హైవేలు వాహనాలకు మాత్రమే.. పాదచారులు తిరగకూడదు: సుప్రీంకోర్టు

హైవేలపై పాదచారులు తిరిగేందుకు అనుమతిలేదని, ఇవి కేవలం వాహన రాకపోకలకు ఉద్దేశించినవి సర్వోన్నత న్యాయస్థానం వ్యాఖ్యానించింది. పాదచారులు తిరగకూడదని, ఈ మేరకు క్రమశిక్షణ అవసరమని సుప్రీంకోర్టు హితవు పలికింది. హైవేలపై పాదచారుల భద్రత అంశంపై దాఖలైన ఓ పిటిషన్‌ను విచారణకు నిరాకరించిన న్యాయస్థానం.. ఈ సూచనలు చేసింది. తొలుత ఈ అంశంపై పిటిషనర్లు గుజరాత్‌ హైకోర్టు‌ను ఆశ్రయించగా.. వారి అభ్యర్థనను ఉన్నత న్యాయస్థానం తోసిపుచ్చింది. ఇది విధానపరమైన అంశమని తాము ఇందులో జోక్యం చేసుకోలేమని స్పష్టం చేసింది.

అంతేకాదు, ఈ వ్యవహారంపై కేంద్ర రోడ్డు రవాణా, రహదారుల శాఖను సంప్రదించాలని సూచించింది. దీంతో పిటిషినర్లు సుప్రీంకోర్టులో ఈ ఉత్తర్వులను సవాల్‌ చేయగా.. జస్టిస్‌ సంజయ్ కిషన్ కౌల్, జస్టిస్‌ సుధాన్షు ధులియాలతో కూడిన ద్విసభ్య ధర్మాసనం వ్యాజ్యాన్ని పరిశీలించింది. ‘అసలు హైవేలపైకి పాదచారులు ఎలా వస్తారు? వారికి క్రమశిక్షణ ఉండాలి.. హైవేలపై వారు తిరగకూడదు. ప్రపంచంలో ఎక్కడా ఇలా తిరిగే వ్యక్తులు కనిపించరు. భవిష్యత్తులో పాదచారుల కోసం హైవేలపై వాహనాలను ఆపాలని కూడా కోరతారు. అదెలా సాధ్యం?’ అని ధర్మాసనం ప్రశ్నించింది.

ప్రజలు నిబంధనలను ఉల్లంఘిస్తే.. కోర్టు ఎలా వారిని సమర్థించగలదు? అని నిలదీసింది. దేశంలో హైవేలపై పాదచారులకు సంబంధించిన రోడ్డు ప్రమాదాలు పెరుగుతున్నాయని పిటిషనర్ తరఫు లాయర్ వాదించారు. దీనిపై ధర్మాసనం ఘాటుగా స్పందించింది. పాదచారులు ఉండకూడని చోట ఉంటే ఇలాంటి ఘటనలు జరుగుతాయని పేర్కొంది. దేశంలో హైవేలు పెరిగాయి. కానీ, మనలో క్రమశిక్షణ పెరగలేదని వ్యాఖ్యానించింది. పాదచారులతో సహా హైవేలపై ఎప్పటికీ వివిధ రకాల ట్రాఫిక్‌ను కలిగి ఉండలేరు. మీకు లభించిన దానితో మీరు సంతోషంగా ఉండండి అని ధర్మాసనం పేర్కొంది. ‘ఇది పూర్తిగా అసంబద్ధ పిటిషన్. వాస్తవానికి దీనికి జరిమానా విధించాల్సింది. ఏదేమైనా.. సంబంధిత మంత్రిత్వ శాఖను సంప్రదించేందుకు హైకోర్టు మీకో అవకాశం ఇచ్చింది’ అని పిటిషన్‌దారులను ఉద్దేశించి సుప్రీం ధర్మాసనం మండిపడింది.