబుతున్నారు. వచ్చే ఎన్నికలకు సంబంధించి 2024 ఫిబ్రవరి 5న తుది ఓటర్ల జాబితాను ప్రకటిస్తామని ఎపీ ఎలక్షన్ సీఈవో ముఖేష్ కుమార్ మీనా తెలిపారు. ముసాయిదా జాబితాపై అభ్యంతరాలు, మార్పులు, చేర్పులను స్వీకరించి ఇంటింటికి వెళ్లి తనిఖీ చేస్తామని.. అనంతరం తుది జాబితాను విడుదల చేస్తామని చెప్పారు.