26 న తిరుమలకి ప్రధాని మోడీ

తెలంగాణ ఎన్నికలు, త్వరలో జరగబోయే లోక్‌సభ ఎన్నికలకు రిఫరెండంగా భావిస్తున్న తరుణంలో ప్రధాన మంత్రి నరేంద్ర మోదీ.. తెలంగాణ ఎన్నికలలో బీజేపీ అభ్యర్థుల కోసం తెలంగాణాలో మరోసారి పర్యటించబోతున్నారు.ఈ నెల 25, 26వ తేదీల్లో తెలంగాణలోని వివిధ రాయకీయ సభల్లో మోదీ పాల్గొంటారు. తర్వాత తిరుమల వెంకటేశ్వరస్వామి దర్శనం కోసం 26న తిరుమలకు వెళ్లబోతున్నారు.షెడ్యూల్ ప్రకారం 26న సాయంత్రం దుండిగల్ ఎయిర్ పోర్ట్ నుంచి ప్రత్యేక విమానంలో తిరుపతికి వెళ్తారు పీఎం. తర్వాత రోడ్డు మార్గంలో రాత్రి 7:45కి తిరుమల చేరుకుంటారు. రాత్రి అక్కడే ఉంటారు. 27న తెల్లారి వెంకటేశ్వర స్వామిని దర్శించుకుంటారు. ఆ తర్వాత ఉదయం 9:30కి తిరుమల నుంచి తిరుపతి అంతర్జాతీయ విమానాశ్రయానికి వెళ్తారు. అక్కడి నుంచి ఉదయం 11.30కి హకీంపేట ఎయిర్‌పోర్ట్ చేరుకుంటారు.ప్రధాని పర్యటన దృష్ట్యా కట్టుదిట్టమైన భద్రతా ఏర్పాట్లు చేస్తున్నారు పోలీసులు. స్పెషల్ ప్రొటెక్షన్ గ్రూప్ (SPG) మార్గదర్శకాల ప్రకారం టీటీడీ, పోలీసుశాఖ ప్రధాని పర్యటనకు ఏర్పాట్లు చేస్తున్నాయి.

27 సాయంత్రం హైదరాబాద్‌లో జరిగే రోడ్ షోలో ప్రధాని మోదీ పాల్గొంటారని బీజేపీ వర్గాలు చెబుతున్నాయి. గ్రేటర్ హైదరాబాద్ పరిధిలో సత్తా చాటాలని భారీగా ఆశలు పెట్టుకున్న బీజేపీ, అందుకోసం భారీ రోడ్ షో ప్లాన్ చేసింది, ఈ రోడ్ షోలో ప్రధాని మోదీతోపాటూ.. బీజేపీతో పొత్తు పెట్టుకున్న జనసేన అధినేత పవన్ కళ్యాణ్ కూడా పాల్గొంటారని తెలిసింది. రోడ్ షో తర్వాత మోదీ.. ఢిల్లీ వెళ్తారు.

తెలుగు రాష్ట్రాలలో వేగంగా మారుతున్న సమీకరణాల వల్ల ప్రధాని మోదీ టూర్ కొంత ఆసక్తి రేపుతోంది. ఏపీలో బీజేపీ-జనసేన మధ్య పొత్తు ఉందని బీజేపీ నేతలు చెబుతున్నా, పవన్ కళ్యాణ్ మాత్రం.. టీడీపీతో కలిసి ఎన్నికలకు వెళ్తున్నామని ప్రకటించారు. అంతేకాదు.. రెండు పార్టీలూ కలిసి ఉమ్మడి మేనిఫెస్టోని ప్రకటించాయి కూడా. తెలంగాణలో ఎన్నికల తరువాతే ఆంధ్రలో పొత్తుల మీద ఒక నిర్ణయానికి వస్తారని ఒక సీనియర్ బీజేపీ నేత తెలిపారు. ప్రస్తుత టూర్ మాత్రం తిరుమల వెంకన్నను దర్శించుకునేందుకు మాత్రమే అనీ.. ఎటువంటి రాజకీయ సమావేశాలూ ఉండవు అని తెలిపారు.