నేడు వైఎస్సార్‌ కల్యాణమస్తు ఆర్థిక సాయం విడుదల

ఏపీ ప్రభుత్వం మరో శుభవార్త చెప్పింది. ఇవాళ కళ్యాణమస్తు,షాదీ తోఫా సాయం అందిస్తోంది. ముఖ్యమంత్రి వైఎస్‌ జగన్‌ గురువారం తాడేపల్లి క్యాంపు కార్యాలయం నుంచి బటన్‌ నొక్కి వధువుల తల్లుల ఖాతాల్లో జమ చేయనున్నారు. ఈ ఏడాది జూలై–సెప్టెంబర్‌ త్రైమాసికంలో వివాహం చేసుకున్న అర్హులైన 10,511 జంటలకు వైఎస్సార్‌ కళ్యాణమస్తు, వైఎస్సార్‌ షాదీ తోఫా కింద రూ. 81.64 కోట్ల ఆర్థిక సాయాన్ని అందజేస్తున్నారు.
ఎస్సీ, ఎస్టీ, బీసీ, దివ్యాంగులు, భవన నిర్మాణ కార్మికుల కుటుంబాల్లోని ఆడపిల్లలకు వైఎస్సార్‌ కళ్యాణమస్తు ద్వారా, మైనార్టీ వర్గాల ఆడపిల్లలకు వైఎస్సార్‌ షాదీ తోఫా ద్వారా ఆర్థిక సాయం అందిస్తోంది. అంతేకాదు పేదల పిల్లలు పెద్ద చదువులు చదవాలన్న ఆలోచనతో వైఎస్సార్‌ కళ్యాణమస్తు, వైఎస్సార్‌ షాదీ తోఫాలకు కొన్ని అర్హతలు నిర్ణయించారు. వధూవరులిద్దరు కచ్చితంగా 10వ తరగతి ఉత్తీర్ణత సాధిస్తేనే అర్హులు.
బాల్య వివాహాల నివారణకు పెళ్లి నాటికి అమ్మాయికి 18, అబ్బాయికి 21 సంవత్సరాలు దాటి ఉండాలన్న నిబంధనను అమలు చేస్తు్నారు. ఇప్పుడు అందిస్తున్న సాయంతో కలిపి వైఎస్సార్‌ కళ్యాణమస్తు, వైఎస్సార్‌ షాదీ తోఫా కింద ఇప్పటి వరకు 46,062 మంది లబ్ధిదారుల ఖాతాల్లో రూ.348.84 కోట్లు ప్రభుత్వం జమ చేసింది. ఎస్సీలకు ప్రభుత్వం రూ.1,00,000 అందిస్తోంది. కులాంతర వివాహం చేసుకున్న ఎస్సీలకు రూ.1,20,000 సాయం చేస్తోంది. ఎస్టీలకు ప్రభుత్వం రూ.1,00,000 అందిస్తోంది.
బీసీలకు ప్రభుత్వం రూ.50,000 అందిస్తోంది.. కులాంతర వివాహం చేసుకున్న బీసీలకు ప్రభుత్వం అందిస్తున్న సాయం రూ.75,000. కులాంతర వివాహం చేసుకున్న ఎస్టీలకు ప్రభుత్వం రూ.1,20,000 సాయం అందిస్తోంది. మైనార్టీలు, దూదేకులు, నూర్‌ బాషాలకు ప్రభుత్వం రూ.1,00,000 అందిస్తోంది. విభిన్న ప్రతిభావంతులకు ప్రభుత్వం రూ.1,50,000లు అందిస్తోంది. భవన, ఇతర నిర్మాణ కార్మికులకు ప్రభుత్వం రూ.40,000లు ఇస్తోంది.
ప్రభుత్వం మొదటి పెళ్లికి మాత్రమే ఈ సాయం అందిస్తోంది.. అయితే భర్త చనిపోయిన వితంతువుకు మాత్రం సాయం అందిస్తున్నారు. నెలసరి ఆదాయం గ్రామీణ ప్రాంతంలో రూ.10వేలు, పట్టణ ప్రాంతాల్లో రూ.12వేలు ఉన్నవాళ్లు మాత్రమే ఈ పథకాలకు అర్హులుగా నిర్ణయించారు. అలాగే ఈ పథకానికి సంబంధించి.. మూడెకరాల్లోపు మాగాణి, పదెకరాల మెట్ట, మాగాణి మెట్ట కలిపి 10 ఎకరాలు ఉన్నవాళ్లు మాత్రమే అర్హులుగా నిర్ణయించారు. పట్టణ ప్రాంతాల్లో వెయ్యి చదరపు అడుగులకు మించిన నిర్మాణ ఆస్తి ఉండకూడదు.
అంతేకాదు విద్యుత్‌ వినియోగం నెలకు 300 యూనిట్లలోపు ఉండాలనే నిబంధన ఉంది.. ఐటీ చెల్లించేవారు ఈ పథకానికి అర్హులు కాదు. సొంతంగా నాలుగు చక్రాల వాహనం ఉన్నవారు అనర్హులు.. . ప్రభుత్వ ఉద్యోగులు, ప్రభుత్వ పెన్షనర్లు ఈ పథకానికి అర్హులు కాదు. కేవలం పారిశుద్ధ్య కార్మికులకు మాత్రం మినహాయింపు ఉంది. ఈ పథకానికి అర్హులైన వారు గ్రామ, వార్డు సచివాలయాలకు వెళ్లి దరఖాస్తు చేసుకోవచ్చు. ఈ పథకానికి పెళ్లైన 60 రోజుల్లోపు దరఖాస్తు చేసుకోవాల్సి ఉంటుంది. దరఖాస్తుల్ని పరిశీలించి.. గ్రామ, వార్డు సచివాలయాల్లో అర్హుల జాబితాను ప్రదర్శిస్తారు.