విశాఖ ఫిషింగ్ హర్బర్‌లో భారీ అగ్నిప్రమాదం,,,,ప్రమాదానికి లోకల్ బాయ్ నానినే కారణమని అరెస్ట్ చేసిన పోలీసులు

వైజాగ్‌లోని ఫిషింగ్ హార్బర్‌లో అర్ధరాత్రి జరిగిన అగ్ని ప్రమాద ఘటన ఏపీని ఉలిక్కిపడేలా చేసింది. అయితే.. ఈ ప్రమాదంలో ఏకంగా 50 నుంచి 60 బోట్ల వరకు దగ్ధమైనట్టు తెలుస్తోంది. సుమారు 40 నుంచి 50 కోట్ల వరకు నష్టం వాటిల్లినట్టు తెలుస్తోంది. అయితే.. ఈ అగ్ని ప్రమాదంలో.. కీలక నిందితునిగా భావిస్తోన్న ప్రముఖ యూట్యూబర్ లోకల్ బాయ్ నానిని టాస్క్‌ పోర్స్ పోలీసులు అదుపులోకి తీసుకుని విచారిస్తున్నారు. అయితే.. ఈ ప్రమాదానికి లోకల్ బాయ్ నానీనే కారణమని.. సోషల్ మీడియాలో వార్తలు తెగ వైరల్ అవుతున్నాయి. నిన్న (నవంబర్ 19న) సాయంత్రం లోకల్ బాయ్ నాని భార్య శ్రీమంతం కార్యక్రమం జరగగా.. రాత్రి సమయంలో తన స్నేహితులకు బోటులో మద్యం పార్టీ ఇచ్చారు. అయితే.. ఆ పార్టీ తర్వాతే ఈ అగ్ని ప్రమాదం జరిగింది. అందులోనూ.. ఈ ప్రమాదాన్ని లోకల్ బాయ్ నాని.. మొత్తం వీడియో తీసి.. తన యూట్యూబ్‌ ఛానల్‌లో ఆప్ లోడ్ కూడా చేశాడు. దీంతో.. ఇది సోషల్ మీడియాల్లో తెగ వైరల్ అవుతోంది. వీడియో వైరల్ అవుతుండటంతో పాటు లోకల్ బాయ్ నానిపై తీవ్ర విమర్శలు వ్యక్తమవుతున్నాయి. ఈ ప్రమాదానికి కారణం నానినే అన్న ఆరోపణలు కూడా వస్తున్నాయి. అయితే.. స్నేహితులతో కలిసి బోటులో పార్టీ చేసుకుంటున్న సమయంలో.. వంట చేసుకుంటుండగా మంటలు అంటుకున్నాయని.. ఇది గమనించిన ఇతర మత్స్యకారులు, లంగర్ వేసిన బోటును వదిలారు. మంటలు అంటుకున్న బోటు జట్టి నెంబర్ 1లో ఉన్న పడవల వద్దకు చేరుకోగా.. అందులో ఉన్న సిలిండర్ పేలి మంటలు మిగతా బోట్లకు కూడా వ్యాపించాయిని.. దీంతో ప్రమాదం మరింత పెద్దగా మారిందని చెప్తున్నారు.

ఇదిలా ఉంటే.. మరోవైపు లోకల్ బాయ్ నాని తన బోటును వేరే ఓ వ్యక్తికి అమ్మాడు. బోటు కొన్న వ్యక్తి.. నానికి సగం డబ్బులు మాత్రం ఇచ్చాడని.. మిగతా డబ్బు విషయంలో ఇద్దరి మధ్య గొడవ తలెత్తిందని పలువురు చెప్తున్నారు. ఈ క్రమంలోనే.. ఆ వ్యక్తిపై కోపంతో మద్యం తాగాక లోకల్ బాయ్ నాని.. అతని బోటుకు నిప్పు పెట్టాడని.. అది కాస్త మిగతా బోట్ల దగ్గరికి రావటంతో ప్రమాదం పెద్ద ఎత్తున జరిగిందని సోషల్ మీడియా వేదికగా ఆరోపిస్తున్నారు. డబ్బుల విషయంలోనే ఇద్దరి మధ్య చెలరేగిన వివాదం కారణంగా.. మద్యం మత్తులో బోటును తగలబెట్టి ఉంటారని పోలీసులు అనుమానం వ్యక్తం చేస్తున్నారు. పడవల్లో డీజిల్ డబ్బాలు ఉండటంతో బోట్లు చూస్తుండగానే అగ్నికి ఆహుతయ్యాయి. ప్రమాద సమయంలో హార్బర్ లో 400 రవకు పడవలు ఉండగా.. సుమారు 60 వరకు మంటల్లో చిక్కుకున్నాయి. అయితే.. ప్రమాదానికి కారణం ఏదైనా ఆ ఘటన సమయంలో ఫైర్ సిబ్బంది, స్థానికులు, బోటు యజమానులు అంతా కలిసి మంటలు ఆర్పేందుకు ప్రయత్నిస్తుంటే.. లోకల్ బాయ్ నాని మాత్రం ఆ ప్రమాదాన్ని వీడియో తీస్తూ.. మంటలు ఆర్పుతున్న వారి విధులకు ఆటంకం కలిగించాడు. అక్కడ అంత విషాదం జరుగుతుంటే.. కళ్ల ముందే జీవనాధారం కాలిబూడిదవుతుంటే.. నాని మాత్రం తనకు ఏం సంబంధం లేదన్నట్టు తన వీడియో తీసి.. తన ఛానల్‌లో అప్ లోడ్ చేశాడు.

అయితే.. ఈ వీడియో సోషల్ మీడియాలో తెగ వైరల్ అవుతుండగా.. కామెంట్ల రూపంలో నెటిజన్లు తీవ్ర స్థాయిలో ఆగ్రహం వ్యక్తం చేస్తున్నారు. ప్రమాదానికి కారణమై.. తనకేమీ సంబంధం లేదన్నట్టు వీడియో తీసుకుని స్వార్థం చూపించుకున్నాడంటూ కామెంట్లు కుమ్మరిస్తున్నారు. పోలీసులకు ఎలాంటి అనుమానం రాకుండా.. నటించే ప్రయత్నం చేశాడని.. కానీ అసలు కారణం తానే అని అందరికీ తెలిసిపోయిందంటూ కామెంట్లు చేస్తున్నారు.

లోకల్ బాయ్ నాని పేరుతో.. యూట్యూబ్ ఛానల్ నడిపిస్తోన్న నానికి 1.65 మిలియర్ల సబ్‌స్కైబర్లు ఉండటం గమనార్హం. బోట్‌లో ఫిషింగ్ చేస్తూ.. చేపలకు సంబంధించిన రకరకాల వీడియోలు చేస్తూ... నెటిజన్లకు దగ్గరయ్యాడు. కాగా.. ఫిట్ నెస్‌కు సంబంధించిన వీడియోలతో పాటు సినిమా ట్రయల్స్, ఇంటర్వ్యూలు కూడా చేస్తూ.. డబ్బు సంపాదించుకుంటున్నాడు. ఈక్రమంలోనే.. ఇలాంటి ఘటన జరగటం.. దానికి నానినే కారణమని రకరకాల ఆరోపణలు వస్తుండటం ఇప్పుడు సర్వత్రా చర్చనీయాంశంగా మారింది.