ఫైనల్ మ్యాచ్ కోసం భారీ స్క్రీన్లు.. ఏపీలో క్రికెట్ ప్రియులకు పండగే

దేశమంతా వన్డే ప్రపంచకప్ టోర్నీ ఫైనల్ మేనియాతో ఊగిపోతోంది. ఆదివారం అహ్మదాబాద్‌లోని నరేంద్ర మోదీ స్టేడియం వేదికగా జరిగే ఫైనల్ మ్యాచ్‌లో భారత్, ఆస్ట్రేలియా జట్లు అమీతుమీ తేల్చుకోనున్నాయి. ఈ ప్రపంచ కప్ ఫైనల్ మ్యాచ్‌ను చూసేందుకు అభిమానుల కోసం ఆంధ్రప్రదేశ్ క్రికెట్ అసోసియేషన్ కీలక నిర్ణయం తీసుకుంది. రాష్ట్రవ్యాప్తంగా పలు చోట్ల భారీ స్క్రీన్లను ఏర్పాటు చేసి, మ్యాచ్‌ను చూసేందుకు ఏర్పాట్లు చేస్తోంది. ఆంధ్రప్రదేశ్‌లోని 13 ప్రధాన సెంటర్లలో బిగ్ స్కీన్లను ఏర్పాటు చేస్తున్నట్లు ఆంధ్రా క్రికెట్ అసోసియేషన్ తెలిపింది. అంతేకాదు, ఈ సెంటర్ల వద్ద అభిమానుల కోసం ఫుడ్‌ కౌంటర్లను కూడా ఏర్పాటు చేసినట్లు ఏసీఏ కార్యదర్శి ఎస్.ఆర్. గోపినాథ్ రెడ్డి తెలిపారు. అంటే, క్రికెట్ ప్రియులకు పండగేనన్నమాట.

జిల్లాల వారీగా క్రికెట్ స్క్రీన్లు ఏర్పాటు చేసే సెంటర్లు:

1. విశాఖపట్నం: ఆర్కే బీచ్, కాళీ మాతా ఆలయం ఎదురుగా

2. అనంతపురం: పోలీస్ ట్రైనింగ్ కాలేజ్ (పి.టి.సి.)

3. ఏలూరు: ఇండోర్ స్టేడియం గ్రౌండ్, కలెక్టర్ ఆఫీస్ ఎదురుగా

4. గుంటూరు: మాజేటి గురవయ్య హై స్కూల్ గ్రౌండ్

5. కడప: ఆర్ట్స్ కాలేజ్ గ్రౌండ్

6. కాకినాడ: రంగరాయ మెడికల్ కాలేజ్ గ్రౌండ్

7. కర్నూల్: డి.ఎస్.ఏ. స్టేడియం

8. నెల్లూరు: వి.ఆర్. హైస్కూల్ గ్రౌండ్

9. ఒంగోలు: జెడ్పీ మినీ స్టేడియం

10. శ్రీకాకుళం: ఎం.హెచ్. స్కూల్ గ్రౌండ్, 7 రోడ్ జంక్షన్

11. తిరుపతి: కె.వి.ఎస్. స్పోర్ట్స్ పార్క్, తుమ్మలకుంట గ్రౌండ్

12. విజయనగరం: ఐస్ ఫ్యాక్టరీ జంక్షన్, భాష్యం స్కూల్ వెనుక

13. విజయవాడ: ఎం.జి. రోడ్, ఇందిర గాంధీ మున్సిపల్ స్టేడియం.